គ្រឹះស្ថានធនាគារ និងហិរញ្ញវត្ថុ ផ្ដល់ឥណទានដល់វិស័យសេដ្ឋកិច្ច ប្រមាណ ៥៧,៨ ប៊ីលានដុល្លារ

គិតត្រឹមឆមាសទី១ ឆ្នាំ២០២៣ នេះ ឥណទានផ្តល់ដោយគ្រឹះស្ថានធនាគារ និងហិរញ្ញវត្ថុ តាមវិស័យសេដ្ឋកិច្ចមានចំនួន ប្រមាណ ២៣៨,៧ ទ្រីលានរៀល ស្មើនឹង ៥៧,៨ ប៊ីលានដុល្លារអាមេរិក បានកើនឡើង ១០,៥% ធៀបនឹងគ្រាដូចគ្នា ឆ្នាំមុន។ នេះបើតាមធនាគារជាតិនៃកម្ពុជា។

យោងតាមការចេញផ្សាយរបស់ធនាគារជាតិនៃកម្ពុជា ចំពោះឥណទានទាំងនេះ គ្របដណ្តប់លើវិស័យជួញដូរដុំ និងរាយ ការទិញផ្ទះជាកម្មសិទ្ធិផ្ទាល់ខ្លួន កសិកម្ម សេវាកម្ម អចលនទ្រព្យ សំណង់ អង្គភាពគ្រួសារ កម្មន្តសាល និងឥណទាន ផ្សេងៗ ជាដើម។

តាមប្រភពដដែលបានបង្ហាញទិន្នន័យនៃការជួញដូរដុំ និងរាយមានចំនួន ៥៩,៥ ទ្រីលានរៀល មានកំណើន ១១,៣ ភាគរយ និងការទិញផ្ទះជាកម្មសិទ្ធិផ្ទាល់ខ្លួន ២៨,៦ ទ្រីលានរៀល មានកំណើន ១៥,៦ ភាគរយ នេះបើធៀបរយៈពេល ដូចគ្នាកាលពីឆ្នាំមុន។

វិស័យកសិកម្ម ២២,៧ ទ្រីលានរៀល កើនឡើង ១២ ភាគរយ, សេវាកម្ម ២២ ទ្រីលានរៀល កើនឡើង ៣,១ ភាគរយ, អចលនទ្រព្យ ១៩,៦ ទ្រីលានរៀល កើនឡើង ១៦ ភាគរយ, វិស័យសំណង់ ១៨,៣ ទ្រីលានរៀល មានកំណើន ៩,៤ ភាគរយ , និងវិស័យកម្មន្តសាល ៨,៧ ទ្រីលានរៀល មានកំណើន ២០,៥ ភាគរយ៕

អត្ថបទ៖ ផល ធារិត