នាយករដ្ឋមន្ត្រីស្នើឱ្យអភិបាលរាជធានី-ខេត្ត ត្រៀមសង្គ្រោះប្រជាពលរដ្ឋរងគ្រោះដោយសារទឹកជំនន់

សម្ដេធិបតី ហ៊ុន ម៉ាណែត នាយករដ្ឋមន្ត្រីកម្ពុជានៅថ្ងៃទី ២៩ ខែកញ្ញា ឆ្នាំ ២០២៣ បានស្នើឱ្យអភិបាលរាជធានី-ខេត្ត បន្តតាមដាន និងដោះស្រាយបញ្ហាទឹកជំនន់ដែលបានធ្វើឱ្យប៉ះពាល់ប្រជាពលរដ្ឋនៅតាមបណ្ដារាជធានី-ខេត្តមួយចំនួន។

សម្ដេធិបតីប្រាប់ឱ្យគណៈអភិបាលរាជធានី-ខេត្ត​ត្រូវតាមដាន និងដោះស្រាយឱ្យទាន់ពេលវេលា ក្នុងករណីដែលមានបញ្ហាទឹកជំនន់ប៉ះពាល់នៅក្នុងតំបន់ទទួលខុសត្រូវរបស់ខ្លួន ជាពិសេសយកចិត្តទុកដាក់ជួយសង្គ្រោះ​ប្រជាពលរដ្ឋ និងទ្រព្យសម្បត្តិរបស់ដែលរងការប៉ះពាល់។

សម្ដេចនាយករដ្ឋមន្ត្រីបានបន្តថា នៅក្នុងដំណាក់កាលនេះ គឺត្រូវត្រៀមរៀបចំកម្លាំងមធ្យោបាយសម្ភារ​ដើម្បីធ្វើយ៉ាងណាសង្គ្រោះ​ប្រជាពលរដ្ឋ ក្នុងករណីដែលមានទឹកជំនន់​ប៉ះពាល់ក្នុងតំបន់​តាមបណ្ដារាជធានី-ខេត្ត។

ជាមួយគ្នានេះ សម្ដេចនាយករដ្ឋមន្ត្រីស្នើឱ្យលោកទេសរដ្ឋមន្ត្រី គន់ គីម អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ​តាមដានឱ្យបានជាប់លាប់សហការ​ជាមួយគណៈអភិបាលរាជធានី-ខេត្តក្នុងការត្រៀមមធ្យោបាយអន្តរាគមន៍ សង្គ្រោះបន្ថែម ក្នុងករណីដែលរាជធានី-ខេត្តមានតម្រូវការ។

ក្រៅពីនេះ កងកម្លាំងប្រដាប់អាវុធគ្រប់ប្រភេទ ក៏ត្រូវត្រៀមកម្លាំង មធ្យោបាយ ជួយអន្តរាគមសង្គ្រោះប្រជាពលរដ្ឋដូចគ្នា។

សម្ដេចធិបតីក៏បានណែនាំឱ្យលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ត្រៀមស្បៀង សម្ភារបរិក្ខា ចែកជូនប្រជាពលរដ្ឋរងគ្រោះ ដោយសារទឹកជំនន់ ​ក្នុងករណី​ដែលមានការស្នើសុំពីរាជធានី-ខេត្ត។

​សម្ដេចធិបតីក៏បានណែនាំឱ្យត្រៀមស្រូវពូជ ​ក្នុងករណីផលរងប៉ះពាល់ធំ និងស្ដារឡើងវិញដំណាំរបស់កសិករផងដែរ៕