នាយករដ្ឋមន្ត្រីកម្ពុជា លើកឡើងថា គ្រប់សាសនាទាំងអស់ សុទ្ធតែមានគោលបំណងដូចគ្នា

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា លើកឡើងថា គ្រប់សាសនាទាំងអស់ សុទ្ធតែមានគោល បំណងដូចគ្នា គឺការអប់រំមនុស្ស និងអ្នកប្រតិបត្តិឲ្យប្រព្រឹត្តអំពើល្អ និងគោរពគ្នាទៅវិញទៅមក។ ការលើកឡើងនេះ ធ្វើឡើងក្នុងពិធីស្រោចស្រពព្រះសុគន្ធវារី «ប្រគេនសម្តេច និងព្រះមន្ត្រីសង្ឃជាន់ខ្ពស់នៃគណៈមហានិកាយ នៅព្រះរាជា ណាចក្រកម្ពុជា» នៅព្រឹកថ្ងៃទី ១៧ ខែវិច្ឆិកា ឆ្នាំ ២០២៣នេះ។

សម្ដេចធិបតី ហ៊ុន ម៉ាណែត មានប្រសាសន៍ថា គ្រប់សាសនាទាំងអស់ មិនថា សាសនាព្រះពុទ្ធ, សាស​នា​ឥស្លាម, គ្រិស្តសាសនា និងសាសនាផ្សេងទៀត សុទ្ធតែមានគោលបំណងដូចគ្នា គឺការអប់រំមនុស្ស និងអ្នកប្រតិបត្តិឲ្យមានផ្នត់គំនិត ស្មារតី សុចរិតភាព ប្រព្រឹត្តអំពើល្អ និងគោរពគ្នាទៅវិញទៅមក។

សម្ដេចនាយករដ្ឋមន្ត្រី មានប្រសាសន៍បន្តថា «ដែលនេះជាមូលដ្ឋាន សម្រាប់ការរស់នៅប្រកបដោយសីលធម៌ គុណធម៌ និងការគោរពគ្នា និងសុខដុម​រមនា​ ការកំណត់តម្លៃនៅក្នុងខ្លួន គឺជាកិច្ចការសំខាន់ ហើយជាពិសេសនៅក្នុងសម័យទំនើប នៅក្នុងសម័យដែលយើងមានជម្រើសច្រើន ជាពិសេសសម្រាប់យុវជន-យុវនារី សម្រាប់កុមារដែលនឹងក្លាយទៅជាអនាគតរបស់ប្រទេសជាតិយើង ដែលទាមទារចាំបាច់ នៅក្នុងការកំណត់នៃតម្លៃនៅក្នុងខ្លួន ឲ្យបានច្បាស់លាស់»។

សម្ដេចធិបតី ហ៊ុន ម៉ាណែត លើកឡើងថា នៅពេលដែលប្រទេសកម្ពុជាជួបការលំបាក និងចេញពីរបបខ្មែរក្រហម គឺជម្រើស និងលទ្ធភាពនៅក្នុងការទទួលបាននូវការអប់រំ ឬព័ត៌មាន ឬមួយការទទួលនូវលទ្ធភាពតាមបែបផែនសម្ភារៈនិយម មិនទាន់មានច្រើន។ ដូច្នេះ ជម្រើសនៃការអប់រំនាពេលនោះ គឺផ្តោតខ្លាំងទៅលើការរៀនសូត្រ ទៅលើការបំពេញតួនាទីជាកូនល្អ និងជាសិស្សល្អ៕