សម្ដេចធិបតី ហ៊ុន ម៉ាណែត ណែនាំឲ្យយកចិត្តទុកដាក់ លើការប្រឈមនឹងហានិភ័យសន្តិសុខ បែបមិនប្រពៃណី

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា ប្រទេសកម្ពុជា មានហានិភ័យតិចណាស់ ចំពោះការប្រឈម និងការគំរាមកំហែងបច្ចុប្បន្ន ពីសំណាក់សង្រ្គាមបែបប្រពៃ​ណី ឬសង្រ្គាមបែបប្រើប្រាស់កម្លាំងធំទល់កម្លាំងធំ។

ប៉ុន្តែអ្វីដែលកម្ពុជា ត្រូវយកចិត្តទុកដាក់នោះគឺការប្រឈមនឹងហានិភ័យសន្តិសុខបែបមិនប្រពៃណី ដែលរួមមាន៖ ការប្រយុទ្ធប្រឆាំងនឹងអំពើភេរកម្ម, ឧក្រិដ្ឋកម្មផ្សេងៗ, ការប្រឈមនឹងគ្រោះមហន្ដរាយគ្រប់ប្រភេទ និងហានិភ័យពីសន្តិសុខផ្នែកប្រព័ន្ធបច្ចេកវិទ្យា (Cyber security)។

ការលើកឡើងនេះ នៅពេលដែលសម្ដេចធិបតី ហ៊ុន ម៉ាណែត បានអញ្ជើញជាអធិបតីក្នុងពិធីអបអរសាទរខួបអនុស្សាវរីយ៍លើកទី ២៨ ថ្ងៃបង្កើតបញ្ជាការដ្ឋានទ័ពពិសេស ( ៩ វិច្ឆិកា ១៩៩៥-៩ វិច្ឆិកា ២០២៣ ) នាព្រឹកថ្ងៃទី ១០ ខែវិច្ឆិកា ឆ្នាំ ២០២៣នេះ។

សម្ដេចធិបតី ហ៊ុន ម៉ាណែត បានថ្លែងបែបនេះថា «ពិតណាស់ កងយោធពលខេមរភូមិន្ទ គឺយើងមានប្រវត្តិយូរ ហើយម្សិលមិញ ក៏យើងប្រារព្ធខួបកំណើតនៃកងយោធពលខេមរភូមិន្ទ ប៉ុន្តែគ្រប់សម័យកាល ហានិភ័យ និងការប្រឈមគឺខុសគ្នា ដែលយើងឆ្លងកាត់ ជាក់ស្ដែងការប្រឈម និងការគំរាមកំហែងបច្ចុប្បន្ន ពីសំណាក់សង្រ្គាមបែបប្រពៃណី សង្រ្គាមបែបប្រើប្រាស់កម្លាំងធំទល់កម្លាំងធំ នៅកម្ពុជាគឺមានហានិភ័យតិចណាស់ ប៉ុន្តែអ្វីដែលយើងត្រូវយកចិត្តទុកដាក់ គឺការប្រឈមនឹងហានិភ័យសន្តិសុខបែបមិនប្រពៃណី ក្នុងនោះការប្រយុទ្ធប្រឆាំងជាមួយនឹងអំពើភេរកម្ម, ឧក្រិដ្ឋកម្មផ្សេងៗ, ការប្រឈ​មនឹងគ្រោះមហន្ដរាយគ្រប់ប្រភេទ ហើយនឹងហានិភ័យពីសន្តិសុខផ្នែកប្រព័ន្ធបច្ចេកវិទ្យា ឬមួយ(Cyber security)»។

សម្ដេចនាយករដ្ឋមន្ត្រី បានបន្ថែមថា កិច្ចការប្រយុទ្ធប្រឆាំងនឹងបញ្ហាខាងលើនេះ គឺទាមទារឲ្យគ្រប់ស្ថាប័នជាតិ ជាពិសេសកម្លាំងសន្តិសុខ ដែលក្នុងនោះក៏មានកងទ័ពផងដែរ ត្រូវបន្តយកចិត្តទុកដាក់​វាយតម្លៃ និងកែសម្រួលរចនាសម្ព័ន្ធជាបន្តបន្ទាប់៕