ចុងឆ្នាំ២០២៣នេះ ក្រុងកំពង់ចាម គ្រោងប្រកាស បញ្ចប់ការបន្ទោរបង់ពាសវាលពាសកាល

របាយការណ៍របស់មន្ទីរអភិវឌ្ឍន៍ជន ខេត្តកំពង់ចាម បានបញ្ជាក់ថា មកដល់ពេលនេះ ខេត្តកំពង់ចាម មានអត្រាគ្រួសារ ដែលមានទឹកស្អាតប្រើប្រាស់ប្រមាណជា ៩៣% ស្មើនឹងប្រជាពលរដ្ឋ ចំនួន ២៦៤.៤២៥គ្រួសារ និងអត្រាគ្របដណ្ដប់ខ្នងផ្ទះ ដែលមានបង្គន់អនាម័យប្រើប្រាស់ ៨៨% ដែលមានចំនួន ១៩១.៣១៧ខ្នងផ្ទះ ។

លោក អ៉ឹង វិសុទ្ធ ប្រធានមន្ទីរអភិវឌ្ឍន៍ជនបទ ខេត្តកំពង់ចាម បានឲ្យដឹងថា ក្នុងខេត្តកំពង់ចាម មានភូមិដែលបញ្ចប់ការបន្ទោរបង់ពាសវាលពាសកាល ODF មានចំនួន ១៧៧ភូមិ និងឃុំ សង្កាត់ ដែលបានបញ្ចប់ដែលបញ្ចប់ការបន្ទោរបង់ពាសវាលពាសកាល ODF ចំនួន០៣ឃុំ-សង្កាត់។ នៅចុងឆ្នាំ២០២៣ ខាងមុខនេះ ខាងមន្ទីរ នឹងមានគម្រោងរៀបចំប្រកាសក្រុងកំពង់ចាម ជាក្រុងដែលបញ្ចប់ការបន្ទោរបង់ពាសវាលពាសកាល ODF។

ទន្ទឹមនឹងនេះដែរ អាជ្ញាធរខេត្តកំពង់ចាម ក្រោមការដឹកនាំពី លោក អ៊ុន ចាន់ដា អភិបាលខេត្តកំពង់ចាម ក៏បានស្នើដល់អ្នកពាក់ព័ន្ធទាំងអស់ សូមរួមគ្នាខិតខំប្រឹងប្រែង ដើម្បីរៀបចំផែនការសកម្មភាពលើវិស័យទឹកស្អាត និងអនាម័យជនបទ ឲ្យបានល្អប្រសើរឡើង និងប្រកបដោយប្រសិទ្ធភាពខ្ពស់។ ជាពិសេស ការឈានទៅដល់ការដាក់ខេត្តកំពង់ចាម ទៅជាខេត្តដែលបញ្ចប់ការបន្ទោបង់ពាសវាលពាសកាល ODF ដើម្បីរួមចំណែកសម្រេចបានក្នុងឆ្នាំ២០២៣។ ប្រជាពលរដ្ឋគ្រប់រូបដែលរស់នៅសហគមន៍ជនបទ ក្នុងខេត្ត មានលទ្ធភាពទទួលបានសេវាផ្គត់ផ្គង់ទឹកស្អាត ព្រមទាំងរស់នៅក្នុងបរិស្ថាន ដែលមានអនាម័យល្អ ៩០% និងដល់ឆ្នាំ២០២៥ សម្រេចបាន១០០% ។

សូមជម្រាបថា គិតមដល់បច្ចុប្បន្ន មានរាជធានី ខេត្ត ចំនួន ៦ មកហើយ នៅទូទាំងព្រះរាជាណាចក្រកម្ពុជា ដែលបានប្រកាសបញ្ចប់ទាំងស្រុង ក្នុងការបន្ទោបង់ពាសវាលពាសកាល ODF នេះ៕

អត្ថបទ៖  ឡេក ចាន់ពេជ្រ