ព័ត៌មានជាតិ

អភិបាលខេត្តកោះកុង កែសម្រួលសមាសភាពអនុគណៈកម្មាធិការដោះស្រាយជនអនាថា

បានផុស

១ year មុន

នៅ

ថ្ងៃព្រហស្បតិ៍ ២១ កញ្ញា ២០២៣

ដោយ

លោកស្រី មិថុនា ភូថង អភិបាលខេត្តកោះកុង បានចេញសម្រេចកែសម្រួលសមាសភាពអនុគណៈកម្មាធិការដោះស្រាយជនអនាថាចំនួន ១៨ ដើម្បីដោះស្រាយបញ្ហាជនអនាថា រួមនឹងការបញ្ចូលស្តារនីតិសម្បទាក្នុងសហគមន៍ និងបង្ការទប់ស្កាត់ការវិលត្រឡប់មកសុំទានវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈលិខិតផ្លូវការរបស់លោកស្រី មិថុនា ភូថង អភិបាលខេត្តកោះកុង កាលពីថ្ងៃទី ១៨ ខែកញ្ញា ឆ្នាំ ២០២៣ កន្លងទៅ បានបង្ហាញថា សមាសភាពអនុគណៈកម្មាធិការដោះស្រាយជូនអនាថាត្រូវធានាបាននូវការទប់ស្កាត់នូវលំហូរជនអនាថាចូលទីក្រុង ទីប្រជុំជន និងឆ្លងដែនចេញចូលទៅប្រទេសជិតខាង ការគ្រប់គ្រង និងដោះស្រាយបញ្ហាជនអនាថាទូទាំងខេត្តកោះកុង ស្របតាមគោលនយោបាយសេវាសង្គមកិច្ច ការបណ្ដុះបណ្ដាលវិជ្ជាជីវៈ និងការធ្វើសមាហរណកម្មចូលទៅក្នុងសហគមន៍ឡើងវិញ។

លោកស្រីអភិបាលខេត្ត ក៏ណែនាំឲ្យបង្កើតយុទ្ធសាស្ត្ររួមសម្រាប់ដោះស្រាយបញ្ហាជនអនាថាផងដែរ ដោយពង្រឹងពង្រីកបណ្តាញការពារ ការងារសម្រាប់ជនរងគ្រោះទាំងនោះគ្រប់លំដាប់ថ្នាក់ ដើម្បីផ្តល់សេវាដល់ពួកគេឲ្យមានលំនឹងក្នុងកសាងជីវភាពរស់នៅដោយខ្លួនឯង។

លោកស្រី មិថុនា ភូថង បន្ថែមថា ការផ្តល់ជាជម្រកសុវត្ថិភាព ស្នាក់នៅបណ្ដោះអាសន្ន ដើម្បីទទួលបានការផ្គត់ផ្គង់ជីវភាព ថែទាំសុខភាព អប់រំ បណ្ដុះបណ្ដាលវិជ្ជាជីវៈរយៈពេលខ្លី និងដឹកជញ្ជូនជនទាំងនោះឲ្យបានដល់មូលដ្ឋានគោលដៅរស់នៅអចិន្ត្រៃយ៍របស់ពួកគាត់វិញ។

អ្វីដែលសំខាន់នោះ សមាសភាពអនុគណៈកម្មាធិការ ត្រូវកសាងផែនការថវិកាប្រចាំឆ្នាំ សម្រាប់ចំណាយលើការងារផ្តល់សេវាដល់ជនអនាថា ដោយបញ្ចូលក្នុងខ្ទង់ចំណាយថវិការបស់មន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត និងទំនាក់ទំនងស្វែងរកថវិកាពីប្រភពផ្សេងៗទៀត។ មិនត្រឹមតែប៉ុណ្ណោះទេ គប្បីរួមគ្នាពិនិត្យ និងវាយតម្លៃលទ្ធផលអនុវត្តគោលការណ៍ផែនការកម្មវិធី និងគម្រោងនានា ព្រមទាំងគ្រប់គ្រងស្ថិតិ និងបូកសរុបលទ្ធផលការងារដោះស្រាយជនអនាថាប្រចាំឆ្នាំជូនគណៈកម្មាធិការជាតិដោះស្រាយបញ្ហាជនអនាថា។

បញ្ហានេះ លោក គង់ សំរិទ្ធ ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត ថ្លែងថា បញ្ហាជនអនាថានៅក្នុងខេត្តកោះកុង ភាគច្រើនមានប្រភពមកខាងក្រៅខេត្តដែលធ្វើសកម្មភាពសុំថវិកាពីប្រជាពលរដ្ឋតាមទីសាធារណៈ។

លោក គង់ សំរិទ្ធ អះអាងដែរថា ចំពោះតួលេខ គឺមិនទាន់គ្រប់គ្រងស្ថិតិ គ្រាខេត្តពុំមានមណ្ឌលសុំចតសម្រាប់ទុកដាក់ថែរក្សាពួកគាត់ ដោយលោកគ្រោងសុំគោលការណ៍ពីថ្នាក់ដឹកនាំក្រសួងរៀបចំបង្កើតជាមណ្ឌលសុំចិត្តនេះឡើងវិញ ព្រោះមន្ទីរមានដីសម្រាប់កសាងរួចរាល់ហើយដែរ៕

អត្ថបទ ៖ សិរីវឌ្ឍនៈ