ជាង ២០ ឆ្នាំ ដែល​​ក្រុមហ៊ុន​បារាំង​ដ៏​ធំ​មួយ​បោះទុន​​រយ​លាន​ដុល្លារ​​​អភិវឌ្ឍ​​​ព្រលានយន្តហោះនៅ​កម្ពុជា

ក្រោម​ភាពជាដៃគូ​រវាង​រដ្ឋ​និង​ឯកជនដែល​បាន​ចុះ​ហត្ថលេខា​ជាមួយ​រាជ​រដ្ឋា​ភិបាល​កម្ពុជានៅ​ក្នុង​ឆ្នាំ ​១៩៩៥ ក្រុមហ៊ុន​អាកាសយានដ្ឋាន​កម្ពុជា (Cambodia Airports) ទទួល​បាន​សម្បទាន​វិនិយោគ​លើ​ការ​អភិវឌ្ឍ​និង​គ្រប់​គ្រង​បណ្តាញ​អាកាស​យានដ្ឋាន​អន្តរជាតិ​របស់​កម្ពុជា ​នៅ​រាជធានី​ភ្នំពេញ និង​នៅ​ក្រុង​សៀមរាប ដែល​ជា​ទឹក​ដី​​​ឧទ្យាន​បុរាណវិទ្យា​អង្គរ បេតិកភណ្ឌ​ពិភពលោក​នៃអង្គការ​យូណេស្កូ​ និង​នៅ​ក្រុង​ព្រះសីហនុ​ដែល​ជា​ទីក្រុង​ឆ្នេរ​និង​​កំពង់ផែ​សមុទ្រ​​។

ក្រុមហ៊ុនអាកាសយានដ្ឋានកម្ពុជាមាន​ភាគហ៊ុន​ពីរគឺ​ក្រុម​ហ៊ុន VINCI Airports របស់​បារាំង (៧០%) និង ក្រុមហ៊ុន Muhibbah Masteron Cambodia (៣០%) ដែល​ជា​ក្រុម​ហ៊ុន​រកស៊ី​ចូល​ហ៊ុនគ្នា​រវាង​កម្ពុជា​និង​ម៉ាឡេស៊ី។

ដំណើរការ​វិនិយោគក្រុមហ៊ុន VINCI

ក្រុមហ៊ុន Cambodia Airports ជា​សាខា​មួយ​របស់​ក្រុមហ៊ុន VINCI Airports ​ស្ថិត​ក្នុងចំណោម​ក្រុម​ហ៊ុន​ធំៗ​លំដាប់​ពិភពលោក​ចំនួន ៥ នៅក្នុង​វិស័យ​អាកាសយាន​ដ្ឋាន។ ជា​ក្រុមហ៊ុន​លំដាប់​សាកលមាន​សាខា​ច្រើន ក្រុមហ៊ុន VINCI Airports គ្រប់គ្រង​ការ​អភិវឌ្ឍ និង​ប្រតិបត្តិ​ការ​អាកាសយាន​ដ្ឋាន​ចំនួន ៤៤ នៅ​ប្រទេស​បារាំង ព័រ​ទុយ​ហ្កាល់ ចក្រភព​អង់គ្លេស ស៊ុយអែត កម្ពុជា ជប៉ុន សាធារណរដ្ឋ​ដូ​មី​និក កូស្តារីកា ឈីលី និង ប្រេស៊ីល។

ក្រុមហ៊ុន VINCI Airports បម្រើសេវា​ឱ្យ​ក្រុមហ៊ុន​អាកាសចរណ៍​ជាង ២៥០ ក្រុមហ៊ុន។ ក្នុង​ឆ្នាំ២០១៧ ចំណូល​ប្រចាំឆ្នាំ​របស់​ក្រុមហ៊ុន​ពី​ប្រតិបត្តិ​ការគ្រប់គ្រង​អាកាសយាន​ដ្ឋាន​​ទាំងអស់​មាន​រហូតដល់​ទៅ ៣,២ ប៊ី​លាន​អឺ​រ៉ូ ក្នុង​នោះ​ចំណូល​ប្រមូល​ផ្តុំ​មូល​មាន​ចំនួន ១,៤ប៊ី​លាន​អឺ​រ៉ូ។

ការគ្រប់គ្រង​ព្រលានយន្តហោះនៅ​កម្ពុជា

ជាមួយនឹង​វត្តមាន​ធ្វើ​ប្រតិបត្តិ​ការ​អស់​ជាង ២០ ឆ្នាំ​នៅក្នុង​ប្រទេស​កម្ពុជា និង​​វិនិយោគ​អស់​​ទឹកប្រាក់ប្រមាណ ៥០០ លាន​ដុល្លារ​អាមេរិក បច្ចុប្បន្ន​ក្រុមហ៊ុន VINCI Airports កំពុង​ប្រតិបត្តិ​ការគ្រប់គ្រង​អាកាសយាន​ដ្ឋាន​នៅ​ភ្នំពេញ សៀមរាប និង​ក្រុង​ព្រះសីហនុ។

ក្រុមហ៊ុន​ប្រើប្រាស់ឈ្មោះ​​ពាណិជ្ជនាម​ជា​អក្សរកាត់​ថា SCA (Société Concessionnaire des Aéroports) ដែល​ជា​ឈ្មោះស្រប​ច្បាប់។

នៅ​ក្នុង​ឆ្នាំ​២០១៧ អ្នក​ដំណើរ​ឆ្លង​កាត់​អាកាស​យានដ្ឋាន​អន្តរជាតិ​​ទាំង​អស់​របស់​កម្ពុជា​មាន​ចំនួន​សរុប ៨,៨ លាននាក់ ដោយ​ក្នុង​នោះ​អាកាស​យាន​ដ្ឋាន​អន្តរជាតិ​ភ្នំពេញ​ និង​សៀមរាប​ទទួល​បាន​ចំនួន ៤,២ លាន​នាក់​ស្មើគ្នា។ អាកាសយានដ្ឋាន​អន្តរជាតិ​ខេត្ត​​ព្រះសីហនុ​ ចាប់​ផ្តើម​ដំណើរ​ការ​ឈរ​លើ​មូលដ្ឋាន​​ទាបប៉ុន្តែ​មាន​​កំណើន​លេខ​បី​ខ្ទង់ រហូត​ដល់​មាន​អ្នក​ដំណើរ​ចំនួន ៣៣៨ ០០០ នាក់​ ឆ្លងកាត់​នៅ​ក្នុង​ឆ្នាំ​២០១៧។ អាកាស​យានដ្ឋាន​ទាំង​បី​នេះ​ បម្រើ​គោលដៅ​ហោះ​ហើរ​ជាង​ ៥៥ ​គោលដៅ ហើយ​ស្វាគមន៍​ការ​ហោះហើរ​ទៀងទាត់​ជាង ៧០០ ជើង​ ក្នុង​មួយ​សប្តាហ៍។

កាល​​ឆ្នាំ​ ២០១៨ ចំនួន​អ្នក​ធ្វើ​ដំណើរ​តាម​​អាកាស​យានដ្ឋាន​អន្តរជាតិ​​ទាំង​ ៣ ​​បាន​កើនឡើង​​​ខ្លាំង​​​ដែល​​​​ធ្វើ​ឲ្យ​ចំនួន​អ្នក​ដំណើរ​​​សរុប​ក្នុង​មួយ​ឆ្នាំ​​កើន​លើស​ ១០ ​លាន​នាក់​​ជា​លើក​ដំបូង​ក្នុង​​កំណត់​ត្រា​ចរាចរណ៍​អ្នក​ដំណើរ​​តាម​អាកាស​នៅ​កម្ពុជា។

​

ការ​ប្តេជ្ញា​ចិត្ត​ផ្នែក​ហិរញ្ញវត្ថុ និង​កិច្ច​សហប្រតិបត្តិ​ការ​យ៉ាងសកម្ម​ជាមួយ​ដៃគូ​ពាក់ព័ន្ធ​ក្នុង​ស្រុក តាមរយៈ​សកម្មភាព​នានា​ដូចជា​ការ​គាំទ្រ​ដល់​ការ​សិប្បកម្ម​ខ្មែរ​ជាដើម បាន​រួម​វិភាគទាន​ដល់​ការ​ធ្វើ​ឱ្យ​ចរាចរណ៍​អ្នកដំណើរ​ឆ្លងកាត់​អាកាសយាន​ដ្ឋាន​ភ្នំពេញ និង​សៀមរាប មាន​ចំនួន​កើន​ទ្វេដង និង​លើកកម្ពស់​ឧស្សាហកម្ម​ទេសចរណ៍​កម្ពុជា​ទៀតផង។

ក្នុង​នាម​ជា​ក្បាល​ម៉ាស៊ីន​ទាញ​​ឲ្យ​​​សេដ្ឋកិច្ច​​កម្ពុជា​មាន​កំណើន អាកាស​យានដ្ឋាន​អន្តរ​ជាតិ​ទាំង​បី​បាន​រួម​​ចំណែក​រហូត​ដល់​ទៅ ១៧%​នៃ​​ផ.ស.ស​ របស់​កម្ពុជា ​ចន្លោះ​ឆ្នាំ​២០១៤ និង​ឆ្នាំ​២០១៥។ មាន​ការ​ងារ​ជាង ១,៧លាន​ការងារ ឬ​តំណាង​ឱ្យ​២០% នៃ​កម្លាំង​ពលកម្ម​សរុប ដែល​ពាក់​ព័ន្ធ​នឹង​សកម្មភាព​របស់​អាកាស​យានដ្ឋាន​អន្តរ​ជាតិ​ទាំង​បី​នេះ។

ការ​ទទួល​វិញ្ញាបនបត្រ​និង​ស្តង់ដា

-វិញ្ញាបនបត្រអាកាសយានដ្ឋាន

វិញ្ញាបនបត្រអាកាសយានដ្ឋាន ជាតម្រូវការចាំបាច់​ខ្វះមិនបាន​សម្រាប់ធ្វើប្រតិបត្តិការគ្រប់គ្រង​អាកាសយានដ្ឋាន។ រដ្ឋលេខាធិការដ្ឋាន​អាកាសចរណ៍ស៊ីវិល​ បាន​ចេញវិញ្ញាបនបត្រនេះ​ដោយអនុលោម​តាម​ស្តង់ដានិង​អនុសាសន៍ពី​អាជ្ញាធរ​អាកាសចរណ៍​ស៊ីវិលអន្តរជាតិ និង​និយតកម្មក្នុងស្រុក។

ដើម្បីទទួលបានការបញ្ជាក់​ជាប្រតិបត្តិករអាកាសយានដ្ឋានបាន ក្រុមហ៊ុនអាកាសយានដ្ឋាន​កម្ពុជាត្រូវ​បង្ហាញ​អនុលោមភាពរបស់ខ្លួនឱ្យ​ត្រូវតាមស្តង់ដា​អន្តរជាតិទាំងអស់ ដែល​សំដៅ​ជាពិសេស​លើ​ការផ្តល់​សេវា​សុវត្ថិភាព និង​នីតិវិធីគ្រប់គ្រង​ដ៏ប្រសើរបំផុត។ ដើម្បីស​ម្រេច​ដូច្នេះ​បាន ប្រព័ន្ធ​គ្រប់គ្រង​សុវត្ថិភាព​មួយត្រូវបាន​ដាក់ឱ្យដំណើរការ អមជាមួយ​ការធ្វើសវនកម្ម​លើក្រុមហ៊ុន​អាកាសយានដ្ឋាន​កម្ពុជា ពីសំណាក់​មន្ត្រី​អធិការកិច្ច​នៃអាជ្ញាធរ​អាកាសចរណ៍ស៊ីវិល។

–វិញ្ញាបនបត្រ ISO 9001

វិញ្ញាបនបត្រ ISO 9001 សង្កត់ធ្ងន់លើគុណភាព។ ដើម្បី​អាចទទួល​វិញ្ញាបនបត្រ​ក្រោមស្តង់ដា​អន្តរជាតិ​នេះបាន ក្រុមហ៊ុនអាកាសយានដ្ឋាន​កម្ពុជា ត្រូវបំពេញ​តាមតម្រូវការចាំបាច់​ច្រើន​លំដាប់រាប់​ទាំងតម្រូវការឱ្យមានប្រព័ន្ធគ្រប់គ្រងគុណភាពផងដែរ។

អាកាសយានដ្ឋានទាំងបី​ដែលគ្រប់គ្រងដោយក្រុមហ៊ុន ត្រូវបាន​ដាក់បញ្ចូល​ទៅក្នុងស្តង់ដានេះ។ ដើម្បីអាចរក្សាវិញ្ញាបនបត្រនេះបាន ក្រុមហ៊ុន​អាកាសយានដ្ឋាន​កម្ពុជាត្រូវឆ្លងការពិនិត្យឡើងវិញ​ជារៀងរាល់ឆ្នាំ​ពីសំណាក់ក្រុមហ៊ុន BM Trada ដែល​ដើរតួជាសវនករ​ឯករាជ្យ។

–វិញ្ញាបនបត្រ ISO 14001

ជាវិធីសាស្ត្រមួយក្នុងការប្រយុទ្ធប្រឆាំងទៅនឹង​ការឡើងកំដៅ​ទូទាំង​សាកលលោក និង​ដើម្បីជួយ​ការពារ​បរិស្ថាន​។ ក្រុមហ៊ុន​​ធ្វើការប្ដេជ្ញា​ដោយស្ម័គ្រចិត្ត ដើម្បី​ធានា​យ៉ាងណា​ឱ្យរាល់សកម្មភាព​ប្រតិបត្តិការរបស់ក្រុមហ៊ុន​មានភាពស្រប​តាម​បញ្ញត្តិ​ផ្នែក​បរិស្ថាន។ ជាមួយគ្នានេះដែរ តាមរយៈប្រព័ន្ធគ្រប់គ្រងបរិស្ថាន សកម្មភាព​ទាំងអស់ត្រូវបាន​ធ្វើឡើង​ជាលក្ខណៈប្រព័ន្ធមួយសំដៅ​ទៅកាត់បន្ថយការប្រើប្រាស់ថាមពល ការ​បញ្ចេញ​កាកសំណល់ និងហានិភ័យបំពុលដោយចៃដន្យ។

ការទទួលស្គាល់គុណភាព​កាបូនអាកាសយានដ្ឋាន

បង្កើតឡើង​ក្រោមគំនិតផ្តួចផ្តើម​របស់ក្រុមប្រឹក្សា​អាកាសយានដ្ឋានអន្តរជាតិ (Airport Council International) ដោយមាន​គោលបំណង​កាត់បន្ថយការ​បញ្ចេញកាបូន និង​បង្កើននិរន្តរភាព​របស់អាកាសយានដ្ឋាន។

VINCI Airports គឺក្រុមហ៊ុន​អន្តរជាតិដំបូងគេ ​ដែលបានដាក់អាកាសយានដ្ឋាន​ទាំងអស់ដែលខ្លួនកំពុងគ្រប់គ្រងនៅក្រោមស្តង់ដា​បញ្ជាក់ការ​បំភាយកាបូន​ឈ្មោះថា Airport Carbon Accreditation។ យោងលើកម្មវិធី VINCI Airports កាលពី​ឆ្នាំ២០១៣ ក្រុមហ៊ុន​អាកាសយានដ្ឋានកម្ពុជាបានសម្រេចចិត្តអនុវត្តតាមកម្មវិធីនេះ រហូត​ទទួលបាន​ការ​បញ្ជាក់កម្រិត ១ នាពេលនោះ។

ជំហានបន្ទាប់គឺ​ក្រុមហ៊ុន​នឹងអនុវត្តផែនការសកម្មភាព ដើម្បីកាត់បន្ថយការបំភាយកាបូនដែល​មួយ​ផ្នែក​ធំនឹងអាស្រ័យទៅលើការបន្ថយការប្រើប្រាស់ថាមពល (មានអគ្គិសនី និងប្រេងឥន្ធនៈ)៕