កូនប្រុសលោក Joe Biden រងការចោទប្រកាន់ពីបទគេចមិនបង់ពន្ធ

រដ្ឋអាជ្ញាសហព័ន្ធអាមេរិកបានដាក់ការចោទប្រកាន់ថ្មីចំនួន ៩ ករណីប្រឆាំងនឹងលោក Hunter Biden ហើយថែមទាំងបានចោទប្រកាន់កូនប្រុសលោក Joe Biden រូបនេះទៀតថា គេចវេះមិនបង់ពន្ធក្នុងទំហំទឹកប្រាក់ជាង ១ លានដុល្លារ ។

ក្នុងឯកសារដែលដាក់ទៅកាន់តុលាការសហព័ន្ធនៅរដ្ឋកាលីហ្វ័រញ៉ាបានរ៉ាយរ៉ាប់ថា “ចុងចោទបានចូលរួមក្នុងគម្រោងមួយដែលមានសុពលភាពរយៈពេល ៤ ឆ្នាំ ប៉ុន្តែមិនបានបង់ប្រាក់យ៉ាងហោចណាស់ ១.៤ លានដុល្លារចន្លោះឆ្នាំ ២០១៦ ដល់ឆ្នាំ ២០១៩” ។

ឯកសារនោះបន្ថែមទៀតថា ចន្លោះឆ្នាំ ២០១៦ ដល់ឆ្នាំ ២០២០ លោក Hunter Biden រកចំណូលបានជាង ៧ លានដុល្លារ ហើយបានចាយលុយទាំងនោះលើសារធាតុញៀន សណ្ឋាគារប្រណិត មិត្តស្រី ទិញរថយន្តទំនើបៗ សម្លៀកបំពាក់ប្រេនៗ និងរបស់របស់ផ្សេងទៀតជាច្រើន លើកលែងតែការបង់ពន្ធ ។

ស្របពេលជាមួយគ្នានេះ មិនមែនជាលើកដំបូងឡើយដែលលោក Hunter Biden រងការចោទប្រកាន់ពីរដ្ឋអាជ្ញាអាមេរិក ពោលកាលពីខែកញ្ញាកន្លងទៅ កូនប្រុសលោក Joe Biden រូបនេះក៏ត្រូវបានចោទប្រកាន់ពីបទកាន់កាប់កាំភ្លើងខុសច្បាប់ផងដែរ ។

គួរបញ្ជាក់ថា ប្រសិនបើលោក Hunter Biden ត្រូវបានរកឃើញមានជាប់ពាក់ព័ន្ធនឹងរឿងក្ដីក្ដាំទាំងនេះមែន នោះកូនប្រុសរបស់លោក Joe Biden រូបនេះអាចប្រឈមនឹងការជាប់ពន្ធនាគាររយៈពេល ១៧ ឆ្នាំ ហើយមុខមាត់របស់ឪពុកដែលកំពុងកាន់កាប់ជាប្រធានាធិបតីក៏ប៉ះពាល់ទៅតាមនោះផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ចិន ទាមទារឲ្យ អាមេរិក បញ្ឈប់ការគាំទ្រដល់កងកម្លាំងបំបែកខ្លួនដើម្បី “ឯករាជ្យតៃវ៉ាន់”