អាមេរិក៖ ប្ដីទិញឆ្នោតជាកាដូជូនប្រពន្ធ ឈ្នះរង្វាន់ ៥០ ០០០ ដុល្លារ

បុរសម្នាក់នៅរដ្ឋ Maryland បានទិញឆ្នោតកោសជាកាដូជូនប្រពន្ធ ស្រាប់តែឈ្នះរង្វាន់ ៥០ ០០០ ដុល្លារ ។

Elio Figueroa អាយុ ៤៨ ឆ្នាំប្រាប់មន្រ្តីឆ្នោត Maryland ថា គាត់បានទៅផ្សារ Sunrise & Deli ដើម្បីស្កេនសំបុត្រឆ្នោតមួយចំនួន ដើម្បីមើលថាឈ្នះឬអត់ ។ ដោយសារមិនឈ្នះបានច្រើន គាត់សម្រេចចិត្តទិញឆ្នោតជូនប្រពន្ធម្ដងគឺអ្នកស្រី Maria អាយុ ៤១ ឆ្នាំ ។

ទំនេរពីការធ្វើម្ហូប Maria បានកោសឆ្នោតដែលប្ដីទិញឲ្យ ទើបឈ្នះរង្វាន់ ២០ ដុល្លារ និង ៥០ ០០០ ដុល្លារ ។

ដំបូងអ្នកទាំងពីរស្មានថាជារង្វាន់ទឹកប្រាក់ ៥០០០ ដុល្លារប៉ុណ្ណោះ លុះពិនិត្យមើលម្ដងទៀតទើបឃើញលេខសូន្យដល់ទៅ ៤ ឯណោះ ។ Maria និយាយថា “ពួកយើងសប្បាយចិត្តណាស់ ។ មិននឹកស្មានថាគាត់យកលុយ ៥០ ០០០ ដុល្លារមកផ្ទះបានសោះ!” ចំពោះគោលដំណងនៃការប្រើប្រាស់លុយរង្វាន់ ពួកគេគ្រោងនឹងទិញផ្ទះថ្មីសម្រាប់គ្រួសារឲ្យរស់នៅស្រួលជាងមុន ៕

ប្រែសម្រួល៖ វារី

ប្រភព៖ UPI

ចុចអាន៖ ថៃ​បង្ហាញ​មុខ​អ្នក​ត្រូវ​ឆ្នោត​ជាតិ​ជាង​៥៤​លាន​បាត ​ផ្អើល​ប្រទេស​ថៃ​