ពានសម្តេចក្រឡាហោមចាប់ផ្តើមព្រឹកនេះជាឱកាសរើសកីឡាករជម្រើសជាតិបន្ថែម

ការប្រកួតបាល់ទះពានរង្វាន់សម្ដេចក្រឡាហោម ស ខេង ឆ្នាំ២០២៣ ចាប់ផ្តើម​វេលា​ម៉ោង​៩​ព្រឹក ថ្ងៃទី៩ ខែវិច្ឆកា ឆ្នាំ២០២៣ ក្នុងវិមានសាលនៃពហុកីឡដ្ឋានជាតិអូឡាំពិក។ ការប្រកួតឆ្នាំនេះមានក្រុមចួលរួមចំនួន២៩ មកពីសមាគមនិងក្លិបទូទាំង២៥រាជធានី-ខេត្ត។

លោក អាំង សិរីពិសិដ្ឋ អនុប្រធាន និង​ជា​អគ្គលេខាធិការ​សហព័ន្ធកីឡាបាល់ទះកម្ពុជា បាននិយាយថា៖«សម្រាប់ការប្រកួតពានរង្វាន់សម្ដេចក្រឡាហោម ស ខេង ជាឱកាសសម្រាប់សហព័ន្ធបាល់ទះកម្ពុជា សម្លឹងមើលយុវជនបន្តវេន​កីឡាកររៀមច្បង ដែលបានបង្កើតស្នាដៃជូនជាតិរួចមកហើយ។ ក្នុងវិស័យមួយនេះចំពោះរឿងអាយុកីឡាករគ្មានអ្វីនៅថិតថេរទេ នៅពេលពួកគេមានអាយុច្រើនគឺទម្រង់លេងក៏មានការធ្លាក់។​ ដូច្នេះសហព័ន្ធបាល់ទះត្រូវ​ស្វែងរកកីឡាករថ្មីៗ ដើម្បី​ជំនួសតំណែងកីឡាករអាយុច្រើន»។

ការប្រកួតពានរង្វាន់បាល់ទះ សម្តេច ក្រឡាហោម ស ខេង ឆ្នាំ២០២៣ ដែលក្រុម-សមាគម​២៩​មកពីរាជធានីខេត្ត​ត្រូវ​ប្រកួ​តសន្សំ​ពិន្ទុតាមពូលក្រុម​ដែល​មាន​ចំណាត់​ថ្នាក់​លេខ១ និងលេខ២ មានឈ្មោះឡើងទៅទៅវគ្គ៨ ក្រុម​ចុង​ក្រោយដើម្បីបន្តកៅអីរកក្រុមខ្លាំងចូលដល់វគ្គពាក់កណ្ដាល​ផ្ដាច់ព្រ័ត្រ និង​វគ្គ​ផ្ដាច់ព្រ័ត្រ។

សម្រាប់ការចូលពី​សមាគមនិងក្លិបយ៉ាងច្រើនឆ្នាំនេះ បានបង្ហាញពីសក្តានុពល​កីឡាបាល់ទះបាល់ទះនៅកម្ពុជាមានការអភិវឌ្ឍ​ខ្លាំងក្នុងរយៈពេលប៉ុន្មានឆ្នាំចុងក្រោយ។ ជាពិសេសក្នុងព្រឹត្តិការណ៍សុីហ្គេមលើកទី៣២ ក្រុមបាល់ទះជម្រើសជាតិកម្ពុជាដណ្ដើមបានមេដាយប្រាក់ក្នុងនាមជាម្ចាស់ផ្ទះ។

លោក អាំង សិរីពិសិដ្ឋ បានបន្ថែមថា​៖«សម្រាប់កំណើនក្លិបចូលរួមប្រកួតប្រជែងឆ្នាំនេះគឺបង្ហាញថា វិស័យបាល់ទះនៅកម្ពុជារបស់យើងមានការអភិវឌ្ឍទៅមុខឥតឈប់ឈរ។ ដូច្នេះទើបឆ្នាំនេះមានក្លិបចូលរួមយ៉ាងច្រើន សម្រាប់ការប្រកួតនេះក៏ជាឱកាស​មួយចំពោះសហព័ន្ធបាល់ទះកម្ពុជា ក្នុងការសម្លឹងមើល​យុវជនបន្តវេន​ដើម្បីអាចបន្តវេនពីកីឡាកររៀមច្បង»៕

អត្ថបទ៖ ផា រតនា