កសិករវៀតណាម យកជ្រូកងាប់ដោយសារជំងឺប៉េស្ត បោះចូលក្នុងប្រឡាយ បង្កជាក្តីបារម្ភ

ខ្មោចសត្វជ្រូករាប់សិបក្បាលត្រូវបានគេបោះចោលក្នុងប្រឡាយមួយក្នុងខេត្ត Nghe An នៃប្រទេសវៀតណាម ដោយសារការរីករាលដាលនៃជំងឺប៉េស្តជ្រូកអាហ្រ្វិក ហើយបញ្ចេញក្លិនស្អុយដល់អ្នកស្រុក ។

បញ្ហានេះធ្វើឲ្យអ្នកស្រុកដែលឆ្លងកាត់ប្រឡាយសម្ដែងការព្រួយបារម្ភយ៉ាងខ្លាំង ព្រោះទឹកត្រូវបានប្រើប្រាស់សម្រាប់កសិកម្មក្នុងស្រុក Yen Thanh, Dien Chau និង Quynh Luu ប៉ុន្តែខ្មោចជ្រូកបំពុលទឹកទៅហើយ ។

ទោះបីក្រុមហ៊ុន North Nghe An Irrigation Co. Ltd. ​បាន​​សម្របសម្រួល​ជាមួយ​អ្នកស្រុក ដើម្បី​អំពាវនាវ​​កុំ​ឲ្យ​ប្រព្រឹត្ត​ដូច​នេះ​តទៀត ហើយ​ប្រមូល​កប់​ខ្មោច​ជ្រូកទាំងនោះក៏ដោយ ប៉ុន្តែ​បញ្ហា​នៅ​តែ​កើត​មាន​ដដែល ។

បច្ចុប្បន្នស្រុក Yen Thanh មាន​ជ្រូក​ជាង ៨២ ០០០ ក្បាល ខណៈជំងឺប៉េស្តជ្រូកអាហ្រ្វិកបានរីករាលដាលដល់ឃុំ និងទីប្រជុំជនចំនួន ១១ នៅក្នុងស្រុកឯណោះ ។ ដូច្នេះអាជ្ញាធរ​មូលដ្ឋាន​បាន​ពិនិត្យ និង​បំផ្លាញ​ជ្រូក​ទាំងនេះ ព្រមទាំង​សម្លាប់​មេរោគ​នៅ​តំបន់​ដែល​រងគ្រោះ​ដោយ​ជំងឺផងដែរ ។

គួរឲ្យដឹងថា ជំងឺប៉េស្តជ្រូកអាហ្រ្វិកបានរីករាលដាលដល់ស្រុក Dien Chau និង Quynh Hop ក្នុងខេត្ត Nghe An ថែមទៀត ទើបរដ្ឋបាលខេត្តបានចេញសេចក្តីប្រកាសជាបន្ទាន់មួយ ដោយស្នើឱ្យអ្នកស្រុកការពារ គ្រប់គ្រងការរាតត្បាត ទប់ស្កាត់ការរាតត្បាតថ្មី និងពិន័យអ្នកមិនរាយការណ៍ពីករណីជំងឺឆ្លងនេះផងដែរ ៕

ប្រែសម្រួល៖ វារី

ប្រភព៖ tuoitrenews

ចុចអាន៖ វិធីសាស្ត្រការពារជំងឺប៉េស្តជ្រូកអាហ្វ្រិក សម្រាប់កសិដ្ឋានចិញ្ចឹមជ្រូក