លោក ពូទីន និង គីម ជុងអ៊ុន ឲ្យកាដូគ្នាជាកាំភ្លើងវែង ក្នុងជំនួបលើកទី ២

វិមានក្រឹមឡាំងបាននិយាយថា មេដឹកនាំកូរ៉េខាងជើងលោក គីម ជុងអ៊ុន និងប្រធានាធិបតីរុស្ស៊ីលោក វ្ល៉ាឌីមៀរ ពូទីន បានផ្តល់កាដូជាកាំភ្លើងវែងឲ្យគ្នាទៅវិញទៅមក អំឡុងពេលមេដឹកនាំទាំងពីរជួបពិភាក្សាគ្នានៅទីលានបាញ់បង្ហោះយានអវកាសនៅតំបន់ចុងបូព៌ាប្រទេសរុស្ស៊ីកាលពីថ្ងៃពុធ ។

ពាក់ព័ន្ធនឹងបញ្ហានេះដែរ អ្នកនាំពាក្យវិមានក្រឹមឡាំងលោក Dmitry Peskov បាននិយាយកាលពីថ្ងៃព្រហស្បតិ៍ថា លោកប្រធានាធិបតី ពូទីន បានឲ្យកាដូជាកាំភ្លើងវែងមួយដើមដែលផលិតក្នុងប្រទេសរុស្ស៊ី និងជាផលិតផលមានគុណភាពល្អទៅដល់លោក គីម ។

លោក Peskov បានបញ្ជាក់ទៀតថា ចំណែកមេដឹកនាំកូរ៉េខាងជើងវិញក៏បានផ្ដល់កាដូជាកាំភ្លើងវែងទៅឲ្យលោក ពូទីន ផងដែរ ហើយក្រៅពីកាដូជាកាំភ្លើងវែង ប្រធានាធិបតីរុស្ស៊ីរូបនេះក៏បានឲ្យអំណោយជាស្រោមដៃនៃឈុតអវកាសរបស់អាកាសយានិកសម័យសូវៀតទៅឲ្យមេដឹកនាំកូរ៉េខាងជើងលោក គីម ជុងអ៊ុន ផងដែរ ។

ទន្ទឹមនោះ ការឲ្យកាដូជាកាំភ្លើងវែងក្នុងជំនួបលើកទី ២ នេះដែរ ត្រូវបានគេមើលឃើញថា លោក គីម គីម ពិតជាមេដឹកនាំមួយរូបដែលដឹងចិត្តលោក ពូទីន ដោយសារតែប្រធានាធិបតីរុស្ស៊ីរូបនេះ មានចំណាប់អារម្មណ៍យ៉ាងខ្លាំងពីចំពោះជីវិតនៅខាងក្រៅ ជាពិសេសគឺការបរបាញ់ ខណៈក្នុងរយៈពេលប៉ុន្មានឆ្នាំចុងក្រោយនេះ លោក ពូទីន តែងតែបង្ហោះរូបថតជាច្រើនសន្លឹកបង្ហាញអំពីដំណើរការបរបាញ់នៅតាមទីជនបទជាមួយមន្ត្រីជាន់ខ្ពស់ផ្សេងទៀត ។

គួរបញ្ជាក់ថា ជំនួបរវាងលោក គីម និងលោក ពូទីន កំពុងបង្កក្ដីព្រួយបារម្ភយ៉ាងខ្លាំងទៅដល់បណ្ដាប្រទេសលោកខាងលិចពាក់ព័ន្ធទៅនឹងការពង្រីកកិច្ចសហប្រតិបត្តិការយោធារវាងប្រទេសទាំងពីរ ជាពិសេសការរំពឹងទុករបស់ទីក្រុងព្យុងយ៉ាងក្នុងការបញ្ជូនគ្រាប់បន្ថែមទៀតទៅកាន់ទីក្រុងមូស្កូសម្រាប់ប្រើប្រាស់ក្នុងសង្គ្រាមនៅអ៊ុយក្រែន ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ លោក គីម ជុងអ៊ុន ទៅទស្សនារោងចក្រផលិតយន្តហោះចម្បាំង រុស្ស៊ី