ក្រសួងការបរទេស ចិន ៖ ដំណើរទស្សនកិច្ចរបស់សម្ដេចធិបតី ហ៊ុន ម៉ាណែត នឹងបង្កើត “ច្រករបៀងត្រី និងស្រូវ”

រដ្ឋាភិបាលទីក្រុងប៉េកាំងសង្ឃឹមថា ដំណើរបំពេញទស្សនកិច្ចផ្លូវការនៅប្រទេសចិនរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នឹងផ្តល់នូវគំនិតផ្តួចផ្តើមបង្កើតកិច្ចសហប្រតិបត្តិការដូចជា “ច្រករបៀងអភិវឌ្ឍន៍ឧស្សាហកម្ម” និង “ច្រករបៀងត្រី និងស្រូវ” ។

ការលើកឡើងនេះបានកើតឡើង បន្ទាប់ពីអ្នកនាំពាក្យក្រសួងការបរទេសចិនលោកស្រី Mao Ning បានឆ្លើយតបទៅនឹងសំណួររបស់អ្នកសារព័ត៌មាន Xinhua ដែលបានសួរនាំថា តើ​ចិន​យល់​ឃើញ​យ៉ាង​ណា​ចំពោះ​ទំនាក់​ទំនង​ចិន-កម្ពុជា​បច្ចុប្បន្ន? តើចិនរំពឹងអ្វីខ្លះពីដំណើរទស្សនកិច្ចនេះ?

លោកស្រី Mao Ning បាននិយាយថា “តបតាមការអញ្ជើញរបស់លោកនាយករដ្ឋមន្ត្រីចិន Li Qiang, សម្ដេចធិបតី ហ៊ុន ម៉ាណែត ដែលអញ្ជើញបំពេញទស្សនកិច្ចផ្លូវការនៅប្រទេសចិន ចាប់ពីថ្ងៃទី១៤ ដល់ថ្ងៃទី១៦ ខែកញ្ញា ក៏នឹងជួបលោកប្រធានាធិបតី Xi Jinping និងប្រធានសភាតំណាងប្រជាជនចិនលោក Zhao Leji ផងដែរ” ។

លោកស្រីបន្ថែមថា តាមរយៈដំណើរទស្សនកិច្ចលើកនេះ នឹងបង្ហាញពីដំណើរឆ្ពោះទៅរកកិច្ចសហប្រតិបត្តិការយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ ។ ជាពិសេសយើងសង្ឃឹមថា នឹងផ្តល់នូវគំនិតផ្តួចផ្តើមបង្កើតកិច្ចសហប្រតិបត្តិការដូចជា “ច្រករបៀងអភិវឌ្ឍន៍ឧស្សាហកម្ម” និង “ច្រករបៀងត្រី និងស្រូវ” ហើយរួមគ្នាឆ្ពោះទៅរកយុគសម័យថ្មីរួមគ្នាផងដែរ ។

ជាចុងក្រោយលោកស្រីបញ្ជាក់ថា នេះ​ជា​ដំណើរ​ទស្សនកិច្ច​ផ្លូវការ​លើកដំបូង​របស់​សម្ដេចធិបតី ហ៊ុន ម៉ា​ណែ​ត បន្ទាប់ពីសម្ដេច​ចូលកាន់​តំណែង​ ហើយវា​បង្ហាញ​ពី​សារៈសំខាន់​ដ៏​ធំធេង​ដែល​រដ្ឋាភិបាលថ្មីរបស់​កម្ពុជា​បានផ្សារ​ភ្ជាប់​ទំនាក់ទំនង​ចិន​-​កម្ពុជា ។ ម្យ៉ាងឆ្នាំនេះក៏ជាខួបលើកទី ៦៥ នៃការបង្កើតទំនាក់ទំនងការទូតចិន-កម្ពុជា និងឆ្នាំមិត្តភាពចិន-កម្ពុជាផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ MFA.Gov

ចុចអាន ៖ លោក Blinken ៖ ការប្រកួតប្រជែងរបស់ អាមេរិក ជាមួយចិន និងរុស្ស៊ី ជា សញ្ញាបញ្ចប់សណ្ដាប់ធ្នាប់ពិភពលោក