ក្រសួងយុត្តិធម៌សម្រេចចិត្តផ្អាកចំណាត់ការទៅតុលាការ ពាក់ព័ន្ធករណី លោក ព្រំ សាន មួយរយៈសិន

ក្រសួងយុត្តិធម៌សម្រេចចិត្តផ្អាកចំណាត់ការទៅតុលាការ ពាក់ព័ន្ធករណី លោក ព្រំ សាន បានប្រើប្រាស់គណនីហ្វេសប៊ុក ផ្សព្វផ្សាយព័ត៌មានមិនពិតដែលមានចរិតបរិហារកេរ្ដិ៍ក្រសួងយុត្តិធម៌ មួយរយៈសិន។ នេះ​បើតាមសំណេររបស់ លោក គឹម សន្តិភាព រដ្ឋលេខាធិការក្រសួងយុត្តិធម៌ នៅលើបណ្ដាញសង្គមហ្វេសប៊ុក នាល្ងាចថ្ងៃទី១៨ ខែកញ្ញានេះ។

លោក គឹម សន្តិភាព បានសរសេរនៅលើគណនីហ្វេសប៊ុកថា “ដោយទទួលបានគោលការណ៍ដឹកនាំរបស់ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ ខ្ញុំសូមបញ្ជាក់ជូនថាក្រសួងយុត្តិធម៌សម្រេចចិត្តផ្អាកចំណាត់ការទៅតុលាការពាក់ព័ន្ធករណីលោក ព្រំ សាន មួយរយៈពេលសិន”។

លោក គឹម សន្តិភាព បានបញ្ជាក់បន្ថែមថា ក្រសួងយុត្តិធម៌នឹងបន្តតាមដានរាល់ព័ត៌មានទាំងឡាយណាដែលមានចរិតជាការបរិហារកេរ្តិ៍លើស្ថាប័នរបស់រដ្ឋបែបនេះ។

សូមរំលឹកឡើងវិញថា មានបណ្តាញសង្គមហ្វេសប៊ុកមួយឈ្មោះ San Prum បានផ្សព្វផ្សាយនូវព័ត៌មានមួយដែលមានខ្លឹមសារថា «មានបញ្ហា ហើយក្រសួងយុត្តិធម៌? ឃឹម ភារុន ក្រោយពីចេញពីគុក បានប្រឡងជាប់ក្របខ័ណ្ឌប៉ូលីស តើព្រឹត្តិបត្រថ្កោលទោសចេញពីក្រសួងយុត្តិធម៌ បញ្ជាក់ (Certifier) ដូចម្តេច? មិនធ្លាប់មានទោសឬ? រឿងជាន់រឿងហើយ! មិនក្រោមពាន់ដុល្លារទេ !! ហាសៗៗ»។ តាមដឹងហាងឆេងបញ្ជាក់បែបនេះ (មិនដែលមានទោស)។

ភ្លាមៗ  នៅរសៀលថ្ងៃទី១៥​ខែកញ្ញា ក្រសួងយុត្តិធម៌បានចេញសេចក្ដីប្រកាសព័ត៌មានមួយច្បាប់  ដែលមានខ្លឹមសារថា ក្រសួងយុត្តិធម៌នឹងចាត់វិធានការផ្លូវច្បាប់លើករណី លោក ព្រំ សាន  ចំពោះការផ្សាយព័ត៌មានមិនពិត ដែលមានចរិតជាការបរិហារកេរ្ដិ៍លើស្ថាប័នរបស់រដ្ឋ៕

ដោយ៖ ង៉ិល ណារ៉ាត់