តើលោក ពូទីន ធ្លាប់អញ្ជើញទៅ កូរ៉េខាងជើង ដែរឬទេ?

បន្ទាប់ពីបញ្ចប់ដំណើរទស្សនកិច្ចរយៈពេល ៦ ថ្ងៃនៅប្រទេសរុស្ស៊ីរួចហើយ មេដឹកនាំកូរ៉េខាងជើងលោក គីម ជុងអ៊ុន ក៏បានអញ្ជើញប្រធានាធិបរុស្ស៊ីលោក វ្ល៉ាឌីមៀរ ពូទីន ឲ្យធ្វើដំណើរបំពេញទស្សនកិច្ចទៅកាន់ប្រទេសកូរ៉េខាងជើងវិញផងដែរ ។

ជាការឆ្លើយតប រដ្ឋាភិបាលទីក្រុងមូស្គូបានទទួលយកការអញ្ជើញនេះ ហើយប្រសិនបើលោក ពូទីន ពិតជាហោះទៅកាន់ប្រទេសកូរ៉េខាងជើងមែននោះ វាក៏មិនមែនជាលើកទីមួយដែរ ដែលប្រធានាធិបតីរុស្ស៊ីរូបនេះធ្វើដំណើរទៅកាន់ទីក្រុងព្យុងយ៉ាង ។

យោងតាមទីភ្នាក់ងារសារព័ត៌មានរដ្ឋកូរ៉េ KCNA បានរាយការណ៍ថា លោក ពូទីន ធ្លាប់ធ្វើដំណើរបំពេញទស្សនកិច្ចទៅកាន់ប្រទេសកូរ៉េខាងជើងម្ដងរួចមកហើយកាលពី ១៣ ឆ្នាំមុន ពោលក្នុងអំឡុងខែកក្កដា ឆ្នាំ២០០០ ។

ក្នុងអំឡុងដំណើរបំពេញទស្សនកិច្ចនោះលោក ពូទីន បានជួបជាមួយឪពុករបស់លោក គីម ជុងអ៊ុន គឺលោក គីម ជុងអ៊ីល ខណៈការអញ្ជើញទៅប្រទេសកូរ៉េខាងជើងនៅពេលនោះ កើតឡើងតែប៉ុន្មានខែប៉ុណ្ណោះ បន្ទាប់ពីលោកជាប់ឆ្នោតជាប្រធានាធិបតីរុស្ស៊ី ។

ចំណែកពាក់ព័ន្ធនឹងនឹងដំណើរទស្សនកិច្ចមកកាន់ប្រទេសរុស្ស៊ីរបស់លោក គីម ជុងអ៊ុន វិញ, បុរសនុយក្លេអ៊ែររូបនេះទទួលបានកាដូជាយន្តហោះដ្រូនបំផ្ទុះអត្តឃាតចំនួន ៥ គ្រឿង យន្តហោះដ្រូនស៊ើបការណ៍ “Geran-25” មួយគ្រឿង អាវការពារគ្រាប់កាំភ្លើង កាំភ្លើងវែងមួយដើម ក៏ដូចជារបស់របរផ្សេងទៀតផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Al Jazeera

ចុចអាន ៖ លោក គីម ជុងអ៊ុន បញ្ចប់ទស្សនកិច្ចនៅ រុស្ស៊ី ហើយត្រលប់ទៅ កូរ៉េខាងជើង វិញមិនមែនដោយដៃទទេ (មានវីដេអូ)