៣ខែនេះ រាជរដ្ឋាភិបាលថ្មី សម្រេចបានសមិទ្ធផលធំៗចំនួន ៦ចំណុច

រាប់ពីថ្ងៃទី២២ ខែសីហា ដល់ថ្ងៃទី២២ ខែវិច្ឆិកា ឆ្នាំ២០២៣នេះ គឺគម្រប់ខួប៣ខែហើយ ដែលសម្ដេចធិបតី​ ហ៊ុន ម៉ាណែត ប្រមុខរាជរដ្ឋាភិបាលអាណត្តិទី៧បានដឹកនាំប្រទេសបានយ៉ាងល្អ និងសម្រេចជោគជ័យបាននូវសមិទ្ធផលធំៗចំនួន ៦ចំណុច។ នេះបើតាមការបង្ហាញពីអង្គភាពអ្នកនាំពាក្យរដ្ឋាភិបាល នៅថ្ងៃគម្រប់ខួប៣ខែនេះ។

បើតាមអង្គភាពអ្នកនាំពាក្យរដ្ឋាភិបាល សមិទ្ធផលទាំង ៦ចំណុច ដែលរដ្ឋាភិបាលអាណត្តិទី៧ សម្រេចបាន មានដូចជា៖សមិទ្ធផលធំទី១៖ គឺការរក្សាបាននូវសន្តិភាព ស្ថិរភាពសង្គមនយោបាយ សេដ្ឋកិច្ច និងដំណើរការរក្សាបាននូវសន្តិភាព ស្ថិរភាពសង្គមនយោបាយ សេដ្ឋកិច្ច និងដំណើរការជាប្រក្រតីនៃរដ្ឋបាលសាធារណៈ រួមទាំងការអភិវឌ្ឍន៍។  ពោល គឺរាជរដ្ឋាភិបាលដឹកនាំដោយសម្តេចធិបតី ហ៊ុន ម៉ាណែត គឺធានាប្រក្រតីភាពគ្រប់យ៉ាង​ និងធានាការពារ​សមិទ្ធផលទាំងឡាយ​ដែលរាជរដ្ឋាភិបាលសម្តេចតេជោ​កសាងឡើងមិនឱ្យបានត់បង់ ឬមិនឱ្យសូម្បីតែការប្រែប្រួលជាអវិជ្ជមានណាមួយឡើយ។

សមិទ្ធផលទី២៖ ក្នុងអាណត្តិទី៧នេះ រដ្ឋាភិបាលបានដាក់ចេញយុទ្ធសាស្ត្របញ្ចកោណចំនួន ៥ចំណុច ហើយក្នុងនោះសម្តេចធិបតី ក៏បានដាក់ចេញនូវកម្មវិធីគោលនយោបាយអាទិភាព ៦យ៉ាងដែលត្រូវអនុវត្តជាបន្ទាន់ក្នុងឆ្នាំ ២០២៣។ គោលនយោបាយទាំងនោះមានដូចជា៖

ចំណុចទី១ សុខភាព៖ ការផ្តល់សេវាថែទាំសុខភាពជូនគ្រួសារងាយរងហានិភ័យ តាមរយៈកម្មវិធី២គឺ ទី១៖ ការពង្រីកមូលនិធិសមធម៌សុខាភិបាល និងទី២៖ ការពង្រីក​របបសន្តិសុខសង្គមថែទាំសុខភាពតាមរបបភាគទានដោយស្ម័គ្រចិត្តសម្រាប់បុគ្គល​ស្វ័យ​និយោជន៍ និងអ្នកក្នុងបន្ទុកនៃសមាជិក ប ស ស ( ទាំងសម្រាប់កម្មករ និយោជិត មន្ត្រីសាធារណៈ)។ កម្មវិធីទី១គឺ “ត្រូវបាន​ប្រកាសដាក់ឱ្យអនុវត្ត​កាលពីថ្ងៃទី២៤ តុលា​​ ដែលនឹងផ្តល់​ប្រយោជន៍​ដល់គ្រួសារជនងាយរងហានិភ័យ”សរុបជាង ៤៩ ម៉ឺន គ្រួសារ ឬស្មើនឹងជាង ១.៨ លាន នាក់បន្ថែម​ទៀតដែលធ្វើឱ្យមូលនិធិសមធម៌គ្របដណ្តប់ប្រជាពលរដ្ឋជាង ៤លាននាក់ ។ ចំណែក កម្មវិធីទី២គឺ ការពង្រីក​របបសន្តិសុខសង្គមថែទាំសុខភាពរបស់ ប.ស.ស តាមរបបភាគទានដោយស្ម័គ្រចិត្តត្រូវបានប្រកាសឱ្យប្រើកាលពីថ្ងៃទី​១៣ វិច្ឆិកា ហើយកម្មវិធីនេះនឹង​គ្របដណ្តប់​ប្រជាពលរដ្ឋជាង ៥លាននាក់។ សរុបទៅ កម្មវិធីថែទាំសុខភាពទាំងពីរគ្របដណ្តប់​ប្រជាពលរដ្ឋជាង ៩ លាននាក់។ ដូច្នេះ មានន័យថា សេវាថែទាំសុខភាពគ្របដណ្តប់ជាសាកលដែលជាគោលដៅ​របស់សម្តេចធិបតីក្នុងកម្មវិធីគោលនយោបាយអាទិភាពទី១នេះនឹងឈានដល់គោលដៅក្នុងរយៈពេលមិនយូរខាងមុខនេះ។

ចំណុចទី២ ការបណ្តុះបណ្តាលជំនាញវិជ្ជាជីវៈនិងបច្ចេកទេស៖ ជូនយុវជនមកពីគ្រួសារក្រីក្រនិងងាយរងហានិភ័យ សរុបប្រមាណជា ១,៥ លាននាក់ទូទាំងប្រទេស ដោយឥតគិតថ្លៃ ហើយទទួលបានប្រាក់ឧបត្ថម្ភ ២៨០ ០០០ រៀលក្នុងមួយខែ ដែលប្រកាសឱ្យអនុវត្តកាលពីថ្ងៃទី១៤ ខែវិច្ឆិកាកន្លងទៅ។ ចំណុចទី៣​ លើកកម្ពស់​កម្មវិធីជាតិជំនួយសង្គម៖ដើម្បីជួយដល់ គ្រួសារក្រីក្រ និងងាយរងហានីភ័យឱ្យ​បានទូលំទូលាយនិង​ច្បាស់លាស់។ គោលដៅសំខាន់បំផុតរបស់សម្តេចធិបតីគឺ ពលរដ្ឋក្រីក្រនិងងាយរងហានីភ័យ​ត្រូវតែ​ទទួលបាន​ជំនួយសង្គមនៅពេលដែលពួកគេរងគ្រោះ ឬជួបវិបត្តិដោយប្រការណាមួយ​។ ដើម្បីធានាការងារនេះឱ្យបានច្បាស់លាស់​ ចាំបាច់ត្រូវពង្រឹង​យន្តការនេះរឹងមាំ និងប្រកប​ដោយប្រសិទ្ធភាព​ខ្ពស់។ កម្មវិធីនេះរៀបចំដោយក្រសួងសង្គមកិច្ចគ្រោងនឹងប្រកាសដាក់ឱ្យអនុវត្ត​នាដើមខែធ្នូខាងមុខនេះ។

ចំណុចទី៤ ការអភិវឌ្ឍសេដ្ឋកិច្ចក្រៅប្រព័ន្ធ៖យុទ្ធសាស្ត្រជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធ ឆ្នាំ ២០២៣-២០២៨ ត្រូវបានប្រកាសឱ្យអនុវត្ត​ជាផ្លូវការ កាលពីថ្ងៃទី១០ តុលា។ យុទ្ធសាស្ត្រជាតិនេះមានគោលដៅជួយគាំពារ ជំរុញសេដ្ឋកិច្ចក្រៅប្រព័ន្ធឱ្យរីកលូតលាស់ហើយអាចចូលក្នុងប្រព័ន្ធ​ដើម្បីទទួលបានអត្ថប្រយោជន៍​ផ្សេងៗពីរាជរដ្ឋាភិបាល និងអាចទទួលបានផលប្រយោជន៍ពីប្រព័ន្ធគាំពារសង្គមផ្លូវការ តាមរយៈ (១)ការផ្តល់ការគាំពារ បង្កើតនូវបរិយាកាសអំណោយផលសឹម្រាប់អាជីវកម្ម, ការបណ្តុះបណ្តាលជំនាញបច្ចេកទេសនិងវិជ្ជាជីវៈដល់ក្រុមហ៊ុន សហគ្រាសធុនមីក្រូ តូច និងមធ្យម និង(២). ការផ្តល់ការគាំពារសង្គមដល់បុគ្គលស្វ័យនិយោជន៍ក្នុងសេដ្ឋកិច្ចក្រៅប្រព័ន្ធដោយផ្តោតការយកចិត្ត ទុកដាក់ជាបឋម លើការផ្តល់សេវាថែទាំសុខភាពនៅក្រោមមូលនិធិសមធម៌សុខាភិបាល។

ទី៥ ជួយកសិករ​ក្នុងវិស័យកសិកម្ម៖ យន្តការសម្របសម្រួលនិងកម្មវិធីហិរញ្ញប្បទានដើម្បីលើកស្ទួយផលិតកម្ម,​ រកទីផ្សារ និងរក្សាលំនឹងថ្លៃផលិតផលកសិកម្ម។ ប្រកាសដាក់ឱ្យអនុវត្ត​នៅថ្ងៃ​ទី ២០ វិច្ឆិកា ។  គោលបំណងគឺដើម្បី ជួយកសិករក្នុងការបង្កើនផលិតកម្មរបស់ខ្លួន ពោល គឺ​ឱ្យ​កសិករផលិត​ឱ្យបានច្រើនជាងមុន, មានទីផ្សារលក់ និងរក្សាស្ថិរភាពតម្លៃ។ ក្នុងផែនការនេះ រាជរដ្ឋាភិបាល​ត្រៀមកញ្ចប់ថវិកា ១០០ លានដុល្លារ ដើម្បីចាប់ផ្តើម។ អាចវិភាជថវិកាបន្ថែម​ប្រសិនបើចាំបាច់។ ទី៦ ដាក់ពង្រាយមន្ត្រីបច្ចេកទេសកសិកម្មនៅគ្រប់ឃុំសង្កាត់ដែលមានសកម្មភាពកសិកម្ម៖គឺជាការ​បង្ខិតសេវាបម្រើកសិករឱ្យទៅកៀក​កសិករតែម្តង។  ក្រសួងកសិកម្ម​នឹងដាក់ពង្រាយមន្ត្រីជំនាញកសិកម្ម ១ ៦០០ នាក់ ទូទាំងប្រទេសពីពេលនេះដល់ ២០២៥។  ទន្ទឹមនឹងនោះ រាជរដ្ឋាភិបាល​មានផែនការរៀបចំឱ្យមានសហគមន៍កសិកម្មទំនើប។ គោលដៅ៖ ប្រែក្លាយកសិកម្មកម្ពុជា​ពីកសិកម្មជាលក្ខណៈគ្រួសារទៅជាសហគ្រាសសេដ្ឋកិច្ចកសិកម្ម​ដ៏រឹងមាំ។

សមិទ្ធផលទី៣៖ គឺការបង្កើតអាជ្ញាធរដោះស្រាយវិវាទក្រៅប្រព័ន្ធតុលាការ ដែលព្រះមហាក្សត្រឡាយព្រហស្ថលេខាលើព្រះរាជ្យក្រឹត្យនៅថ្ងៃទី២ ខែវិច្ឆិកា ឆ្នាំ២០២៣។ ក្រសួងយុត្តិធម៌កំពុង​រៀបចំបែបបទនីតិវិធីក្រមប្រតិបត្តិ និងក្រមសីលធម៌ដើម្បីផ្សព្វផ្សាយនិងអនុវត្ត។ នេះគឺជាសមិទ្ធផលថ្មីមួយដែលរាជរដ្ឋាភិបាលនីតិកាលទី ៧ នៃរដ្ឋសភា ដឹកនាំដោយសម្តេចធិបតី ហ៊ុន ម៉ាណែត សម្រេច​ធ្វើ​ដើម្បីផលប្រយោជន៍ប្រជាពលរដ្ឋ៖ ផ្តល់ជម្រើសងាយស្រួលនិងថ្មី​ឱ្យប្រជាពលរដ្ឋ​ទទួលបានសេវាយុត្តិធម៌​ដែលនៅកៀកខ្លួន។ កាត់បន្ថយ​សំណុំរឿងនៅឯតុលាការ និងកាត់បន្ថយទំនាស់នៅក្នុងសហគមន៍ដែលជាផ្នែកមួយនៃការបង្កើតសុខដុមរមនីយកម្ម​នៅក្នុងឃុំសង្កាត់។

សមិទ្ធផលទី៤៖ រយៈពេល៣ខែមកនេះ សម្តេចធិបតី ហ៊ុន ម៉ាណែត បានចុះជួបសំណេះសំណាលជាមួយកម្មករ និយោជិតចំនួន២០លើក ដែលមានអ្នកចូលរួមសរុបចំនួនប្រមាណ ២៨ម៉ឺននាក់។ ក្នុងជំនួបនេះ សម្តេចធិបតី ក៏បានជួយដោះស្រាយបញ្ហាជូនពួកគេនូវ ៦ចំណុច ដូចជា ការដំឡើងប្រាក់ខែ ជំរុញសេវាថែទាំសុខភាព សម្រ​បសម្រួលឱ្យកម្មករនិយោជិតចូលរៀនជំនាញបណ្តុះបណ្តាលវិជ្ជាជីវៈ យកចិត្តទុកដាក់ជាមួយស្ត្រីមានផ្ទៃពោះ និងជនមានពិការភាព និងចំណុចផ្សេងទៀត។

សមិទ្ធផលទី៥៖ កិច្ចប្រជុំគណៈរដ្ឋមន្ត្រីចំនួន ៣លើក បានសម្រេចអនុម័តសេចក្តីព្រាងច្បាប់សំខាន់ៗចំនួនជាង ១០ក្នុងនោះមាន ការពិនិត្យនិងសម្រេចសេចក្តីព្រាងច្បាប់ស្តីពីការបង្កើត “រដ្ឋលេខាធិការដ្ឋានកិច្ចការព្រំដែន។ សេចក្តីព្រាងច្បាប់ស្តីពីការបង្កើតរដ្ឋលេខាធិការដ្ឋានអាកាសចរណ៍ស៊ីវិល។  សេចក្តីព្រាងព្រះរាជក្រឹត្យស្តីពីការរៀបចំ និងការប្រព្រឹត្តទៅនៃគណៈកម្មាធិការកែទម្រង់រដ្ឋបាល​សាធារណៈ។ ចក្តីព្រាងអនុក្រឹត្យស្តីពីការរៀបចំ និងការប្រព្រឹត្តទៅនៃក្រសួងមុខងារសាធារណៈ។ សេចក្តីព្រាងព្រះរាជក្រឹត្យស្តីពី “ការបង្កើត ការរៀបចំ និងកិច្ចដំណើរការរបស់អាជ្ញាធរជាតិដោះស្រាយ វិវាទក្រៅប្រព័ន្ធតុលាការ”។ល។ និង។ល។

សមិទ្ធផលទី៦៖ វេទិការាជរដ្ឋាភិបាល ផ្នែកឯកជន កាលពីថ្ងៃទី ១៣ វិច្ឆិកា សម្តេចធិបតីបានសម្រេចដាក់ចេញគោលនយោបាយជាច្រើនដើម្បីជួយដល់ផ្នែកឯកជន មានដូចជាវិស័យទេសចរណ៍, អចលនទ្រព្យ ជាដើម៕