លោក ពូទីន ថាឲ្យ អាមេរិក ត្រូវចេះរៀនគោរពប្រទេសដទៃខ្លះផង

ប្រធានាធិបតីរុស្ស៊ីលោក វ្ល៉ាឌីមៀរ ពូទីន បាននិយាយកាលពីថ្ងៃអង្គារថា សហរដ្ឋអាមេរិកត្រូវតែចេះរៀនគោរពប្រទេសដទៃខ្លះផង ជាពិសេសគួរតែស្វែងរកការសម្របសម្រួលណាមួយ មិនមែនចេះតែចង់បង្ក្រាបអ្នកណាតាមតែចិត្តនោះទេ ។

ការលើកឡើងរបស់លោក ពូទីន គឺជាការឆ្លើយតបទៅនឹងការធ្វើអត្ថាធិប្បាយរបស់លោកប្រធានាធិបតី ចូ បៃដិន នៅក្នុងកិច្ចសម្ភាសន៍ជាមួយទូរទស្សន៍អាមេរិក អំពីភាពចាំបាច់ដើម្បីកម្ចាត់មេដឹកនាំរុស្ស៊ីរូបនេះ ក៏ដូចជាភាពប្រាកដប្រជាក្នុងការឈរឈ្មោះបោះឆ្នោតសម្រាប់អាណត្តិប្រធានាធិបតីទី ២ របស់លោក ។

នៅពេលអ្នកសារព័ត៌មានរុស្ស៊ីលោក Pavel Zarubin ឲ្យសាកស្រមៃមើលថាតើនឹងមានអ្វីកើតឡើង ប្រសិនបើសហរដ្ឋអាមេរិកពួតដៃគ្នាមែននោះ, លោក ពូទីន បានឆ្លើយថា “ពួកគេត្រូវចេះរៀនគោរពអ្នកដទៃ ហើយបន្ទាប់មកគ្មាននរណាម្នាក់នឹងត្រូវគាបសង្កត់នោះឡើយ ។ ប៉ុន្តែការចង់គាបសង្កត់នរណាម្នាក់ ដោយហេតុផលមួយចំនួន ឬដោយគ្មានហេតុផលអ្វីទាំងអស់នោះ វានឹងនាំឲ្យមានបញ្ហា” ។

លោក ពូទីន បញ្ជាក់ទៀតថា “ពិតណាស់ សហរដ្ឋអាមេរិកមានភាពប៉ិនប្រសប់ មានការគោរពស្រឡាញ់ ក៏ដូចជាចេះជួយគាំទ្រប្រទេសផ្សេងៗទៀត ប៉ុន្តែការគោរពមនុស្ស ប្រជាជាតិ និងប្រជាជនប្រទេសផ្សេងទៀតនៅគ្រប់ទីកន្លែង គឺទាល់តែពួកគេទទួលបានផលប្រយោជន៍ក្នុងដៃ” ។

លោកប្រធានាធិបតីបាននិយាយទៀតថា ប្រសិនបើសហរដ្ឋអាមេរិកមិនមានកិច្ចការអ្វីក្រៅពីការកសាងទំនាក់ទំនងជាមួយរុស្ស៊ីទេនោះ វាមិនអាក្រក់ដល់ថ្នាក់នេះនោះទេ ប៉ុន្តែរាល់ថ្ងៃនេះអាមេរិកធ្វើអ្វីគ្រប់យ៉ាង គឺលើសពេកហើយ ។

ជាចុងក្រោយលោក ពូទីន ក៏បានសរសរើលោក បៃដិន ផងដែរថា “ពិតជាអ្នកនយោបាយដែលមានបទពិសោធន៍ច្រើនបំផុតនៅក្នុងពិភពលោកទាំងមូល ដោយសារតែលោកបានប្រឡូកក្នុងឆាកនយោបាយអស់រយៈពេលជាយូរមកហើយ ។ ប្រធានាធិបតីអាមេរិករូបនេះមានបទពិសោធន៍ និងដឹងពីភារកិច្ចដែលត្រូវកំណត់សម្រាប់ខ្លួនគាត់ ជាពិសេសគឺពីរបៀបដែលត្រូវសម្រេចបាន” ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ អ៊ីស្រាអែល សុំ អាមេរិក ១០ ពាន់លានដុល្លារសម្រាប់ជំនួយយោធា