ព្រឹកនេះត្រីភាគីបន្តបើកកិច្ចប្រជុំលើកទី៥ដើម្បីកំណត់តួលេខចុងក្រោយប្រាក់ឈ្នួលកម្មករសម្រាប់ឆ្នាំ២០២៤

ក្រុមប្រឹក្សាជាតិប្រាក់ឈ្នួលអប្បបរមាអាណត្តិទី៣ រួមមានភាគីរដ្ឋាភិបាល ភាគីនិយោជក និងភាគីសហជីព នឹងបន្តបើកកិច្ចប្រជុំលើកទី៥នៅព្រឹកថ្ងៃទី១៨ ខែកញ្ញា ឆ្នាំ២០២៣នេះ ដើម្បីកំណត់តួលេខចុងក្រោយប្រាក់ឈ្នួលកម្មករសម្រាប់ឆ្នាំ២០២៤ ដែលគ្រោងនឹងបញ្ចប់នៅថ្ងៃទី២៨កញ្ញាខាងមុខ។

នេះជាលើកទី៥ហើយ ខណៈលើកទី១ត្រីភាគីបានរៀបចំប្រជុំនៅថ្ងៃទី១៦សីហា លើកទី២នៅថ្ងៃទី២៨សីហា លើកទី៣ នៅថ្ងៃទី៤កញ្ញា និងលើកទី៤នៅថ្ងៃទី១១កញ្ញាឆ្នាំ២០២៣ ក្នុងនោះភាគីនីមួយៗបានឈានដល់ការដាក់តួលេខរៀងៗខ្លួនដោយភាគីនិយោជកដាក់ចំនួន១ដុល្លារបន្ថែមលើប្រាក់ឈ្នួលបច្ចុប្បន្ន២០០ដុល្លារក្នុងមួយខែ ខណៈភាគីសហជីពដាក់១៥​ដុល្លារ។ ចំណែកភាគីរាជរដ្ឋាភិបាលនៅមិនទាន់ដាក់តួលេខនៅឡើយទេ។

កិច្ចប្រជុំលើកទី៥នេះគេរំពឹងថា ភាគីសហជីព និងភាគនិយោជក នឹងដាក់តួលេខចុងក្រោយ និងសំណូមពរមួយចំនួនដាក់ជូនរដ្ឋាភិបាលពិចារណា និងដោះស្រាយ។ ចំណែករាជរដ្ឋាភិបាលនឹងដាក់តួលេខមួយផងដែរដើម្បីឱ្យភាគីទាំងពីរពិនិត្យ និងពិចារណាដើម្បីធ្វើយ៉ាងណាស្វែងរកតួលេខរួមគ្នាមួយសម្រាប់ប្រកាសនៅថ្ងៃទី២៨កញ្ញាខាងមុខមុនកាលកំណត់ដែលតាមផែនការគ្រោងនឹងប្រកាសនៅថ្ងៃទី០២តុលាឆ្នាំ២០២៣។

ដើម្បីឆ្លើយតបតាមអនុសាសន៍របស់សម្តេចមហាបវរធិបតី ហ៊ុន ម៉ាណែត នាយកដ្ឋមន្ត្រីនៃព្រះរាជាណាចក្រកម្ពុជា ដែលបានណែនាំឱ្យក្រសួងការងារនិងបណ្តុះបណ្តាលវិជ្ជាជីវៈធ្វើយ៉ាងណាសម្របសម្រួលជាមួយភាគីនិយោជក និងភាគីសហជីពប្រកាសប្រាក់ឈ្នួលឱ្យបានមុនពិធីបុណ្យភ្ជុំបិណ្ឌទើបភាគីមួយៗបានខិតខំបញ្ចប់ការចចារប្រាក់ឈ្នួលឱ្យបាន​លឿនមុនកាលកំណត់ដោយបានឯកភាពគ្នាប្រកាសនៅថ្ងៃទី២៨កញ្ញាខាងមុខដើម្បីជាកាដូជូនដល់បងប្អូនកម្មករនិយោជិតមុននឹងធ្វើដំណើរទៅស្រុកកំណើតនៅក្នុងឱកាសពិធីបុណ្យភ្ជុំខាងមុខ៕

អត្ថបទ៖ សំអឿន