ទីក្រុងកៀវ៖ រុស្ស៊ីនិងអ៊ុយក្រែន មិនអាចចុះហត្ថលេខាលើសន្ធិសញ្ញាសន្តិភាព បានទេ

រុស្ស៊ី និងអ៊ុយក្រែន ប្រហែលជាមិនអាចចុះហត្ថលេខាលើសន្ធិសញ្ញាសន្តិភាពផ្លូវការណាមួយ ដើម្បីបញ្ចប់ជម្លោះបច្ចុប្បន្ននោះទេ។ នេះបើតាមសម្តីលោក Kirill Budanov ប្រធានផ្នែកចារកម្មយោធាអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទវិចារណកថាដែលចេញផ្សាយកាលពីដើមសប្តាហ៍ លោក​បាន​ចង្អុល​ទៅប្រទេស​រុស្ស៊ីនិង​ជប៉ុន ដែល​មិនធ្លាប់​ចុះ​ហត្ថលេខា​លើ​សន្ធិសញ្ញា​សន្តិភាព​ពេញលេញ​មួយសោះ ​ក្រោយ​សង្រ្គាម​លោក​លើក​ទី​ពីរ ​ដោយសារតែ​ការ​ទាមទារ​របស់ទី​ក្រុង​តូក្យូ​លើ​ប្រជុំ​កោះ Kuril។

លោក Budanov បានសរសេរក្នុងបទវិចារណកថាសម្រាប់ទស្សនាវដ្តី NV ថា “មានករណីជាច្រើននៅក្នុងប្រវត្តិសាស្ត្រ ពេលដែលសង្រ្គាមចាស់រវាងរដ្ឋនានា មិនត្រូវបានបញ្ចប់ដោយស្របច្បាប់។ ឧទាហរណ៍ជាក់ស្តែងគឺរុស្ស៊ីនិងជប៉ុន, ពួកគេមិនបានចុះហត្ថលេខាលើកិច្ចព្រមព្រៀងសន្តិភាពក្រោយឆ្នាំ១៩៤៥ទេ ដោយសារតែជម្លោះលើកោះភាគខាងជើង ដែលត្រូវបានគេស្គាល់ថាជាកោះ Kuril ក្នុងប្រទេសរុស្ស៊ី។ ឥឡូវបញ្ហាទឹកដីនេះ មានរយៈពេល៧០ឆ្នាំហើយ។ នេះជាមូលហេតុដែលសេណារីយ៉ូបែបនេះ ទំនងជាស្ថិតនៅក្នុងករណីរបស់យើង”។

ការអត្ថាធិប្បាយនេះកើតឡើង ចំពេលការវាយបករបស់ទីក្រុងកៀវ ដែលចាប់ផ្តើមកាលពីរដូវក្តៅ មិនទទួលបានជ័យជម្នះសំខាន់ណាមួយសោះ។

កងទ័ពអ៊ុយក្រែន បានតស៊ូដើម្បីទម្លុះខែលការពារដ៏រឹងមាំនិងឆ្លងកាត់ចម្ការមីនដ៏ក្រាស់ ប៉ុន្តែពួកគេត្រូវបាត់បង់រថក្រោះជាច្រើនដែលផ្គត់ផ្គង់ដោយអង្គការណាតូ និងរថពាសដែកផ្សេងទៀតនៅក្នុងប្រតិបត្តិការនេះ៕

ប្រែសម្រួល៖ Vann Vann

ប្រភព៖ RT

ចុចអាន៖ ប្រទេសមួយទៀត ប្រកាសឈប់ផ្តល់ជំនួយយោធា ឲ្យអ៊ុយក្រែន