សម្ដេចធិបតី ហ៊ុន ម៉ាណែត ៖ បើហៅខ្ញុំផ្ដាច់ការ ដោយសារខ្ញុំប្ដេជ្ញាចិត្តការពារសន្តិភាព ខ្ញុំសុខចិត្តទទួលចុះ

សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា បើសិនជាការប្ដេជ្ញាចិត្តរក្សាថែរក្សាសន្តិភាព និងស្ថិរភាពឲ្យប្រជាពលរដ្ឋមានសេចក្ដីសុខ ហើយត្រូវបានគេចោទថា ផ្ដាច់ការ គឺសម្ដេច សុខចិត្តឲ្យគេចោទចុះ។

ការលើកឡើងនេះ ធ្វើឡើងក្នុងពិធីបិទស្ទឹង និងបើកការដ្ឋានសាងសង់ទំនប់វារីអគ្គីសនីស្ទឹងតាតៃលើ នៅស្រុកថ្មបាំង ខេត្តកោះកុង នាព្រឹកថ្ងៃទី ៣០ ខែវិច្ឆិកា ឆ្នាំ ២០២៣នេះ។

សម្ដេចធិបតី ហ៊ុន ម៉ាណែត បានថ្លែងថា «ហើយអ្នកដែលចោទខ្ញុំ…ឲ្យតែរដ្ឋាភិបាលនិយាយសន្តិភាព គឺស្មើនឹងផ្ដាច់ការ…ឲ្យតែយើងនិយាយថា យើងត្រូវតែខិតខំថែរក្សាសន្តិភាព ស្ថិរភាព ឲ្យបា​នទោះក្នុងតម្លៃណាក៏ដោយ នេះគឺជាការប្ដេជ្ញាចិត្ត ហើយគេតែងតែថា ​នេះគឺជាការផ្ដាច់ការ»។

សម្ដេចធិបតី ហ៊ុន ម៉ាណែត បានលើកឡើងថា​ បើសិនជាការប្ដេជ្ញាចិត្តថែរក្សាសន្តិភាព និងស្ថិរភាពឲ្យប្រជាពលរដ្ឋ ហើយត្រូវបានគេចោទថា ផ្ដាច់ការ គឺសម្ដេចសុខចិត្តឲ្យគេចោទ ជាជាងឲ្យប្រជាជនចោទថា អសមត្ថភាពធ្វើឲ្យមានសង្រ្គាមឡើងវិញ។

សម្ដេចនាយករដ្ឋមន្ត្រី បានបន្ថែមថា «បើថាហៅខ្ញុំ ផ្ដាច់ការ ដោយសារខ្ញុំប្ដេជ្ញាចិត្តការពារសន្តិភាព មិនឲ្យប្រជាពលរដ្ឋស្លាប់ មិនឲ្យប្រទេសដើរថយក្រោយដូចពេលដែលយើងបាត់សន្តិភាព ដូចកាលពីមុននោះ ខ្ញុំសុខចិត្តទទួលចុះ»។

សម្ដេចធិបតី ហ៊ុន ម៉ាណែត បានបន្ថែមថា សម្ដេច មិនឲ្យប្រជាជនចោទថា អសមត្ថភាព ថែក្សាសេចក្ដីសុខ សុខសន្តិភាព ដែលរកបានដោយការលំបាកនោះទេ។ ដូច្នេះ ក្នុងនាមជាប្រមុខរាជរដ្ឋាភិបាល ត្រូវបន្តថែរក្សាការពារ សុខសន្តិភាព បន្តទៀត៕