កីឡា

ប្រុសស្អាត Nick Taylor មានភាពកក់ក្តៅសម្រាប់អាជីពបាល់ទាត់នៅកម្ពុជា

បានផុស

១ year មុន

នៅ

ថ្ងៃសុក្រ ៣ វិច្ឆិកា ២០២៣

ដោយ

កីឡាករបាល់ទាត់ខ្មែរ-អាមេរិក Nick Taylor ក្រោយផ្លាស់មកកាន់ក្លិបព្រះខ័នរាជស្វាយរៀង កាលពីថ្ងៃទី៣ ខែកុម្ភៈ ឆ្នាំ២០២៣ រូបគេមានអារម្មណ៍កក់ក្ដៅ និងរីករាយយ៉ាងខ្លាំង បន្ទាប់ពីស្នាក់នៅកម្ពុជាជិតមួយឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ Nick Taylor បានប្រាប់«កម្ពុជាថ្មី»ថា ៖«ខ្ញុំរីករាយការរស់នៅក្នុងប្រទេសកម្ពុជា។ ពីដំបូង លំបាកបន្តិច ព្រោះអ្វីៗគ្រប់យ៉ាងខុសពីជីវិតរបស់ខ្ញុំកាលរស់នៅអាមេរិក ប៉ុន្តែយូរៗទៅមានការជ្រោមជ្រែងពីមនុស្សជុំវិញ ខ្ញុំក៏បានសម្របខ្លួនបាន។ ឥឡូវនេះខ្ញុំមានអារម្មណ៍ថា កក់ក្ដៅក្នុងការស្នាក់នៅទីនេះ គឺប្រៀបដូចជាផ្ទះរបស់ខ្ញុំ»។

កីឡាករ Nick Taylor បានកើតនិងធំដឹងក្ដីនៅសហរដ្ឋអាមេរិក ដោយមានម្តាយជាជនជាតិខ្មែរ។ កីឡាករត្រូវបានកោះចូលក្រុមជម្រើសជាតិកម្ពុជាលើកដំបូងកក្នុងការប្រកួតមិត្តភាពអន្តរជាតិជាមួយប្រទេសបង់ក្លាដេស នៅពហុកីឡដ្ឋានជាតិមរតកតេជា កាលពីថ្ងៃ២២ ខែកញ្ញា ឆ្នាំ២០២២។

ការចូលរួមជាមួយព្រះខ័នរាជស្វាយរៀង រូបគេទទួលបានឱកាសលេងជម្រើស១១នាក់ដំបូងជាញឹកញាប់ក្រោមការដឹងនាំរបស់លោកគ្រូ Pep Munoz នៅរដូវកាលនេះ ហើយក៏តែងតែជាប់ជម្រើសជាតិកម្ពុជារហូត។ ជាពិសេសរូបគេជាកីឡាករបាល់ទាត់ម្នាក់ទទួលបានឱកាសថតផ្សាយពាណិជ្ជកម្មច្រើនជាងគេ។

កីឡាករ Nick Taylor បានបន្ថែមថា ៖«ខ្ញុំគិតថា ភាពខុសគ្នារវាងជីវិតនៅទីក្រុង និងជីវិតនៅខេត្តគឺគួរឲ្យចាប់អារម្មណ៍ណាស់។ ខ្ញុំមានឱកាសទៅលេងតាមខេត្តមួយផ្សេងៗនៅកម្ពុជា។ វាមានភាពខុសគ្នាខ្លាំង បើធៀបនឹងជីវិតរស់នៅដ៏មមាញឹកនៅទីក្រុងភ្នំពេញ»។

មុនពេលផ្លាស់មកក្លិបព្រះខ័នរាជស្វាយរៀងក្នុងឆ្នាំ២០២២ កីឡាករ Nick Taylor បានលេងឲ្យក្រុម Olando City B បង្ហាញខ្លួនបាន ២២ ប្រកួត ស៊ុតបញ្ចូលទី១គ្រាប់ ក្នុងនាមជាខ្សែបម្រើស្លាប៕