សមាជិកព្រឹទ្ធសភាបក្សប្រឆាំង អាមេរិក ថា វិបត្តិជនចំណាកស្រុកនឹងកម្ទេច ទីក្រុងញូវយ៉ក

សមាជិកព្រឹទ្ធសភាមកពីគណបក្សសាធារណរដ្ឋ លោក Lindsey Graham បាននិយាយកាលពីថ្ងៃពុធថា លំហូរនៃជនចំណាកស្រុកដែលមិនមានឯកសារស្របច្បាប់ ចូលមកកាន់ទឹកដីទីក្រុងញូវយ៉ករបស់សហរដ្ឋអាមេរិក នឹងកម្ទេចទីក្រុងមួយនេះ ជាពិសេសនឹងបង្កើតឲ្យមានវិបត្តិហិរញ្ញវត្ថុ ។

លោក Graham បាននិយាយក្នុងអំឡុងសន្និសីទសារព័ត៌មានមួយថា “ទីក្រុងញូវយ៉កនឹងជួបប្រទះវិបត្តិផ្នែកហិរញ្ញវត្ថុដូចជួបរលកយក្សស៊ូណាមិ ដោយសាររតែការសម្រុកចូលមករបស់ជនចំណាកស្រុក ហើយវានឹងបំផ្លាញទីក្រុងញូវយ៉កតែម្ដង” ។

រហូតមកដល់ពេលនេះ អភិបាលរដ្ឋតិចសាស់ លោក Greg Abbott ក្រោមការដឹកនាំដោយគណបក្សប្រជាធិបតេយ្យ បានបើកដៃឲ្យជនចំណាកស្រុកប្រមាណ ៥០,០០០ នាក់ចូលមកជ្រកកោនក្នុងទីក្រុងសំខាន់ៗជាច្រើននៅទូទាំងសហរដ្ឋអាមេរិក ។ ក្នុងនោះ ១៥,៣០០ នាក់ទៅកាន់ទីក្រុងញូវយ៉ក និង ១២,០០០ នាក់ទៅកាន់ទីក្រុងវ៉ាស៊ីនតោនឌីស៊ី ខណៈទីក្រុងផ្សេងទៀតរួមមាន Chicago, Philadelphia, Denver, និង Los Angeles ។

ពាក់ព័ន្ធនឹងបញ្ហានេះដែរ ប្រភពគយ និងការពារព្រំដែនអាមេរិក (CBP) បានបញ្ជាក់ប្រាប់សារព័ត៌មាន Sputnik នៅសប្តាហ៍នេះថា ចំនួនជនចំណាកស្រុកសរុបដែលឆ្លងចូលសហរដ្ឋអាមេរិកដោយខុសច្បាប់ តាមព្រំដែនអាមេរិក-ម៉ិកស៊ិក បានកើនឡើងដល់កំណត់ត្រាថ្មីមួយសម្រាប់ឆ្នាំសារពើពន្ធ ២០២៣ ពោលឈានដល់ជិត ២.៤ លាននាក់ ។

គួរបញ្ជាក់ថា តួលេខនេះគឺជាឆ្នាំទី ៣ ជាប់ៗគ្នាហើយដែលរដ្ឋបាលរបស់លោប្រធានាធិបតី Joe Biden មានលំហូរដ៏ច្រើននៃជនចំណាកស្រុកខុសច្បាប់ឆ្លងកាត់ព្រំដែនភាគខាងត្បូងរបស់សហរដ្ឋអាមេរិក ខណៈកាលពីឆ្នាំ ២០២១ មានចំនួន ១.៧ លាននាក់ និង ២.៣ លាននាក់ក្នុងឆ្នាំ ២០២២ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ប៉ូឡូញ ចាប់ផ្ដើមខ្ចីលុយ អាមេរិក ដើម្បីធ្វើទំនើបកម្មយោធា ក្រោយប្រកាស លែងផ្ដល់អាវុធឲ្យ អ៊ុយក្រែន