អត្រាភាពក្រីក្រកម្ពុជា ធ្លាក់ចុះក្រោម ១០ភាគរយ រយៈពេល ១៥ឆ្នាំ តែងើបឡើងវិញ​ដោយសារវិបត្តិសកល

អត្រាភាពក្រីក្រ នៅកម្ពុជា បានធ្លាក់ចុះជាបន្តបន្ទាប់ ក្នុងរយៈពេល ១៥ឆ្នាំមកនេះ ជាពិសេសចាប់ពីឆ្នាំ២០០៧ រហូតដល់ឆ្នាំ២០១៧ ពោលគឺដោយអត្រាភាពក្រីក្រថយមកក្រោម ១០ភាគរយ ប៉ុន្តែវិបត្តិកូវីដ-១៩ បានធ្វើឱ្យអត្រា​នៃភាពក្រីក្រនៅកម្ពុជា កើនឡើងជាង១៧ភាគរយវិញ។ នេះជាការបញ្ជាក់របស់សម្តេច ហ៊ុន ម៉ាណែត នាយករដ្ឋមន្រ្តីកម្ពុជា នៅក្នុងពិធីប្រកាសដាក់ឱ្យអនុវត្តជាផ្លូវការ “គោលការណ៍ណែនាំស្តីពីក្រប​ខណ្ឌកម្មវិធីជាតិ​ជំនួយសង្គមក្នុងកញ្ចប់គ្រួសារ និង​គោលការណ៍ណែនាំស្តីពីក្របខណ្ឌកិច្ចគាំពារសង្គមឆ្លើយតបនឹងគ្រោះអាសន្ន” នៅថ្ងៃទី ០៥ ខែ ធ្នូ ឆ្នាំ ២០២៣។

សម្តេចបានថ្លែងដូច្នេះថា« ក្នុងរយៈពេលជាង ១៥ឆ្នាំមកនេះ អត្រានៃភាពក្រីក្របានកាត់បន្ថយ ចាប់ពីឆ្នាំ២០០៧ ដែលយើងមានជាង ៤៧ភាគរយ ទៅដល់ឆ្នាំ២០១៧ ជាងក្រោម ១០ភាគរយ ប៉ុន្ដែដោយសារកូវីដ-១៩ យើងបាន​កើនឡើងវិញដល់ជាង១៧ភាគរយ»។

សម្ដេចនាយករដ្ឋមន្រ្តី បានគូសបញ្ជាក់ថា កម្ពុជា មានមោទកភាពក្រោយពីបញ្ចប់សង្គ្រាម ទទួលបានការ​អភិវឌ្ឍលើគ្រប់វិស័យ ក្នុងនោះ ជីវភាពរបស់ប្រជាពលរដ្ឋ ក៏មានការរីកចម្រើនជាបន្តបន្ទាប់ផងដែរ។

ទោះបីជាប្រជាពលរដ្ឋជាច្រើន មានជីវភាពរីកចម្រើន ដោយបានប្រែក្លាយជីវភាពភាពក្រីក្រ ទៅជីវភាពមធ្យម និងមាន​លទ្ធភាពឈានទៅជីវភាពកម្រិតខ្ពស់យ៉ាងណាក្តី រាជរដ្ឋាភិបាល ទទួលស្គាល់ថា ប្រជាពលរដ្ឋក្រីក្រនៅតែមាន ជាពិសេសស្ថានភាពបរិស្ថានសេដ្ឋកិច្ចសកល មិនអាចនៅថិតថេរនោះទេ។

ទោះបែបនេះក្តី សម្តេច ហ៊ុន ម៉ាណែត បានអះអាងថា រាជរដ្ឋាភិបាល អាណត្តិទី៧នេះ បានប្ដេជ្ញាចិត្ត​បន្តអនុវត្តកម្មវិធីគោល នយោបាយជាតិជំនួយសង្គម ខណៈក្នុងនីតិកាលទី៧នេះ ក្រៅតែពីការដាក់​ចេញនូវយុទ្ធសាស្ត្របញ្ចកោណដំណាក់កាលទី១ ដែលគោលនយោបាយស្នូលហើយនោះ រាជរដ្ឋាភិបាល ក៏បានដាក់ចេញកម្មវិធីនយោបាយ អាទិភាពចំនួន៥រួចហើយ ដើម្បីឆ្លើយតបបន្ទាន់ទៅនឹងបញ្ហាជីវភាព និងសុខភាពរបស់ប្រជាពលរដ្ឋ។

ដើម្បីសម្រេចបានចក្ខុវិស័យប្រែក្លាយកម្ពុជា ទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងប្រទេស​ចំណូលខ្ពស់នៅឆ្នាំ២០៥០ រាជរដ្ឋាភិបាលកម្ពុជា នៅតែផ្តោតទៅលើមនុស្សជាចម្បង ដែលនឹង​ជំរុញប្រព័ន្ធគាំ​ពារសង្គមឱ្យមានលក្ខណៈប្រមូលផ្តុំ សង្គតិភាព ប្រសិទ្ធភាព និងចីរភាព ដើម្បីឈរលើស្មារតីមិន​បោះបង់​ពលរដ្ឋណាម្នាក់ តាមរយៈការផ្តល់កិច្ចអន្តរាគមរបស់រដ្ឋាភិបាល ដល់គ្រួសារក្រីក្រ និងងាយរងគ្រោះ។

លោកបណ្ឌិត គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា បានលើកឡើងថា ពលរដ្ឋដែលងាយរងគ្រោះ គឺជាពលរដ្ឋដែលស្ថិតនៅក្នុងមុខរបរក្រៅប្រព័ន្ធ។ កន្លងមកមុខរបរនេះ ពុំសូវមានការគាំទ្រដោយ​សារមិនអាចចូល​ក្នុងប្រព័ន្ធបាន និងមានការរាយប៉ាយទូទាំងប្រទេស។ ដូច្នេះហើយ បញ្ហានៃភាពក្រីក្រ គឺកើតឡើង​ពីមុខរបរលក់​រាយតូចតាច ក្នុងសេដ្ឋកិច្ចក្រៅប្រព័ន្ធ។

លោកបណ្ឌិត បានគូសបញ្ជាក់ទៀតថា ទោះជាមានការគាំទ្រជាសាច់ពីរាជរដ្ឋាភិបាលយ៉ាងណាក្តី ក៏នៅក្នុងវិបត្តិកូវីដ និងវិបត្តិសេដ្ឋកិច្ចសកលនេះ ពលរដ្ឋងាយរងគ្រោះ បានធ្លាក់ចុះប្រាក់ចំណូល ដែលធ្វើឱ្យពួកគាត់​បន្តរស់នៅក្រោម​បន្ទាត់ភាពក្រីក្រ ដោយសារបាត់បង់មុខរបរ ដូចជាកម្មករសំណង់ កម្មករតាមរោងចក្រឧស្សាហកម្ម និងអ្នក​សេដ្ឋ​កិច្ចក្រៅប្រព័ន្ធជាដើម។

លោកបណ្ឌិត គី សេរីវឌ្ឍន៍ បានលើកជាគំនិតថា ដើម្បីរួមចំណែកកាត់បន្ថយភាពក្រីក្រ រដ្ឋាភិបាល ត្រូវលើក​កម្ពស់​វិស័យផលិតកម្មឱ្យបានច្រើន បង្កើតការងារដល់ពលរដ្ឋ ពង្រឹងសិប្បកម្ម ឧស្សាហកម្មឡើងវិញឱ្យបានរឹងមាំ ខណៈដែលគោលនយោបាយរបស់រដ្ឋាភិបាលថ្មីមានហើយ ពោលគឺបណ្តុះបណ្តាលវិជ្ជាជីវៈ។ លើសពីនេះទៀត រដ្ឋាភិបាល គួរទប់ស្កាត់ការវិនិយោគលើវិស័យអចលនទ្រព្យ ហើយងាកមកធ្វើការវិនិយោគលើវិស័យសិប្បកម្ម ផលិតកម្ម និងឧស្សាហកម្ម នោះនឹងជំរុញដល់ការកាត់បន្ថយភាពក្រីក្រកាន់តែល្អប្រសើរ៕