អាល្លឺម៉ង់ ប្រកាសដាក់ពង្រាយកងរថក្រោះ ទៅប្រទេសនៅជាប់ រុស្ស៊ី

ក្រសួងការពារជាតិអាល្លឺម៉ង់ប្រកាសថា ខ្លួននឹងដាក់ពង្រាយកងរថក្រោះចំនួនពីរ ទៅកាន់ប្រទេសលីទុយអានី ដែលនឹងបង្កើតជាកងពលតូចថ្មី រួមជាមួយនឹងក្រុមសមរភូមិ Forward Presence របស់អង្គការណាតូ ដែលឈរជើងរួចទៅហើយនៅក្នុងប្រទេសបាល់ទិកមួយនេះ ខណៈអង្គភាពថ្មីនេះរំពឹងនឹងលេចចេញជារូបរាងពេញលេញក្នុងឆ្នាំ២០២៥ ជាមួយនឹងយោធាសរុប ៤,៨០០ នាក់ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសេចក្តីថ្លែងការណ៍មួយកាលពីដើមសប្តាហ៍ ក្រសួងនិយាយថា “កងរថក្រោះលេខ២០៣ និងកងវរសេនាតូចថ្មើរជើងមេកានិចលេខ១២២ នឹងត្រូវដាក់ពង្រាយជាថ្មី ទៅកាន់ប្រទេសលីទុយអានី។ កងទ័ពបន្ថែម នឹងចូលរួមជាមួយអង្គភាពណាតូដឹកនាំប្តូវេន បន្ទាប់ពីហេដ្ឋារចនាសម្ព័ន្ធចាំបាច់ទាំងអស់ ត្រូវបានដាក់ឲ្យដំណើរការ”។

បច្ចុប្បន្ន មានកងទ័ពប្រហែល ១,៧០០ នាក់ មកពីប្រទេសជាសមាជិកណាតូចំនួន៦ ដែលកំពុងឈរជើងនៅប្រទេសបាល់ទិក ហើយក្នុងនោះ មានប្រហែលពាក់កណ្តាលគឺជាកងកម្លាំងអាល្លឺម៉ង់។

រដ្ឋមន្ត្រីការពារជាតិអាល្លឺម៉ង់លោក Boris Pistorius បានហៅការដាក់ពង្រាយដែលបានគ្រោងទុកនេះថាជា “គម្រោងភ្លើងបញ្ចាំងទៅយុគសម័យមួយ” ហើយលោករដ្ឋមន្ត្រីថែមទាំងបានពន្យល់ថា ជាមួយនឹងការផ្លាស់ប្តូរនេះ ទីក្រុងបែរឡាំង កំពុងព្យាយាមបង្ហាញពីសាមគ្គីភាព និងការទទួលខុសត្រូវនៅក្នុងតំបន់ស្លាបខាងកើត ដោយសារតែលោកចាត់ទុកប្រទេសរុស្ស៊ីថាជាការគំរាមកំហែងមួយ ។

ទោះបីជាយ៉ាងណាក៏ដោយ រុស្ស៊ី បានព្រមានម្តងហើយម្តងទៀត ដល់អង្គការណាតូ ប្រឆាំងនឹងការចល័តកងកម្លាំង ខិតទៅជិតព្រំដែនរបស់ខ្លួន ដោយនិយាយថា ទីក្រុងមូស្គូ នឹងឆ្លើយតប ទៅការបង្កើនយោធានៅអឺរ៉ុបខាងកើត ក្នុងកម្រិតខ្ពស់ជាងរដ្ឋប្រហារគាំទ្រដោយលោកខាងលិចនៅទីក្រុងកៀវក្នុងឆ្នាំ ២០១៤ និងជម្លោះជាបន្តនៅតំបន់ Donbass ទៅទៀត ៕

ប្រែសម្រួល៖ Vann Vann

ប្រភព៖ RT

ចុចអាន៖ រថក្រោះ Leopard ចំនួន១០គ្រឿងទៀត នឹងទៅដល់អ៊ុយក្រែន ក្នុងសប្តាហ៍នេះ