ព័ត៌មានជាតិ
កម្ពុជា-ប្រេស៊ីល ប្ដេជ្ញាពង្រឹងទំនាក់ទំនងទ្វេភាគី និងពង្រីកកិច្ចសហបតិបត្តិការ
រដ្ឋមន្ត្រីការបរទេសកម្ពុជា និងប្រេស៊ីល បានបង្ហាញការប្ដេជ្ញាចិត្តពង្រឹងទំនាក់ទំនងទ្វេភាគី និងពង្រីកកិច្ចសហប្រតិបត្តិការឱ្យកាន់តែរីកចម្រើនថែមទៀតរវាងប្រទេសទាំងពីរ។ ការប្ដេជ្ញាចិត្តនេះ បានធ្វើឡើងតាមរយៈជំនួបទ្វេភាគីរវាងលោក សុខ ចិន្តាសោភា រដ្ឋមន្ត្រីការបរទេសកម្ពុជា និងលោក Mauro Vieira រដ្ឋមន្ត្រីការបរទេសប្រេស៊ីល នៅថ្ងៃទី១១ ខែតុលានេះ។
ក្នុងជំនួបរវាងប្រមុខការទូតនៃប្រទេសទាំងពីរទៀតសោត ធ្វើឡើងក្នុងអំឡុងពេលទស្សនកិច្ចផ្លូវការរបស់លោក Mauro Vieira រដ្ឋមន្ត្រីការបរទេសប្រេស៊ីល នៅកម្ពុជា។ សេចក្ដីប្រកាសព័ត៌មានរបស់ក្រសួងការបរទេសកម្ពុជា បានឱ្យដឹងថា ភាគីទាំងពីរ កម្ពុជា-ប្រេស៊ីល បានជួបពិភាក្សាប្រកបដោយលទ្ធផលផ្លែផ្កា ដោយបានសម្ដែងនូវការពេញចិត្តចំពោះសន្ទុះជាវិជ្ជមាននៃមិត្តភាព និងទំនាក់ទំនង ដែលកំពុងរីកចម្រើនរវាងប្រទេសទាំងពីរ។
លោកឧបនាយករដ្ឋមន្ត្រី សុខ ចិន្តាសោភា បានជម្រាបជូនគណៈប្រតិភូមិត្តអំពីវឌ្ឍនភាពនៃដំណើរការរៀបចំបើកស្ថាន ទូតកម្ពុជា នៅរដ្ឋធានី Brasilia នាពេលខាងមុខ និងបានថ្លែងអំណរគុណចំពោះរដ្ឋាភិបាលប្រេស៊ីល ដែលបានសម្រប សម្រួលក្នុងដំណើរការនេះ។ ជាការឆ្លើយតប លោក Mauro Vieira បានឱ្យដឹងថា រដ្ឋាភិបាលប្រេស៊ីល បានសម្រេចចិត្តបើកស្ថានទូតប្រេស៊ីល នៅភ្នំពេញផងដែរ នៅឆ្នាំ២០២៤ ខាងមុខ ដែលនេះគូសបញ្ជាក់ពីសារៈសំខាន់របស់កម្ពុជា។
លោករដ្ឋមន្ត្រីការបរទេសប្រេស៊ីល ក៏បង្ហើបពីគម្រោងបេសកកម្មពាណិជ្ជកម្មរបស់គណៈប្រតិភូវិស័យឯកជនប្រេស៊ីល មកបំពេញទស្សនកិច្ចកម្ពុជា នៅឆ្នាំក្រោយផងដែរ។ ជុំវិញទំនាក់ទំនងពាណិជ្ជកម្មនេះ ភាគីទាំងពីរបានឯកភាពពិនិត្យលទ្ធភាពនៃការចរចាកិច្ចព្រមព្រៀងស្ដីពីកិច្ចសហប្រតិបត្តិការ និងការសម្រួលការវិនិយោគឱ្យបានឆាប់តាមអាចធ្វើបាន។
ភាគីទាំងពីរ ក៏បានពិភាក្សាអំពីផែនការសកម្មភាព សំដៅពង្រឹង និងពង្រីកបន្ថែមទៀតកិច្ចសហប្រតិបត្តិការក្នុងក្របខ័ណ្ឌទ្វេភាគី និងពហុភាគី។ វិធានការទាំងនេះ រួមមាន សកម្មភាពអបអរសាទរខួបអនុស្សាវរីយ៍លើកទី៣០ នៃទំនាក់ទំនងការ ទូតរវាងកម្ពុជា និងប្រេស៊ីល នៅឆ្នាំ២០២៤ សកម្មភាពជំរុញពាណិជ្ជកម្ម វិនិយោគ ទេសចរណ៍ កសិកម្ម អប់រំ និងកិច្ច សហប្រតិបត្តិការរវាងវិទ្យាស្ថានការទូត ព្រមទាំងសកម្មភាពបង្កើនកិច្ចសហការបច្ចេកទេស និងគាំទ្រដល់កិច្ចខិតខំប្រឹងប្រែងកសាងសន្តិភាព។
ទន្ទឹមនេះ កម្ពុជា បានបង្ហាញការត្រៀមខ្លួនក្នុងការធ្វើជាម្ចាស់ផ្ទះនៃកិច្ចប្រជុំពិគ្រោះយោបល់ទ្វេភាគីលើកទី២ រវាងក្រសួងការបរទេសទាំងពីរ នៅឆ្នាំក្រោយ។ រដ្ឋមន្ត្រីការបរទេសទាំងពីរ ក៏បានពិភាក្សាអំពីបញ្ហាតំបន់ និងអន្តរជាតិ ដែលជាប្រយោជន៍ និងក្តីកង្វល់រួមផងដែរ។
បើទោះបី កម្ពុជា និងប្រេស៊ីល មានទីតាំងភូមិសាស្ត្រឆ្ងាយពីគ្នាក៏ដោយ រដ្ឋមន្ត្រីការបរទេសទាំងពីរ បានបញ្ជាក់ជាថ្មីនូវការប្តេជ្ញាចិត្តឥតងាករេក្នុងការធ្វើឱ្យកាន់តែស៊ីជម្រៅបន្ថែមទៀតទំនាក់ទំនង មិត្តភាពទ្វេភាគី និងកិច្ចសហប្រតិបត្តិការពហុវិស័យ ដើម្បីផលប្រយោជន៍រួមនៃស្ថិរភាព ការអភិវឌ្ឍ និងវិបុលភាព សម្រាប់ប្រជាជនទាំងពីរ៕
-
ព័ត៌មានជាតិ១ សប្តាហ៍ ago
ព្យុះ ប៊ីប៊ីនកា បានវិវត្តន៍ទៅជាព្យុះសង្ឃរា បន្តជះឥទ្ធិពលលើកម្ពុជា
-
ព័ត៌មានជាតិ៤ ថ្ងៃ ago
ព្យុះ ពូលឡាសាន ជាមួយវិសម្ពាធទាប នឹងវិវត្តន៍ទៅជាព្យុះទី១៥ បង្កើនឥទ្ធិពលខ្លាំងដល់កម្ពុជា
-
ព័ត៌មានអន្ដរជាតិ៤ ថ្ងៃ ago
ឡាវ បើកទំនប់ទឹកនៅខេត្ត Savannakhet
-
ព័ត៌មានអន្ដរជាតិ១ សប្តាហ៍ ago
អឺរ៉ុបកណ្តាលនិងខាងកើត ក៏កំពុងរងគ្រោះធ្ងន់ធ្ងរ ដោយទឹកជំនន់ដែរ
-
ព័ត៌មានអន្ដរជាតិ១ សប្តាហ៍ ago
វៀតណាម ប្រាប់ឲ្យពលរដ្ឋត្រៀមខ្លួន ព្រោះព្យុះថែមទៀត នឹងវាយប្រហារ ចុងខែនេះ
-
ព័ត៌មានជាតិ៣ ថ្ងៃ ago
Breaking News! កម្ពុជា សម្រេចដកខ្លួនចេញពីគម្រោងCLV-DTA
-
ព័ត៌មានអន្ដរជាតិ៥ ថ្ងៃ ago
ព្យុះកំបុងត្បូង នឹងវាយប្រហារប្រទេសថៃ នៅថ្ងៃសុក្រនេះ
-
ព័ត៌មានជាតិ៦ ថ្ងៃ ago
ព្យុះចំនួន២ នឹងវាយប្រហារក្នុងពេលតែមួយដែលមានឥទ្ធិពលខ្លាំងជាងមុន ជះឥទ្ធិពលលើកម្ពុជា