អ៊ុយក្រែន អះអាងសម្លាប់មន្ត្រីរុស្ស៊ី ៣៤នាក់ រួមទាំង មេទ័ព​សមុទ្រ​ខ្មៅ ដោយបាញ់មីស៊ីល ពេលពួកគេកំពុងប្រជុំ

ប្រទេសអ៊ុយក្រែន​បាន​អះអាងកាលពីថ្ងៃចន្ទទី២៥ខែកញ្ញា​ថា ខ្លួន​បាន​សម្លាប់​មេបញ្ជាការ​កង​នាវា​សមុទ្រ​ខ្មៅ ​របស់​រុស្ស៊ី​ គឺឧត្តមនាវីឯក Viktor Sokolov ក្នុង​ការ​វាយ​ប្រហារ​ដោយ​មីស៊ីល​លើ​ទីស្នាក់ការ​ទ័ព​ជើង​ទឹក​របស់​លោក វ្ល៉ាឌីមៀរ ពូទីន នៅ​ឧបទ្វីប​គ្រីមៀ កាលពី​សប្តាហ៍​មុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅថ្ងៃសៅរ៍ទី២៣ខែកញ្ញា មីស៊ីលអ៊ុយក្រែន បានធ្លាក់លើអគារក្នុងទីក្រុង Sevastopol ខណៈក្រោយមកក៏មានវីដេអូបង្ហាញពីផ្សែងខ្មៅ ខ្មួលខ្មាញ់ចេញពីអគារ។

កងកម្លាំងពិសេសអ៊ុយក្រែន និយាយក្នុងសេចក្តីថ្លែងការណ៍មួយ លើប្រព័ន្ធផ្សព្វផ្សាយសង្គមថា “មន្ត្រី៣៤នាក់ត្រូវបានសម្លាប់ រួមទាំងមេបញ្ជាការកងនាវាចរសមុទ្រខ្មៅអាយុ ៦១ឆ្នាំ ផងដែរ ខណៈមន្ត្រី​១០៥​នាក់​ផ្សេង​ទៀត​ ​រង​របួស” ។

យោងតាមកងទ័ពអ៊ុយក្រែន, ការវាយប្រហារនេះ គឺប្រើមីស៊ីល Storm Shadow ដែលផ្គត់ផ្គង់ដោយចក្រភពអង់គ្លេស និងបារាំង ហើយកើតឡើងក្នុងអំឡុងពេលនៃកិច្ចប្រជុំ ភាពជាអ្នកដឹកនាំរបស់កងទ័ពជើងទឹករុស្ស៊ី។

ក្នុង​ចំណោម​អ្នក​ដែល​ត្រូវ​បាន​គេ​ជឿ​ថា​​រង​របួស​ធ្ងន់ ឬ​ស្លាប់​នោះ ក៏រួម​មានទាំង​វរសេនីយ៍ឯក Alexander Romanchuk ជា​មេ​បញ្ជាការ​ដឹកនាំ​កង​កម្លាំង​របស់​វិមាន​ក្រឹមឡាំង​ នៅ​ភាគ​ខាង​ត្បូង​អ៊ុយក្រែនផងដែរ។

លើសពីនេះ ឧត្តមសេនីយ៍ឯក Oleg Tsekov ដែលជាមេបញ្ជាការកងកម្លាំងជើងគោក មានមូលដ្ឋាននៅតំបន់អាក់ទិកនៃប្រទេសរុស្ស៊ី គឺត្រូវបានគេរាយការណ៍ រងរបួសធ្ងន់។

ទោះបីជាយ៉ាងណាក៏ដោយ នេះគ្រាន់តែជាការអះអាងពីអ៊ុយក្រែនតែម្ខាងប៉ុណ្ណោះ ហើយភាគីរុស្ស៊ី មិនទាន់ចេញសេចក្តីថ្លែងការណ៍បញ្ជាក់ច្បាស់ណាមួយ នៅឡើយទេ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ អ៊ុយក្រែន វាយប្រហារមីស៊ីលនៅគ្រីមៀ ចំពេលមេទ័ពជើងទឹករុស្ស៊ី កំពុងប្រជុំ