​តម្លៃស្វាយកែវរមៀតផ្ដើមល្អប្រសើរឡើងវិញ​ ក្រោយការត្អូញត្អែររបស់ម្ចាស់ចម្ការ

តម្លៃស្វាយកែវរមៀតផ្ដើមល្អប្រសើឡើងវិញនារដូវប្រមូលផលលើកទី២នេះដែលមានតម្លៃ ១ គីឡូ ២​ ០០០​រៀល ដែលជាតម្លៃល្អសម្រាប់កសិករ ខណៈឆ្នាំ កន្លងទៅ ​កសិករបេះលក់ចេញ​មិនបានគិត​ទៅដល់ស្ដង់ដា ធ្វើឱ្យឈ្មួញទម្លាក់តម្លៃ។

​លោក អួន ស៊ីឡុត ​ប្រធានសមាគមស្វាយចន្ទី និងជាអ្នកធ្វើការពាក់ព័ន្ធលើដំណាំស្វាយដែរនោះ បានឱ្យដឹងថា បញ្ហារាល់ឆ្នាំដែលបានកើតឡើង​ដោយសារប្រជាពលរដ្ឋបេះស្វាយលក់​មិនបាន​គិត​ទៅ​ដល់ស្ដង់ដា​ ខណៈរូបលោកបានសំណូមពរឱ្យកសិករចេះបែងចែកឱ្យបានត្រឹមត្រូវ​រវាងស្វាយ​ខៀវ​ ស្វាយរោងចក្រ និងស្វាយសម្រាប់ការនាំចេញ បើពុំនោះទេតម្លៃនឹងធ្លាក់ទៀត។

ទោះយ៉ាងណាម្ចាស់ចម្ការមួយចំនួន កាលពីថ្ងៃទី ២០ ខែកញ្ញា កន្លងទៅនេះ បានត្អូញត្អែរនៅរដូវប្រមូលផលនៃតម្លៃស្វាយកែវរមៀតបានធ្លាក់ចុះ តម្លៃ ២.៥០០រៀល នៅសល់តែត្រឹម ១ គីឡូក្រាមនៅតម្លៃ ១.២០០រៀល សម្រាប់ស្វាយលេខ១ រីឯស្វាយរមៀតខៀវនៅតែត្រឹម ៥០០ ទៅ៦០០រៀលក្នុង១គឺឡូក្រាម។

បើតាមការលើកឡើងពីម្ចាស់ចម្ការផ្តាល់បានឲ្យដឹងថា​ បើដំណាំស្វាយកែវរមៀតក្នុងតម្លៃនេះ បើសិនបូកដកទៅវានិងស្មើដើម ឬខាតបន្តិចបន្តួច នេះសម្រាប់តែម្ចាស់ចម្ការផ្ទាល់ខ្លួនឯង បើសិនជាអ្នកជួលដីគេធ្វើចម្ការវិញនោះក្នុងការចំណាយដើមផ្សេងៗ​ និងតម្លៃនេះវាមិនអាចទប់ទល់បាននោះឡើយដោយសារស្វាយធ្លាក់ចុះ។

លោក យង់ ង៉ែត ជាអ្នកម្ចាស់ចម្ការដែលមានចម្ការនៅក្នុងភូមិសាស្រ្តឃុំពងទឹកស្រុកដំណាក់ចង្អើរខាងលើបានឲ្យដឹងថាលោកមានដំណាំស្វាយជិត ១ ពាន់ដើមលោកលើកឡើងថា កន្លងមកយ៉ាងហោចណាស់ស្វាយលេខ ១ បាន១គីឡូ​ក្រាម ក្នុងតម្លៃបាន១,៥០០រៀលឡើងទៅក្នុងមួយគីឡូក្រាមទើបហៅថាបានចំណេញខ្លះៗ។

យោងតាមរបាការណ៍របស់អគ្គនាយកដ្ឋានកសិកម្មបង្ហាញថា គិតត្រឹមរយៈពេល៨ខែក្នុងឆ្នំា២០២៣នេះផ្លែស្វាយស្រស់របស់កម្ពុជាបាននាំចេញមានជាង៩,៥ម៉ឺនតោន ធ្លាក់ចុះជាង២១% បើប្រៀបធៀបទៅនឹងរយៈពេលដូចគ្នាក្នុងឆ្នាំ​២០២២៕