ត្រឹម៩ខែក្នុងឆ្នាំ២០២៣ អាមេរិក មានការបាញ់ប្រហារទ្រង់ទ្រាយធំ ជាង៥០០លើក

គិតត្រឹមថ្ងៃអាទិត្យទី១៧ខែកញ្ញា ចំនួននៃការបាញ់ប្រហារទ្រង់ទ្រាយធំនៅសហរដ្ឋអាមេរិក បានកើនលើស៥០០ដងហើយ ពោលគឺជាមធ្យម មានការបាញ់ប្រហារទ្រង់ទ្រាយធំស្ទើរតែពីរដង ក្នុងមួយថ្ងៃ។ នេះបើយោងតាមអង្គការអំពើហិង្សាកាំភ្លើង (GVA)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃអាទិត្យ នាយកដ្ឋានប៉ូលិសក្រុង Denver បានបង្ហោះសេចក្តីជូនដំណឹងនៅលើបណ្តាញសង្គម X ដោយបញ្ជាក់ពីការបាញ់ប្រហារមួយ ដែលបណ្តាលឲ្យមនុស្ស ៥នាក់រងរបួស ដែលនោះជាឧបទ្ទវហេតុលើកទី៥០០ ក្នុងឆ្នាំ២០២៣នេះ។

ប៉ុន្មានម៉ោងក្រោយមក ប៉ូលិស El Paso បានរាយការណ៍ថា ពួកគេកំពុងស៊ើបអង្កេតការបាញ់ប្រហារនៅ East El Paso ដែលឆក់យកជីវិតបុរសអាយុ១៩ឆ្នាំម្នាក់ និងធ្វើឲ្យមនុស្ស៥នាក់ទៀតរងរបួស នាំឲ្យចំនួននៃការបាញ់ប្រហារទ្រង់ទ្រាយធំសរុប កើនដល់៥០១ដង។

យោងតាមគេហទំព័រ GVA បានឲ្យដឹងថា ការបាញ់ប្រហារទ្រង់ទ្រាយធំ គឺត្រូវបានកំណត់ចំពោះឧបទ្ទវហេតុមួយ ដែលមានមនុស្សស្លាប់និងរបួសចាប់ពី៤នាក់ឡើង ប៉ុន្តែមិនរាប់បញ្ចូលខ្មាន់កាំភ្លើងនោះទេ។

២០២១ គឺជាឆ្នាំដែលសហរដ្ឋអាមេរិក កត់ត្រាតួលេខនៃការបាញ់ប្រហារទ្រង់ទ្រាយធំ ​ច្រើន​បំផុត​ក្នុង​ប្រវត្តិសាស្ត្រ​ ដោយ​មាន​ឧប្បត្តិហេតុ​ចំនួន៦៨៩លើក ហើយមកដល់ឆ្នាំ២០២២ ថ្វីបើតួលេខបាន​ធ្លាក់​ចុះ​ដល់៦៤៧លើកក៏ដោយ ប៉ុន្តែទិន្នន័យ FBI ​បង្ហាញ​ថា ចំនួន​អ្នក​ស្លាប់​និង​របួស មានការកើនឡើងវិញ។

ថ្មីៗនេះ មជ្ឈមណ្ឌលជាតិសម្រាប់ស្ថិតិអប់រំ (NCES) ក៏បានចេញផ្សាយរបាយការណ៍ឧក្រិដ្ឋកម្ម និងសុវត្ថិភាពប្រចាំឆ្នាំរបស់ខ្លួនផងដែរ ដែលបង្ហាញពីការបាញ់ប្រហារនៅសាលារៀនចំនួន ១៨៨លើក ខណៈការស្លាប់និងរបួសក្នុងឆ្នាំសិក្សា២០២១-២០២២ បានកើនឡើងលើសឆ្នាំសិក្សាមុននោះ ដល់ទៅជាងទ្វេដងឯណោះ។

ដោយឡែក ការសិក្សាមួយដែលចេញផ្សាយដោយទស្សនាវដ្តី Annals of Internal Medicine ក្នុងខែកុម្ភៈបង្ហាញថា មនុស្សមានសិទ្ធិកាន់កាំភ្លើង បានកើនឡើងខ្លាំងក្នុងរយៈពេលប៉ុន្មានឆ្នាំថ្មីៗនេះ ដោយមនុស្សពេញវ័យចំនួន ៧.៥លាននាក់ បានក្លាយជាម្ចាស់កាំភ្លើងថ្មីនៅចន្លោះខែមករាឆ្នាំ២០១៩ ដល់ខែមេសាឆ្នាំ ២០២១៕

ប្រែសម្រួល៖ Vann Vann

ប្រភព៖ RT

ចុចអាន៖ ត្រឹម១២៨ថ្ងៃនៃឆ្នាំ២០២៣ អាមេរិក មានការបាញ់ប្រហារសម្លាប់រង្គាល២០១លើក ស្លាប់មនុស្សជាង ១៤០០០នាក់