យន្តហោះចម្បាំងនិងបាឡុងចិន ហោះកាត់ច្រកសមុទ្រតៃវ៉ាន់ មួយខែមុនការបោះឆ្នោត

តៃវ៉ាន់និយាយនៅថ្ងៃសុក្រទី៨ខែធ្នូថា​ យន្តហោះចម្បាំងរបស់ចិនចំនួន១២គ្រឿង និងបាឡុងអាកាសធាតុ បានឆ្លងកាត់ខ្សែបន្ទាត់កណ្តាលដ៏រសើបរបស់ច្រកសមុទ្រតៃវ៉ាន់ ដែលនេះជាការបង្កើនភាពតានតឹងថ្មីទៀត, មួយខែមុនការបោះឆ្នោតប្រធានាធិបតីរបស់កោះនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រយៈពេលបួនឆ្នាំចុងក្រោយ កោះតៃវ៉ាន់ ដែលចិនអះអាងថាជាទឹកដីរបស់ខ្លួន តែងតែត្អូញត្អែរអំពីការល្បាតនិងសមយុទ្ធយោធារបស់ចិន ជាទៀងទាត់នៅជិតខ្លួន។

នៅថ្ងៃទី១៣ខែមករា តៃវ៉ាន់នឹងរៀបចំការបោះឆ្នោតជ្រើសរើសប្រធានាធិបតីនិងសភា ហើយបេក្ខជននីមួយៗ បានចាប់ផ្តើមយុទ្ធនាការឃោសនា ដោយដាក់ចេញគោលនយោបាយអំពីរបៀបដែលរដ្ឋាភិបាលបន្ទាប់ នឹងត្រូវដោះស្រាយបញ្ហាជម្លោះក៏ដូចជាទំនាក់ទំនងជាមួយចិន។

ក្រសួងការពារជាតិតៃវ៉ាន់បានផ្តល់ព័ត៌មានលម្អិតអំពីបេសកកម្មរបស់ចិន ដោយនិយាយថា យន្តហោះចម្បាំងចំនួន១២គ្រឿង បានឆ្លងកាត់ខ្សែបន្ទាត់កណ្តាល ដែលធ្លាប់បម្រើជារបាំងមិនផ្លូវការពុះចែកភាគីទាំងពីរ ប៉ុន្តែយន្តហោះចិនតែងតែហោះហើរកាត់ទីនោះ។

លើសពីនេះ ក្រសួងនិយាយថា ខ្លួនក៏បានឃើញបាឡុងចិនមួយនៅចម្ងាយ១៨៧គីឡូម៉ែត្រភាគនិរតីនៃទីក្រុង Keelung ដែលធ្វើដំណើរទៅទិសខាងកើត ឆ្លងកាត់ច្រកសមុទ្រផងដែរ។

តាមការបញ្ជាក់ពី រដ្ឋមន្ត្រីការពារជាតិតៃវ៉ាន់ លោក Chiu Kuo-cheng, ដំបូងគេសន្និដ្ឋានថា នោះគឺប្រហែលជាបាឡុងអាកាសធាតុ ប៉ុន្តែក្រសួង មានកាតព្វកិច្ចរាយការណ៍រឿងនេះជាសាធារណៈ ដើម្បីកុំឲ្យមានការភ័យខ្លាច។

ទោះបីជាយ៉ាងណាក៏ដោយ ក្រសួងការពារជាតិចិន មិនបានឆ្លើយតបនឹងសំណើសុំការអត្ថាធិប្បាយភ្លាមៗទេ។

តៃវ៉ាន់ មានការប្រុងប្រយ័ត្នខ្ពស់ចំពោះសកម្មភាពរបស់ចិន ទាំងផ្នែកយោធានិងនយោបាយ នៅមុនការបោះឆ្នោតរបស់ខ្លួន ជាពិសេសសម្រាប់អ្វីដែលទីក្រុងតៃប៉ិ ចាត់ទុកថាជាកិច្ចខិតខំប្រឹងប្រែងរបស់ទីក្រុងប៉េកាំង ក្នុងការជ្រៀតជ្រែកការបោះឆ្នោតដើម្បីជួយបេក្ខជនគាំទ្រខ្លួន ឲ្យទទួលបានជ័យជម្នះ។

អនុប្រធានាធិបតី Lai Ching-te និងដៃគូ Hsiao Bi-khim មកពីគណបក្សចម្រើនប្រជាធិបតេយ្យដែលកំពុងកាន់អំណាច គឺកំពុងនាំមុខក្នុងការស្ទង់មតិ។ អ្នកទាំងពីរនេះ ត្រូវបានចិន​ចាត់​ទុក​ថា​ជាក្រុម​បំបែក​ខ្លួន ហើយ​បាន​ច្រានចោល​សំណើ​ចរចា​របស់​លោក Lai ម្តងហើយម្តងទៀត៕

ប្រែសម្រួល៖ Vann Vann

ប្រភព៖ CNA

ចុចអាន៖ តៃវ៉ាន់ បង្កើតកងកម្លាំងពិសេស សិក្សាសង្រ្គាម អ៊ីស្រាអែល-ប៉ាឡេស្ទីន