ក្រុមការងារ ១០០រាត្រី ដឹកនាំសមាជិក៥០រូប ទៅស្វែងយល់សហគមន៍អារ៉ែង

ក្រុមការងារ ១០០រាត្រី នឹងដឹកនាំយុវជន និងអាជ្ញាធរចំនួន៥០រូប ទៅសិក្សាស្វែងយល់នៅក្នុងសហគមន៍អារ៉ែង រយៈពេល៣ថ្ងៃ ចាប់ពីថ្ងៃទី០៨ ដល់ថ្ងៃទី១០ ខែកញ្ញា ឆ្នាំ២០២៣។ ការធ្វើដំណើរទៅសហគមន៍អារ៉ែងនេះ គឺនៅក្នុងគម្រោងអប់រំ និងណែនាំសហគមន៍អារ៉ែង លើកកម្ពស់អាជ្ញាធរមូលដ្ឋាននូវស្មារតីនៃមូលដ្ឋានច្បាប់ស្តីពីព្រៃឈើ និងច្បាប់ស្តីពីតំបន់ការពារធម្មជាតិ។ កម្មវិធីនេះ មានកិច្ចសហប្រតិបត្តិការរវាងក្រុមការងារ ១០០រាត្រី ជាមួយនឹងក្រសួងបរិស្ថាន។

បើតាមក្រុមការងារ ១០០រាត្រី ព្រៃឈើប្រទេសកម្ពុជា គ្របដណ្ដប់ជាងពាក់កណ្ដាលនៃផ្ទៃដីប្រទេស និងជាធនធានធម្មជាតិដ៏សំខាន់បំផុត។ ប្រព័ន្ធអេកូឡូស៊ីព្រៃឈើទាំងនេះដែលលូតលាស់នៅរយៈកម្ពស់ផ្សេងៗក្រោមលក្ខខណ្ឌអាកាសធាតុខុសៗគ្នា គឺជាធនធានធម្មជាតិដ៏មានតម្លៃមិនអាចកាត់ថ្លៃបាន។ ព្រៃឈើ មិនត្រឹមតែមានមុខងារក្នុងការជួយថែរក្សាលំនឹងប្រព័ន្ធមជ្ឈដ្ឋានធម្មជាតិ និងការពារគុណភាពបរិស្ថានប៉ុណ្ណោះទេ ប៉ុន្តែ ក៏ជួយអភិវឌ្ឍន៍សេដ្ឋកិច្ចសង្គមកម្ពុជាផងដែរ៕