ប្រាក់ខែមន្ត្រីកសិកម្មឃុំនឹងទទួលបានដូចគ្រូបង្រៀន ១,៤ លានរៀលនាឆ្នាំដំបូង រួមនឹងប្រាក់​ឧបត្ថម្ភផ្សេងៗ

​មន្ដ្រីកសិកម្មឃុំ ​ដែលត្រៀមនឹងប្រឡងជ្រើសរើសនៅថ្ងៃទី១៧ ខែធ្នូ ឆ្នាំ២០២៣ខាងមុខនេះ នឹង​ទទួល​បានប្រាក់បៀវត្សដូចគ្រូបង្រៀននៅតាមតំបន់ ពោលគឺអនុវត្តស្ដង់ដារតែមួយដូច​ដែលមាន​កំណត់ក្នុងច្បាប់ស្ដីពី សហលក្ខន្តិកៈមន្រ្តីរាជការស៊ីវិល។​

​ឯកឧត្តម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ ​មានប្រសាន៍នៅក្នុងសន្និសីទសារព័ត៌មាន​នៅរសៀលថ្ងៃទី ០៤ ខែធ្នូ ឆ្នាំ ២០២៣ថា មន្ត្រីកសិកម្មនឹងចូលក្នុងក្របខណ្ឌ «ក» «ខ», «គ» ក្រោយការ​ប្រឡងរួចរាល់ក្នុងដំណាក់កាលមួយឆ្នាំនៃការធ្វើកម្មសិក្សាតាមឃុំគោលដៅ មន្ត្រីកសិកម្ម ទទួល​បានប្រាក់បៀវត្សទាបបំផុត ១ លាន ៤ សែនរៀល តាមប្រភេទក្របខណ្ឌ និងទទួលបាន ប្រាក់​ឧបត្ថម្ភ ១ សែន ៦ ម៉ឺនរៀល ក្នុង១ខែ រួមនិងអត្ថប្រយោជន៍ផ្សេងៗទៀត។​

បើតាមឯកឧត្តមរដ្ឋមន្ត្រីរាជរដ្ឋាភិបាលយកមូលដ្ឋានអ្នកចេះជាប់ ដូចការប្រឡងបាក់ឌុបដែរ ខណៈយន្តការរៀបចំការប្រឡងធ្វើឡើងដោយយុត្តិធម៌ និងតម្លាភាព ហើយអនុញ្ញាតឱ្យភាគពាក់ព័ន្ធចូលរួមតាមដានដំណើរការប្រឡង និងកែវិញ្ញាសារ។

ការប្រឡងមន្ត្រីកសិកម្មឃុំ សង្កាត់ នឹងត្រូវរៀបចំឡើងនៅថ្ងៃទី ១៧ ខែធ្នូ ឆ្នាំ ២០២៣នេះ ដែលមានបេក្ខជន​ចូល​រួម​ប្រឡងសរុបមានចំនួន ៣ ៣២៩ នាក់ សម្រាប់ការជ្រេីសរេីស ២៥០ នាក់នៅឆ្នាំ ២០២៣។

នៅដេីមឆ្នាំ ២០២៤ ក្រសួងកសិកម្ម នឹងជ្រេីសរេីសថែម ៨០០ នាក់ទៀត និង ២០២៥ ថែម ៥៥០ នាក់ឲ្យគ្រប់ ១៦០០ នាក់។ ការប្រឡងមានមុខវិជ្ជាកសិកម្ម ចំណេះដឹងទូទៅ និងភាសាអងគ្លេស (កសិកម្ម)៕

អត្ថបទ៖ ឡេង ដេត