ផ្ទុះការប្រយុទ្ធជើងគោកនៅតំបន់ហ្គាហ្សា ក្រោយអ៊ីស្រាអែលបង្កើនការទម្លាក់គ្រាប់បែក

សមរភូមិលើដីបានផ្ទុះឡើងនៅតំបន់ហ្គាហ្សា នៅថ្ងៃសៅរ៍ ទី២៨ ខែតុលា នេះ ខណៈកងទ័ពអ៊ីស្រាអែលប្រកាសថា ខ្លួនកំពុងពង្រីកប្រតិបត្តិការជើងគោក បន្ទាប់ពីបានបង្កើនការទម្លាក់គ្រាប់បែករបស់ខ្លួនលើទឹកដីប៉ាឡេស្ទីន ៣សប្តាហ៍កន្លងមក។

ជុំវិញជម្លោះនេះអង្គការសហប្រជាជាតិបានបើកមហាសន្និបាត ដោយអំពាវនាវឱ្យមាន “បទឈប់បាញ់មនុស្សធម៌ជាបន្ទាន់” ប៉ុន្តែអ៊ីស្រាអែលហាក់មិនទទួលសេចក្ដីអំពាវនាវឡើយ។

អ្នកនាំពាក្យយោធាអ៊ីស្រាអែល លោក Major Nir Dinar បានប្រាប់បណ្ដាញព័ត៌មាន AFP ថា កងទ័ពរបស់ខ្លួនកំពុងប្រតិបត្តិការនៅក្នុងតំបន់ហ្គាហ្សា ជាមួយនឹងកងទ័ពរាប់ម៉ឺននាក់ដែលបានប្រមូលផ្តុំនៅតាមព្រំដែនហ្គាហ្សាដើម្បីត្រៀមជើងព្រួល ខណៈកាលពីយប់ថ្ងៃពុធ និងថ្ងៃព្រហស្បតិ៍ កងកម្លាំងអ៊ីស្រាអែលក៏បានធ្វើការលុកលុយក្រោមដីផងដែរ។

អ្នកនាំពាក្យយោធាលោក Daniel Hagari បាននិយាយកាលពីល្ងាចថ្ងៃសុក្រថា “កងកម្លាំងជើងគោកកំពុងបន្តប្រតិបត្តិការជើងគោកនៅយប់នេះ” ។

កងទ័ពបាននិយាយកាលពីព្រឹកថ្ងៃសៅរ៍ថា នៅក្នុងការវាយឆ្មក់ពេញមួយយប់ យន្តហោះចម្បាំងអ៊ីស្រាអែលបានវាយប្រហារលើ “ផ្លូវរូងក្រោមដីភេរវកម្ម កន្លែងប្រយុទ្ធក្រោមដី និងហេដ្ឋារចនាសម្ព័ន្ធក្រោមដីបន្ថែម និងមានភេរវករហាម៉ាសជាច្រើននាក់ត្រូវបានសម្លាប់” ៕

ប្រែសម្រួល៖ សន្យា

ប្រភព៖ CNA

ចុចអាន៖ អាមេរិក ត្រៀមរួចជាស្រេច ដើម្បីចាត់វិធានការបន្ថែមទៀត ប្រឆាំងក្រុមសកម្មប្រយុទ្ធ ដែលមានទំនាក់ទំនងជាមួយអ៊ីរ៉ង់