បក្សចំនួន១៣ ស្នើសុំចងសម្ព័ន្ធភាពជាមួយ គណបក្សប្រជាជនកម្ពុជា

គណបក្សនយោយបាយចំនួន១៣ បានលើកសំណើរួមជូនចំពោះសម្តេចតេជោ ហ៊ុន សែន ប្រធានគណបក្សប្រជាជនកម្ពុជា ដើម្បីស្នើសុំចងសម្ព័ន្ធភាពជាមួយគណបក្សប្រជាជនកម្ពុជា ដែលជាគណបក្សកំពុងកាន់អំណាចបច្ចុប្បន្ន។

តាមរយៈសំណើរួមមួយ ចុះនៅថ្ងៃទី១០ ខែតុលា ឆ្នាំ២០២៣ គណកប្សទាំង១៣ បានលើកឡើងដូច្នេះថា «យើងខ្ញុំទាំងអស់គ្នាមានកិត្តិយស សូមគោរពជម្រាបជូនសម្តេចប្រធាន មេត្តាជ្រាបដ៏ខ្ពង់ខ្ពស់ថា គណបក្សយើងខ្ញុំទាំងអស់គ្នាដូចមានរាយឈ្មោះភ្ជាប់មកជាមួយនឹងសំណើសុំចងសម្ព័ន្ធភាពជាមួយគណបក្សប្រជាជនកម្ពុជានេះ មានគោលបំណងចងសម្ព័ន្ធភាពជាមួយគណបក្សប្រជាជនកម្ពុជា ក្រោមការដឹកនាំដ៏ឆ្លាតវៃប្រកបដោយគតិបណ្ឌិតរបស់សម្ដេចប្រធាន ដែលបានដឹក នាំប្រទេសកម្ពុជាឆ្ពោះទៅរកសុខសន្តិភាព រក្សាបានស្ថិរភាព និងការអភិវឌ្ឍន៍ប្រទេសរីកចម្រើនឥតឈប់ឈរ»។

ក្រៅពីគណបក្សទាំង១៣នេះ មានគណបក្សនយោបាយមួយទៀត ពោល គឺគណបក្សខ្មែរតែមួយ ក៏បានបង្ហាញបំណងចង់ចងសម្ព័ន្ធភាពជាមួយគណបក្សប្រជាជនកម្ពុជាផងដែរ។ តាមរយៈសេចក្ដីប្រកាសព័ត៌មាន នៅព្រឹកថ្ងៃទី១១ ខែតុលា ឆ្នាំ២០២៣នេះ គណបក្សខ្មែរតែមួយ បានលើកឡើងថា គោលបំណងធ្វើសម្ព័ន្ធភាពជាមួយគណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាប្រធានគណបក្ស ដើម្បីរួមគ្នាការពាររដ្ឋធម្មនុញ្ញឆ្នាំ១៩៩៣ ព្រមទាំងរួមគ្នាការពាររាជរដ្ឋាភិបាលស្របច្បាប់ដែលបានកើតឡើងតាមរយៈការបោះឆ្នោតក្នុងអាណត្តិនីមួយៗ។

គណបក្សខ្មែរតែមួយ ក៏បានអំពាវនាវដល់គណបក្សនយោបាយនានា ដែលបានចុះបញ្ជីស្របច្បាប់នៅក្នុងក្រសួងមហាផ្ទៃ ចូលរួមបង្កើតសម្ព័ន្ធភាពជាមួយគណបក្សប្រជាជនកម្ពុជាផងដែរ៕