ព័ត៌មានអន្ដរជាតិ

ឥណ្ឌានិងកាណាដា តឹងសរសៃ.ក ដាក់គ្នា ពាក់ព័ន្ធការស្លាប់ មេដឹកនាំចលនាបំបែកខ្លួន

បានផុស

១ year មុន

នៅ

ថ្ងៃអង្គារ ១៩ កញ្ញា ២០២៣

ដោយ

រដ្ឋាភិបាលទីក្រុងញូវដែលីនៅថ្ងៃអង្គារទី១៩ខែកញ្ញា បានច្រានចោលការចោទប្រកាន់មិនសមហេតុផល របស់រដ្ឋាភិបាលកាណាដាដែលថា ភ្នាក់ងារឥណ្ឌា មានជាប់ពាក់ព័ន្ធក្នុងការសម្លាប់មេដឹកនាំចលនាបំបែកខ្លួន Khalistan លោក Hardeep Singh Nijjar ដែលជាពលរដ្ឋកាណាដា។

លោក Hardeep Singh Nijjar (រូបថត៖ SIKH PA)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Nijjar ដែលជាអ្នកគាំទ្រប្តូរផ្តាច់ចំពោះចលនា Khalistan ស្វែងរកឯករាជ្យនៅក្នុងតំបន់ Punjab នៃប្រទេសឥណ្ឌា ត្រូវបានគេបាញ់កាលពីថ្ងៃទី១៨ខែមិថុនា នៅខាងក្រៅមជ្ឈមណ្ឌលវប្បធម៌ Sikh ក្នុងទីក្រុង Surrey នៃខេត្ត British Columbia។

ការបដិសេធនេះកើតឡើង បន្ទាប់ពីរដ្ឋាភិបាលកាណាដា សម្រេចបណ្តេញអ្នកការទូតជាន់ខ្ពស់ឥណ្ឌាម្នាក់កាលពីថ្ងៃចន្ទ ខណៈទីក្រុងអូតាវ៉ាកំពុងស៊ើបអង្កេតលើអ្វីដែលលោកនាយករដ្ឋមន្ត្រី Justin Trudeau ចាត់ទុកជារឿងគួរឲ្យជឿជាក់ដែលថា រដ្ឋាភិបាលឥណ្ឌាអាចមានទំនាក់ទំនងជាមួយការសម្លាប់សកម្មជន Khalistani។

លោក Trudeau បានថ្លែងសុន្ទរកថាបន្ទាន់មួយទៅកាន់សមាជិកសភា នៅរសៀលថ្ងៃចន្ទទី១៨ខែកញ្ញា ដោយជូនដំណឹងដល់ពួកគេថា ភ្នាក់ងារសន្តិសុខកាណាដា បាននិងកំពុងបន្តពិនិត្យការចោទប្រកាន់ដ៏គួរឲ្យជឿជាក់ នៃទំនាក់ទំនងរវាងភ្នាក់ងាររបស់រដ្ឋាភិបាលឥណ្ឌា និងការសម្លាប់លោក Nijjar នៅលើទឹកដីកាណាដា។

លោក Justin Trudeau (ឆ្វេង) និងលោក Modi (រូបថត៖ outlookindia)

ទោះបីជាយ៉ាងណាក៏ដោយ ជាការឆ្លើយតប ក្រសួងការបរទេសឥណ្ឌាបានចេញសេចក្តីថ្លែងការណ៍មួយថា “ការចោទប្រកាន់អំពីការជាប់ពាក់ព័ន្ធរបស់រដ្ឋាភិបាលឥណ្ឌា ក្នុងអំពើហិង្សាណាមួយនៅប្រទេសកាណាដា គឺជារឿងមិនសមហេតុផលទាល់តែសោះ និងមានរឿងនៅពីក្រោយខ្នង។ ការចោទប្រកាន់មិនច្បាស់លាស់បែបនេះ គ្រាន់តែជាការព្យាយាមបង្វែរចំណាប់អារម្មណ៍ពីក្រុមភេរវករ Khalistani និងពួកជ្រុលនិយម ដែលត្រូវបានផ្តល់ជម្រកនៅក្នុងប្រទេសកាណាដា និងបន្តគំរាមកំហែងដល់អធិបតេយ្យ និងបូរណភាពទឹកដីរបស់ប្រទេសឥណ្ឌាប៉ុណ្ណោះ។ ភាពអសកម្មរបស់រដ្ឋាភិបាលកាណាដាលើបញ្ហានេះ គឺជាក្តីព្រួយបារម្ភជាយូរមកហើយ”។

សូមបញ្ជាក់ថា កាលពីព្រឹកថ្ងៃចន្ទ រដ្ឋមន្ត្រីការបរទេសកាណាដា លោកស្រី Melanie Joly បានប្រកាសបណ្តេញប្រមុខចារកម្មឥណ្ឌា នៅក្នុងប្រទេសកាណាដា ដោយសារតែការចោទប្រកាន់ថា ឥណ្ឌាមានជាប់ពាក់ព័ន្ធក្នុងការវាយប្រហារនោះ ។ លោកស្រីនិយាយថា “ប្រសិនបើរឿងនេះពិតមែននោះ វានឹងក្លាយជាការរំលោភលើអធិបតេយ្យរបស់យើង”៕

ប្រែសម្រួល៖ Vann Vann

ប្រភព៖ RT

ចុចអាន៖ កាណាដា គំរាមពិន័យហាងផ្គត់ផ្គង់គ្រឿងទេសណា ដែលលក់ថ្លៃជ្រុល មិនគិតដល់ប្រជាជន