ស្ថានទូតអូស្ត្រាលី ប្រកាសទទួលពាក្យ កម្មវិធីអាហារូបករណ៍​អូស្ត្រាលី រយៈពេលខ្លី សម្រាប់កម្រិតអ្នកដឹកនាំ

អ្នកមកពីអង្គការ ដែលមានទំនាក់ទំនងជាមួយប្រទេសអូស្ត្រាលី ហើយមានបំណងចង់អភិវឌ្ឍនបន្ថែម លើចំណេះ​ជំនាញ ក៏ដូចជាចង់បង្កើត​ភាពខុសប្លែកក្នុងវិជ្ជាជីវៈរបស់ខ្លួន អាចដាក់ពាក្យចូលរួម កម្មវិធីអាហារូបករណ៍អូស្ត្រាលី រយៈពេលខ្លី (Australia Awards Fellowships) ជុំទី១៩ ជាមួយស្ថានទូតអូស្ត្រាលីប្រចាំកម្ពុជាបាន ចាប់ពីថ្ងៃនេះ រហូតដល់ថ្ងៃទី០៧ ខែវិច្ឆិកា ឆ្នាំ២០២៣។

កម្មវិធីអាហាររូបករណ៍អូស្ត្រាលី រយៈពេលខ្លីនេះ ជាកិច្ចសហការគ្នារវាងប្រទេសអូស្ត្រាលី និងប្រទេសកំពុងអភិវឌ្ឍន៍ ដោយផ្តោតលើពាណិជ្ជកម្មទ្វេភាគី ជំនាញវិជ្ជាជីវៈ និងទំនាក់ទំនង សម្រាប់អ្នកដែលមានតួនាទី​សំខាន់ៗ ដែលអាចជំរុញ​ ការ​អភិវឌ្ឍ​ន និងបញ្ហាការបរទេសប៉ុណ្ណោះ។ ​​
កម្មវិធីនេះ មានការចូលរួមពីស្ថាប័នអង្គការអូស្ត្រាលីគ្រប់វិស័យ អាចឱ្យអ្នកចូលរួម ទទួលបានឱកាសក្នុងការពង្រឹង និងពង្រីកទំនាក់ទំនងរបស់ខ្លួន ជាមួយថ្នាក់ដឹកនាំ និងអ្នកជំនាញនានា នៅក្នុងប្រទេសកំពុងអភិវឌ្ឍន៍ផងដែរ។

ស្ថានទូតអូស្ត្រាលីប្រចាំកម្ពុជា បន្ថែមថា កម្មវិធីនេះគឺដើម្បីពង្រឹងភាពជាដៃគូ និងទំនាក់ទំនងរវាង អង្គការអូស្ត្រាលី និងអង្គការដៃគូនៅក្នុងប្រទេសកំពុងអភិវឌ្ឍន៍ ដើម្បីគាំទ្រដល់គោលដៅអភិវឌ្ឍន៍ជាយុទ្ធសាស្ត្ររបស់អូស្ត្រាលី និងជំរុញបញ្ហាអភិវឌ្ឍន៍ទ្វេភាគីជាអាទិភាព។

គួរបញ្ជាក់ថា កម្មវិធី​នេះ​​បង្កើត​ឡើង​ដើម្បី​បំពេញ​បន្ថែម​ឱ្យគ្នាទៅវិញទៅមក ដោយបញ្ចូលនូវកម្មវិធីអភិវឌ្ឍន៍តំបន់ ផ្តល់​ជូន​មន្ត្រីជាន់ខ្ពស់ និងអ្នកជំនាញ ដែល​នឹង​មាន​តួនាទី​ជំរុញ​ការ​អភិវឌ្ឍ​ជា​អាទិភាព និង​បញ្ហា​កិច្ចការ​បរទេស ​​ពេលដែល​ត្រឡប់​មក​ប្រទេស​វិញ។ សកម្មភាពអាហារូបករណ៍នេះ មានគោលបំណងផ្តល់នូវការបណ្តុះបណ្តាល​គុណភាពខ្ពស់ ការផ្លាស់ប្តូរចំណេះជំនាញ និងឱកាសទំនាក់ទំនង៕

អត្ថបទ៖ សុធាវី