​ម្ចាស់សំណង់សង់របងរំលោភចូលដីចំណីឆ្នេរសមុទ្រ​អង្កោល ស្នើសុំ​ពន្យា​រពេល​រុះរើ

នាថ្ងៃទី ១៤ ខែកញា ឆ្នាំ២០២៣ លោក ឆាង ឆាយ អភិបាលស្រុកដំណាក់ចង្អើរបានបញ្ជាក់ឱ្យដឹងថា ម្ចាស់​សំណង់បានស្នើ​សុំំ​ពន្យាពេលក្នុងការ​រុះរើ​​របងថ្មដែល​សង់រំលោភ​​ចូលដីចំណីរឆ្នេរសមុទ្រអង្កោល​។

លោក ឆាង ឆាយ អភិបាលស្រុកដំណាក់ចង្អើរបានឱ្យដឹងថា ប៉ុន្មានថ្ងៃកន្លងទៅនេះស្របពេលដែលមានព័ត៌មានចុះផ្សព្វផ្សាយមានករណីធ្វើរបងរំលោភចូលយកដីចំណីរឆ្នេរសមុទ្រអង្កោល នៅភូមិអង្កោល ឃុំអង្កោល ស្រុកដំណាក់ចង្អើខេត្តកែប លោកបានដឹកនាំមន្ត្រី​និងមន្ទីរជំនាញចុះទៅដល់ទីតាំង​ ពិតជា​មានការ​សាងសង់រំលោភ​ពិតប្រាកដមែន។ លោក​បាន​ណែនាំ​ឲ្យម្ចាស់​សំណង់រុះរើ​របង​ដែល​សាងសង់រំលោភ​ចូលដីចំណីឆ្នេរប្រមាណជាង ១២ ម៉ែត្រ។

លោកអភិបាលស្រុកដំណាក់ចង្អើរបានបញ្ជាក់​ថា ការបញ្ជា​ឲ្យ​រុះរើសំណង់សង់​រំលោភចូលដីចំណីឆ្នេរនៅតំបន់ឆ្នេរសមុទ្រអង្កោលនេះ គឺដើម្បីកុំឲ្យមានការរិះគន់បន្តទៀត។

យ៉ាងណា​មិញ​បើ​តាមលោកអភិបាល​ស្រុក ម្ចាស់​សំណង់​បានសំណូមពរពន្យារពេលក្នុងការ​រុះរើរបង​ និងស្នើ​​សុំឲ្យអាជ្ញាធររក្សាចំណែក​ដីកម្មសិទ្ធិស្របច្បាប់៕

អត្ថបទ៖ សឹង រ៉ាត់