កម្ពុជាបានប្រាក់ចំណូលជិត ៤៨០ លានដុល្លារ ពីការនាំចេញជ័រកៅស៊ូ

កម្ពុជា​រកចំណូលបាន​ជិត ៤៨០ លានដុល្លារពីការនាំចេញជ័រកៅស៊ូ និងផលិតផលធ្វើពីកៅស៊ូ​នៅក្នុងរយៈពេល ៨ ខែ ឆ្នាំ ២០២៣ ចំនួននេះកើនឡើងជាង ៥៥% ធៀប​រយៈពេល​ដូចគ្នា​ឆ្នាំ​ ២០២២​។ នេះ​បើតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា។

ទិន្នន័យដែលកម្ពុជាថ្មីទទួលបាននៅថ្ងៃទី ៨ ខែកញ្ញា ​បានឱ្យដឹងថា ចាប់ពីខែមករា-សីហា ឆ្នាំ ២០២៣ ការនាំចេញ​ជ័រកៅស៊ូ និងផលិតផលធ្វើពីកៅស៊ូមានតម្លៃ​សរុប ៤៧៩ ៣៩៦ ០០០ ដុល្លារ។

ការនាំចេញកៅស៊ូក្នុងខែសីហា កម្ពុជាទទួលបានចំណូលជាង ៩៤ លានដុល្លារ កើនឡើង ១៣៩% បើធៀប​នឹងរយៈពេលដូចគ្នាក្នុងឆ្នាំ ២០២២ មានចំនួនជាង ៣៩ លានដុល្លារ។

សម្រាប់តម្លៃ​លក់​ជ័រ​កៅស៊ូ​គ្រួសារ​នៅ​ចម្ការ​ជា​មធ្យម​នៅខែសីហា គឺ​ទឹក​ជ័រ ​(DRC ១០០​ ភាគរយ​) មានតម្លៃ​ចាប់ពី ៤ ៥០០ រៀល ក្នុង ​១​ គីឡូក្រាម។ 

កាលពីឆ្នាំ ២០២២ កម្ពុជា បានរកចំណូលពីការនាំចេញកៅស៊ូធម្មជាតិ និងផលិតផលកៅស៊ូបានប្រមាណ ៥៤១. ៦៦ លានដុល្លារ។ គិតត្រឹមឆ្នាំ២០២២ កម្ពុជាមានផ្ទៃដីដាំដំណាំកៅស៊ូសរុបចំនួនជាង ៤០ម៉ឺនហិកតា។ ចំណែកឯទីផ្សារ​សំខាន់ៗ ក្នុងការនាំចេញកៅស៊ូរបស់កម្ពុជា មានដូចជា ប្រទេសវៀតណាម ម៉ាឡេស៊ី ចិន សិង្ហបុរី ជប៉ុន កូរ៉េ និងសហគមអឺរ៉ុប ជាដើម៕

អត្ថបទ៖ ឡេង ដេត