អាល្លឺម៉ង់ ត្រៀមបញ្ជូនទ័ព ៤០០០នាក់ ទៅក្បែរ រុស្ស៊ី

រដ្ឋមន្ត្រីក្រសួងការពារជាតិនៅទីក្រុងបែរឡាំង លោក Boris Pistorius បានប្រកាសក្នុងបទសម្ភាសន៍ជាមួយសារព័ត៌មាន ERR កាលពីថ្ងៃអង្គារទី៤ខែតុលាថា ប្រទេសអាល្លឺម៉ង់និងលីទុយអានី កំពុងធ្វើការជាមួយគ្នា លើការបង្កើតផែនទីបង្ហាញផ្លូវ សម្រាប់ការដាក់ពង្រាយកងពលតូចអាល្លឺម៉ង់ ទៅកាន់រដ្ឋបាល់ទិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានប្រកាសកាលពីប៉ុន្មានសប្តាហ៍មុនថា ទីក្រុងបែរឡាំង គ្រោងបញ្ជូនទាហានចំនួន ៤០០០នាក់ទៅកាន់ប្រទេសលីទុយអានី ដែលនៅទីនោះមានទ័ពអាល្លឺម៉ង់ប្រហែល១៥០០នាក់កំពុងឈរជើងរួចទៅហើយ ជាផ្នែកមួយនៃកងប្រយុទ្ធរបស់អង្គការណាតូ។

នៅក្នុងបទសម្ភាសន៍ថ្មីៗនេះ លោកពន្យល់ថា ចំណាត់ការនេះ នឹងធ្វើឡើងក្នុងគោលបំណងដើម្បីបង្ហាញពីសាមគ្គីភាព និងការទទួលខុសត្រូវនៅក្នុងក្រុមភាគខាងកើត។

ទោះបីជាយ៉ាងណាក៏ដោយ លោក Pistorius សង្កត់ធ្ងន់ថា នៅមានកិច្ចការជាច្រើនទៀត ដែលត្រូវធ្វើ មុនពេលទាហានអាចដាក់ពង្រាយបាន ប៉ុន្តែលោកបញ្ជាក់ថា អាល្លឺម៉ង់ និងលីទុយអានី រំពឹងថានឹងមានកិច្ចព្រមព្រៀងច្បាស់លាស់ អំពីរបៀបអនុវត្តផែនការនេះ នៅចុងខែវិច្ឆិកា ឬដើមខែធ្នូ។

គួររម្លឹកថា ដោយសារតែជម្លោះនៅអ៊ុយក្រែន, អាល្លឺម៉ង់ កាលពីខែមិថុនា បានចុះហត្ថលេខាលើកិច្ចព្រមព្រៀងយុទ្ធសាស្ត្រសន្តិសុខជាតិលើកដំបូងមិនធ្លាប់មានរបស់ខ្លួន ដែលចាត់ទុកប្រទេសរុស្ស៊ីថាជាការគំរាមកំហែងដ៏ធំបំផុតចំពោះសន្តិភាព និងសន្តិសុខនៅក្នុងតំបន់ អឺរ៉ូ-អាត្លង់ទិក និងជាកម្លាំងដែលបង្កហានិភ័យដល់សណ្តាប់ធ្នាប់ក្នុងតំបន់ និងពិភពលោក៕

ប្រែសម្រួល៖ Vann Vann

ប្រភព៖ RT

ចុចអាន៖ អាល្លឺម៉ង់ បញ្ជូនកងទ័ពរាប់រយនាក់ មកតំបន់ឥណ្ឌូប៉ាស៊ីហ្វិក