តួឯកប្រុសរឿង “Captain America” ដឹកដៃមិត្តស្រីវ័យក្មេងជាង ១៦ឆ្នាំ រៀបការយ៉ាងស្ងប់ស្ងាត់

លោក Chris Evans តួឯកប្រុសភាពយន្តរឿង “Captain America” បានរៀបការរួចហើយកាលពីចុងប្ដាហ៍មុន ជាមួយមិត្តស្រីវ័យក្មេងជាង ១៦ឆ្នាំ ខណៈពិធីបានប្រារព្ធឡើងយ៉ាងស្ងប់ស្ងាត់បំផុត សឹងគ្មានអ្នកដឹងទាល់តែសោះ។

តារាសម្ដែង Chris Evans និងមិត្តស្រីនាង ​Alba Baptista បានដឹកដៃគ្នារៀបពិធីអាពាហ៍អាពាហ៍នៅក្នុងផ្ទះផ្ទាល់ខ្លួនយ៉ាងសាមញ្ញា ក្នុងទីក្រុងបូស្តុន រដ្ឋម៉ាឈូសេត កាលពីថ្ងៃទី៩ ខែកញ្ញា ឆ្នាំ២០២៣ ជាមួយនឹងភ្ញៀវចូលរួមអបអរជូនពរប៉ុន្មាននាក់ សុទ្ធសឹងជាមិត្តជិតដិតប៉ុណ្ណោះ។

យោងតាមកាសែត New York Post បានឱ្យដឹងថា ភ្ញៀវចូលរួមទាំងអស់ត្រូវបានស្នើសុំឱ្យចុះហត្ថលេខាលើកិច្ចព្រមព្រៀងមិនបង្ហាញព័ត៌មានមុនពេលពិធីរៀបចំឡើយ។ ដូច្នេះទើបបានជាមង្គលការនេះ ពុំមានអ្នកដឹង សូម្បីអ្នកគាំទ្រជិតស្និទ្ធក៏ដោយ។

គួរបញ្ជាក់ថា មុនដឹកដៃគ្នាចូលរោងការ Chris Evans និង Alba Baptista បានទាក់ទងគ្នាជាគូសង្សាររយៈពេលជាងមួយឆ្នាំ ខណៈបច្ចុប្បន្នកូនកម្លោះមានវ័យ ៤២ឆ្នាំ ហើយកូនក្រមុំមានវ័យ ២៦ឆ្នាំ។ មកទល់ពេលនេះ រូបថតអាពាហ៍ពិពាហ៍របស់តារាទាំងពីររូប នៅមិនទាន់មានការចែករំលែក ឬផ្សព្វផ្សាយមួយសន្លឹកនោះទេ៕

ប្រែសម្រួល៖ សន្យា

ចុចអាន៖ ជីវិតក្រៅឆាក ៥ យ៉ាងរបស់តារាសម្ដែង Lee Min-ho ទស្សនិកជនប្រហែលមិនធ្លាប់ដឹង

ចុចអាន៖ ទម្លាយឈ្មោះកូនប្រុសពៅរបស់ Rihanna ដែលសម្រាលតាំងពីជាង ១ ខែមុន