ពលរដ្ឋជាង៣០នាក់ អះអាងថា ចាញ់បោកសាលាបង្រៀនបើកបរមួយ​ខាតអស់ប្រាក់ជាច្រើន

ទីស្នាក់ការបង្រៀនបើកបរដៃចំណាប់សាខាប្រចាំខេត្តរតនគិរី រងនូវការរិះគន់ពីសំណាក់ប្រជាពលរដ្ឋមួយចំនួននៅ​ក្នុងខេត្តថា ពួកគាត់បានចាញ់បោកអស់លុយជាច្រើនរយដុល្លារក្នុងម្នាក់ៗ ដោយសាលាបង្រៀន​បើកបរតម្រូវ​ឲ្យបង់លុយជាមុន និងចេញប័ណ្ណបើកបរឲ្យពួកគាត់តាមក្រោយ នៅពេលរៀនចប់ ប៉ុន្តែជាលទ្ធផលពីរនាក់ប្តីប្រពន្ធ ជាម្ចាស់សាលាបើកបរ បាននាំគ្នា​រត់គេចខ្លួនបាត់ស្រមោល។

លោក គា កេតុលា ជាជនរងគ្រោះក្នុងចំណោមមនុស្សជាង៣០នាក់ បានឲ្យអ្នកសារព័ត៌មានកម្ពុជាថ្មីដឹងនៅព្រឹកថ្ងៃទី១៦ ខែកញ្ញា ឆ្នាំ២០២៣នេះថា លោកទៅសាលាបង្រៀនបើកបរដៃចំណាប់ដែលមានទីស្នាក់ការនៅកណ្តាលក្រុងបានលុង មុននិងចូលរៀនបើកបរតម្រូវឲ្យបង់លុយមុនចំនួន២២០ដុល្លារ មានក្រដាសវិក័យប័ត្រត្រឹមត្រូវ។

លោក គា កេតុលា បានបញ្ជាក់ថា បញ្ហានេះ មិនមែនកើតឡើងតែរូបលោកម្នាក់នោះទេ មានពលរដ្ឋជាច្រើននាក់ទៀត ដោយក្នុងម្នាក់ៗអស់លុយដូចគ្នា។ អ្នករងគ្រោះរូបនេះ បានបន្តថា «ឥឡូវខ្ញុំ កំពុងតែរៀបចំប្រមូលស្នាមមេដៃ​ជនរងគ្រោះទាំងនោះ ដាក់ពាក្យបណ្តឹងទៅទីបញ្ជាការកងរាជអាវុធហត្ថខេត្ត ដើម្បីចាត់ការតាមនីតិវិធីច្បាប់»។

ទាក់ទិនបញ្ហាខាងលើនេះ កម្ពុជាថ្មី មិនអាចសុំការបំភ្លឺពីសាលាបង្រៀនបើកបរដៃចំណាប់បានទេ នៅរសៀលថ្ងៃទី១៦ ខែកញ្ញា ឆ្នាំ២០២៣នេះ។

ដោយឡែកលោក ឃឹម រមន្នី អនុប្រធានមន្ទីរសារធារណៈការ និងដឹកជញ្ជូនខេត្តរតនគិរី បានបញ្ជាក់ប្រាប់កម្ពុជាថ្មី តាមប្រព័ន្ធទូរស័ព្ទនៅរសៀលថ្ងៃទី១៦ ខែកញ្ញា ថា ពាក់ព័ន្ធនឹងបញ្ហានេះ លោកមិនទាន់បានទទួលព័ត៌មាននៅឡើយ ដោយលោកអះអាងថា នឹងបន្តយកចិត្តទុកដាក់លើបញ្ហានេះ៕

អត្ថបទ៖ វុទ្ធឦសាន