កុមារនៅហ្គាហ្សា ជាង៣០០០នាក់ស្លាប់ ខណៈ ១០០០នាក់ ជាប់ក្រោមគំនរបាក់បែក

ការទម្លាក់គ្រាប់បែករបស់អ៊ីស្រាអែលទៅលើតំបន់ហ្គាហ្សា បានបណ្តាលឲ្យចំនួនអ្នកស្លាប់ កើនឡើងខ្ពស់បំផុតមិនធ្លាប់មានពីមុនមក ជាពិសេសកុមារតែម្តង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរបាយការណ៍របស់អង្គការ Save the Children បានបង្ហាញថា តួលេខកុមារដែលត្រូវបានសម្លាប់នៅតំបន់ហ្គាហ្សាចាប់តាំងពីថ្ងៃទី៧ខែតុលាមក បានឈានដល់ ៣១៩៥នាក់ ពោលគឺខ្ពស់ជាងចំនួនកុមារសរុបដែលត្រូវបានសម្លាប់ក្នុងជម្លោះជុំវិញពិភពលោកជារៀងរាល់ឆ្នាំ គិតចាប់តាំងពីឆ្នាំ២០១៩មកទៅទៀត។

ទោះបីជាយ៉ាងណាក៏ដោយ តួលេខទំនងជាខ្ពស់ជាងនេះទៅទៀត ព្រោះកុមារប្រមាណ១០០០នាក់ ក៏ត្រូវបានរាយការណ៍ថា កំពុងបាត់ខ្លួនផងដែរ ដោយគេសន្មត់ថា ត្រូវកប់នៅក្រោមគំនរបាក់បែកនៃអគារ ដែលត្រូវបានបំផ្លាញដោយការទម្លាក់គ្រាប់បែករបស់អ៊ីស្រាអែល។

តាមរបាយការណ៍របស់អគ្គលេខាធិការអង្គការសហប្រជាជាតិស្តីពីកុមារ និងជម្លោះប្រដាប់អាវុធ, កុមារសរុប២៩៨៥នាក់ត្រូវបានសម្លាប់នៅទូទាំង២៤ប្រទេស ក្នុងឆ្នាំ២០២២ ខណៈ២៥១៥នាក់ស្លាប់ក្នុងឆ្នាំ២០២១ និង២៦៧៤នាក់ក្នុងឆ្នាំ២០២០ នៅទូទាំងប្រទេសចំនួន២២។

របាយការណ៍របស់ Save the Children កើតឡើងចំពេលអ៊ីស្រាអែល ពង្រីកប្រតិបត្តិការជើងគោកកាន់តែធំក្នុងតំបន់ហ្គាហ្សា ខណៈការទម្លាក់គ្រាប់បែកទ្រង់ទ្រាយធំនៅតែបន្ត។

ពេលសង្គ្រាមថ្មីនេះចាប់ផ្តើម ជនជាតិអ៊ីស្រាអែលនិងជនបរទេសចំនួន ១៤០០ នាក់ ត្រូវបានសម្លាប់នៅខាងអ៊ីស្រាអែល ដែលភាគច្រើនក្នុងការវាយប្រហារដ៏គួរឲ្យភ្ញាក់ផ្អើលដោយក្រុមហាម៉ាស់កាលពីថ្ងៃទី៧ខែតុលា៕

ប្រែសម្រួល៖ Vann Vann

ប្រភព៖ Aljazeera

ចុចអាន៖ អ៊ីរ៉ង់ ពន្លះអាមេរិកនិងអ៊ីស្រាអែល យ៉ាងចាស់ដៃ