ប្រមុខណាតូ ថា បើ អាមេរិក ចង់ដោះស្រាយបញ្ហាជាមួយ ចិន ត្រូវឲ្យលោក ពូទីន ចាញ់សង្គ្រាម អ៊ុយក្រែន

អគ្គលេខាធិការអង្គការណាតូលោក Jens Stoltenberg បាននិយាយកាលពីថ្ងៃព្រហស្បតិ៍ថា “ប្រសិនបើសហរដ្ឋអាមេរិកចង់ងាកទៅរកតំបន់អាស៊ី ប៉ុន្តែនៅភ័យខ្លាចពីប្រទេសចិននោះ រដ្ឋាភិបាលទីក្រុងវ៉ាស៊ីនតោនត្រូវតែធ្វើយ៉ាងណាឲ្យលោកប្រធានាធិបតីរុស្ស៊ី វ្ល៉ាឌីមៀរ ពូទីន ចាញ់សង្គ្រាមនៅអ៊ុយក្រែន” ។

លោក Stoltenberg បានប្រាប់ក្រុមប្រឹក្សាទំនាក់ទំនងបរទេសរបស់អាមេរិកនៅខាងក្រៅមហាសន្និបាតអង្គការសហប្រជាជាតិក្នុងទីក្រុងញូវយ៉កថា  “ភារកិច្ចចម្បង” របស់ណាតូក្នុងសប្តាហ៍នេះគឺដើម្បីប្រមូលការគាំទ្របន្ថែមទៀតសម្រាប់អ៊ុយក្រែនក្នុងសង្គ្រាមប្រឆាំងនឹងរុស្ស៊ី ។

ប្រមុខអង្គការណាតូបានលើកឡើងទៀតថា សេណារីយ៉ូបែបនេះចង់សំដៅដល់កងទ័ពធំបំផុតទី ២ នៅអឺរ៉ុប គឺអ៊ុយក្រែនឲ្យមកឈរនៅខាងយើង ។ បន្ទាប់​ពីរឿងនេះកើតឡើងហើយ កម្លាំងទ័ពរុស្ស៊ីនឹងចុះខ្សោយ ហើយអឺរ៉ុបនឹងបង្កើនការចំណាយលើវិស័យការពារជាតិដល់ទីក្រុងកៀវ ។

ជាចុងក្រោយលោក Stoltenberg បញ្ជាក់ថា រឿងរ៉ាវទាំងអស់នេះហើយ នឹងធ្វើឲ្យសហរដ្ឋអាមេរិកមានភាពងាយស្រួល និងមានពេលវេលាគ្រប់គ្រាន់ក្នុងការផ្តោតសំខាន់លើប្រទេសចិន ខណៈប្រទេសជាសមាជិកអង្គការណាតូទាំងអស់ក៏ចាំតែគាំទ្រពីខាងក្រោយផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ ដូណាល់ ត្រាំ ថា លោកនឹងកេនទាហានទៅព្រំដែន អាមេរិក-ម៉ិកស៊ិក បើជាប់​ឆ្នោតសាជាថ្មី