បើកបវេសនកាលថ្មី សាលាបារាំង ដេញសិស្សស្រីស្លៀករ៉ូបមូស្លីម ទៅផ្ទះវិញ មិនឲ្យចូលរៀន

សាលាបារាំង បានបណ្តេញក្មេងស្រីរាប់សិបនាក់ឲ្យត្រលប់ទៅផ្ទះវិញ ដោយសារតែពួកគេស្លៀករ៉ូបអាបាយ៉ា មូស្លីម មករៀន នៅថ្ងៃបើកបវេសនកាលថ្មី។ នេះបើតាមការបញ្ជាក់ពី រដ្ឋមន្ត្រីក្រសួងអប់រំ Gabriel Attal កាលពីថ្ងៃអង្គារទី៥ខែកញ្ញា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោករដ្ឋមន្ត្រី បានប្រាប់ទូរទស្សន៍ BFM ថា ក្មេងស្រីជិត៣០០នាក់បានបង្ហាញខ្លួននៅព្រឹកថ្ងៃចន្ទ ដោយស្លៀករ៉ូបអាបាយ៉ា។ យ៉ាងណា​ ពួកគេភាគច្រើនបានយល់ព្រមផ្លាស់ប្តូរសម្លៀកបំពាក់ប៉ុន្តែ មានក្មេងស្រី៦៧នាក់បដិសេធ ទើបត្រូវបានសាលា ដេញឲ្យត្រលប់ទៅផ្ទះវិញ។

កាលពីខែមុន រដ្ឋាភិបាលបារាំង បានប្រកាសហាមប្រាមរ៉ូបអាបាយ៉ា នៅក្នុងសាលារៀន ដោយនិយាយថា វាជាការបំពានច្បាប់ ស្តីពីលទ្ធិសាសនាក្នុងវិស័យអប់រំ។ ទង្វើនេះ ធ្វើឲ្យក្រុមសិទ្ធិនយោបាយរីករាយ ប៉ុន្តែក្រុមឆ្វេងនិយមជំទាស់ថា វាតំណាងឲ្យការគំរាមកំហែងដល់សេរីភាពស៊ីវិល។

ដោយប្រកាសពីបម្រាមនេះកាលពីខែមុន លោក Attal បាននិយាយនៅពេលនោះថា “ពេលអ្នកដើរចូលទៅក្នុងថ្នាក់រៀន អ្នកមិនគួរអាចកំណត់អត្តសញ្ញាណសាសនារបស់សិស្សណាម្នាក់ ដោយគ្រាន់តែមើលទៅពួកគេនោះទេ។ ខ្ញុំក៏សម្រេចចិត្តថា រ៉ូបអាបាយ៉ា មិនអាចស្លៀកនៅសាលាបានទៀតឡើយ”។

ហើយនៅថ្ងៃនេះ លោក Attal បញ្ជាក់ថា ក្មេងស្រីដែលគេបដិសេធចូលរៀន សាលានឹងផ្ញើសំបុត្រទៅគ្រួសាររបស់ពួកគេ ដោយនិយាយថា “សាសនាមិនមែនជាការបង្ខិតបង្ខំទេ វាគឺជាសេរីភាព”។ លោកបន្ថែមថា ប្រសិនបើពួកគេបង្ហាញខ្លួននៅសាលាម្តងទៀតដោយស្លៀកសម្លៀកបំពាក់ដដែល នោះនឹងមានរឿងត្រូវនិយាយគ្នា៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ រដ្ឋមន្ត្រី​ក្រសួង​អប់រំ​បារាំង ​ប្រកាស​ពី​ផែនការ​ហាម​​ស្លៀករ៉ូបរបស់មូស្លីមក្នុង​សាលារៀន