លោក Zelensky ប្រាប់ឲ្យ រុស្ស៊ី បញ្ឈប់សង្គ្រាម ទើបពិភពលោកអាចទប់ទល់បញ្ហាអាកាសធាតុ និងវិបត្តិផ្សេងៗ

ប្រធានាធិបតីអ៊ុយក្រែនលោក Volodymyr Zelensky កាលពីថ្ងៃអង្គារបានអង្វរមេដឹកនាំពិភពលោកដែលបានជួបប្រជុំគ្នានៅឯមហាសន្និបាតអង្គការសហប្រជាជាតិ ឲ្យឈររួបរួមគ្នាប្រឆាំងនឹងការលុកលុយរបស់រុស្ស៊ី ហើយលោកថែមទាំងប្រាប់ដល់ទីក្រុងមូស្គូឲ្យបញ្ឈប់សង្រ្គាមមួយនេះទៅ ទើបពិភពលោកអាចដោះស្រាយបញ្ហាប្រឈមជាសកលបាន ។

លោក Zelensky បានថ្លែងក្នុងមហាសន្និបាតអង្គការសហប្រជាជាតិថា “អ៊ុយក្រែនកំពុងធ្វើអ្វីគ្រប់យ៉ាងដើម្បីធានាថា បន្ទាប់ពីសង្គ្រាមលុកលុយរបស់រុស្ស៊ីហើយ នឹងមិនមានប្រទេសណានៅលើពិភពលោក ហ៊ានវាយប្រហារប្រទេសផ្សេងទៀតនោះទេ” ។

ប្រធានាធិបតីអ៊ុយក្រែនរូបនេះបញ្ជាក់ទៀតថា “ការ​ប្រើ​អាវុធ​ត្រូវ​តែចាប់​ឃាត់​ទុក ឧក្រិដ្ឋកម្ម​សង្គ្រាម​ត្រូវ​តែ​ទទួល​ទោស អ្នក​ដែល​ត្រូវ​និរទេស​ត្រូវ​តែ​ត្រឡប់​មក​ស្រុក​វិញ ហើយ​អ្នក​លុកលុយ​ត្រូវ​តែ​ត្រឡប់​ទៅផ្ទះ​វិញ ជាពិសេសយើងត្រូវតែរួបរួមគ្នាដើម្បីធ្វើវាឲ្យបាន” ។

ទន្ទឹមនោះ ការអំពាវនាវរបស់លោក Zelesnky ក៏កើតមានឡើង ស្របពេលដែលវិបត្តិអាកាសធាតុ និងគ្រោះមហន្តរាយធម្មជាតិកាន់តែអាក្រក់ទៅៗផងដែរ ជាពិសេសការរញ្ជួយដីនាពេលថ្មីៗនេះនៅប្រទេសម៉ារ៉ុក ក៏ដូចជាទឹកជំនន់នៅប្រទេសលីប៊ីជាដើម ។

លោកបានសង្កត់ធ្ងន់ថា “យើងត្រូវតែបញ្ឈប់សង្គ្រាមរបស់រុស្ស៊ី ។ យើងត្រូវធ្វើសកម្មភាពរួមគ្នាដើម្បីកម្ចាត់អ្នកបង្កសង្គ្រាម ហើយយកពេលនោះងាកមកផ្តោតលើសមត្ថភាព និងថាមពលដែលយើងមានទាំងអស់បញ្ចេញលើការដោះស្រាយបញ្ហាប្រឈមទាំងនេះ ទើបវាប្រសើរជាង” ។

គួរបញ្ជាក់ថា នេះគឺជាការចូលប្រជុំផ្ទាល់លើកដំបូងរបស់លោក Zelensky ក្នុងសម័យប្រជុំនៃមហាសន្និបាតរបស់អង្គការសហប្រជាជាតិលើក ៧៨ ខណៈកាលពីឆ្នាំមុន ប្រធានាធិបតីអ៊ុយក្រែនរូបនេះថ្លែងសារតាមរយៈវីដេអូប៉ុណ្ណោះ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ រុស្ស៊ី ថា លោក Zelensky ទៅ អាមេរិក ដើម្បីសុំលុយពីលោកខាងលិច