ឧត្ដមក្រុមប្រឹក្សាពិគ្រោះយោបល់៖ មានគណបក្ស ២៨ហើយ ស្នើសុំចូលជាសមាជិក

ក្រោយការបើកភ្លើងខៀវបានរយៈពេល១០ថ្ងៃ គិតមកទល់ថ្ងៃអង្គារ ទី០៥ ខែកញ្ញនេះ មានគណបក្សចំនួន ២៨ហើយ ដែលបានស្នើសុំចូលជាសមាជិកឧត្ដមក្រុមប្រឹក្សាពិគ្រោះយោបល់។ នេះ បើតាមការឆ្លើយតបរបស់លោក ឈឹម ផលវរុណ ប្រធានលេខាធិការដ្ឋានឧត្ដមក្រុមប្រឹក្សាពិគ្រោះ និងផ្តល់យោបល់។

លោក ឈឹម ផលវរុណ ​បានប្រាប់ “កម្ពុជាថ្មី” ថា មានគណបក្សនយោបាយចំនួន ២៨ហើយ ដែលបានស្នើសុំចូលជាសមាជិកនៃឧត្ដមលក្រុមប្រឹក្សាពិគ្រោះ និងផ្ដល់យោបល់។ ព្រោះតែត្រូវគោរពគោលការណ៍លាក់អត្តសញ្ញាណគណបក្សក្នុងដំណើរការដាក់ពាក្សស្នើសុំ លោក ឈឹម ផលវរុណ មិនអាចបញ្ជាក់អំពីបណ្ដាឈ្មោះរបស់គណបក្សដែលបានស្នើសុំចូលជាសមាជិកឧត្ដមក្រុមប្រឹក្សាពិគ្រោះ និងផ្តល់យោបល់ បានឡើយ។

សូមរំលឹកឡើងវិញថា ព្រះរាជក្រឹត្យស្ដីពីការរៀបចំ និងការប្រព្រឹត្តទៅនៃឧត្ដមក្រុមប្រឹក្សាពិគ្រោះ និងផ្ដល់យោបល់ បានចូលជាធរមានកាលថ្ងៃទី ២៦ ខែសីហា ឆ្នាំ២០២៣។ ផ្អែកតាមព្រះរាជក្រឹត្យ គឺរាល់គណបក្សដែលស្របច្បាប់ទាំងអស់នៅកម្ពុជា គឺអាចស្នើសុំចូលជាសមាជិកឧត្ដមក្រុមប្រឹក្សាពិគ្រោះ និងផ្តល់យោបល់បាន ដោយគ្មានការរើសអើងថាគណបក្សនោះ បាន ឬមិនបានចូលរួមការបោះឆ្នោតកាលពីថ្ងៃទី ២៣​ ខែកក្កដា ឆ្នាំ២០២៣ នោះទេ។ ក៏ប៉ុន្តែ បើយោងតាមព្រះរាជក្រឹត្យ គឺរាល់គណបក្សដែលដែលស្នើសុំចូលជាសមាជិកឧត្ដមក្រុម​ប្រឹក្សាពិគ្រោះ និងផ្ដល់យោបល់ ត្រូងឆ្លងកាត់ការសម្រេចពីនាយករដ្ឋមន្ត្រីជាមុនសិន។

បន្ថែមពីនេះ ព្រះរាជក្រឹត្យស្ដីពីការរៀបចំ និងប្រព្រឹត្តទៅនៃឧត្ដមក្រុមប្រឹក្សាពិគ្រោះ និងផ្តល់យោបល់ ក៏បានបញ្ជាក់ឲ្យដឹងថា រាល់ប្រតិភូគណបក្សដែលស្នើសុំចូលជាសមាជិកឧត្ដមក្រុមប្រឹក្សាបានមុនកាលកំណត់ ពោល គឺចូលជាសមាជិកបានមុន ឬត្រឹមថ្ងៃទី៩ ខែកញ្ញា ឆ្នាំ២០២៣ គឺប្រតិភូគណបក្សនោះ នឹងក្លាយជាស្ថានិកនៃឧត្ដមក្រុមប្រឹក្សាពិគ្រោះ និងផ្ដល់យោបល់។ មិនតែប៉ុណ្ណោះ គណបក្សដែលស្នើសុំចូលមុននោះទៀតសោត នឹងទទួលបានតំណែងចំនួន៣កៅអី។ តំណែង៣កៅអីនេះ គឺទី១ ជាប្រធានប្រតិភូមានឋានៈស្មើទេសរដ្ឋមន្រ្តី តំណែងទី២ ជាអនុប្រធានប្រតិភូមានឋានៈស្មើរដ្ឋមន្ត្រី និងតំណែងទី៣ ជាសមាជិកប្រតិភូមានឋានៈស្មើរដ្ឋលេខាធិការ។

ចំណែកឯ ប្រតិភូគណបក្សណាដែលស្នើសុំចូលជាសមាជិកនៃឧត្ដមក្រុមប្រឹក្សាពិគ្រោះ និងផ្ដល់យោបាល់ក្រោយព្រះរាជ្យក្រឹត្យចូលជាធរមានរយៈពេល២សប្ដាហ៍ បានន័យថា គណបក្សនយោបាយដែលស្នើចូលជាសមាជិក ក្រោយថ្ងៃទី៩ ខែកញ្ញា ឆ្នាំ២០២៣ គឺប្រតិភូគណបក្សនោះ ទទួលបានតំណែងត្រឹមតែ២កៅអីប៉ុណ្ណោះ ដោយតំណែងទី១ ជាប្រធានប្រតិភូមានឋានៈស្មើទេសរដ្ឋមន្រ្តី ខណៈដែលតំណែងទី២ ជាអនុប្រធានប្រតិភូមានឋានៈស្មើរដ្ឋមន្ត្រី៕

ដោយ៖ ង៉ិល ណារ៉ាត់