កាតា ថា ឱកាសនៃបទឈប់បាញ់នៅហ្គាហ្សា កាន់តែខើចទៅៗ 

នាយករដ្ឋមន្ត្រីកាតានិយាយថា ការទម្លាក់គ្រាប់បែករបស់អ៊ីស្រាអែលទៅលើតំបន់ហ្គាហ្សា កំពុងធ្វើឲ្យលទ្ធភាពនៃបទឈប់បាញ់ថ្មី កាន់តែខើចទៅៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងវេទិកា ដូហា កាលពីថ្ងៃអាទិត្យទី១០ខែធ្នូ ព្រះអង្គម្ចាស់ Sheikh Mohammed bin Abdulrahman al-Thani មានបន្ទូលថា ប្រទេសកាតា នឹងបន្តកិច្ចខិតខំប្រឹងប្រែងរបស់ខ្លួនដើម្បីដាក់សម្ពាធលើភាគីទាំងពីរ ឲ្យឈានដល់បទឈប់បាញ់ថ្មីមួយ។

រដ្ឋឈូងសមុទ្រមួយនេះ បានដើរតួនាទីយ៉ាងសំខាន់ក្នុងការចរចាអំពីការផ្អាកបាញ់រយៈពេលមួយសប្តាហ៍រវាងអ៊ីស្រាអែលនិងក្រុមហាម៉ាស កាលពីចុងខែវិច្ឆិកា ដែលអនុញ្ញាតឲ្យមានការដោះលែងចំណាប់ខ្មាំង។

ទោះបីជាយ៉ាងណាក៏ដោយ នាយករដ្ឋមន្ត្រី​អ៊ីស្រាអែលលោក Benjamin Netanyahu បានបញ្ជាក់​កាលពី​ថ្ងៃអាទិត្យ​ថា “​សង្គ្រាម​កំពុងប្រព្រឹត្តទៅ​យ៉ាង​ពេញបន្ទុក​។ ក្នុងរយៈពេលប៉ុន្មានថ្ងៃចុងក្រោយ ភេរវករហាម៉ាសរាប់សិបនាក់បានចុះចាញ់ ហើយដាក់អាវុធចុះ និងប្រគល់ខ្លួនឲ្យអ្នកប្រយុទ្ធវីរជនរបស់យើង។ ​នេះគឺ​ជា​ការ​ចាប់​ផ្តើម​នៃ​ទី​បញ្ចប់​សម្រាប់​ក្រុម​ហាម៉ាស”។

រឿងនេះកើតឡើង ​ស្រប​ពេល​វិបត្តិ​មនុស្សធម៌​នៅ​ហ្គាហ្សា​ កាន់​តែ​ធ្ងន់ធ្ងរទៅៗ ខណៈទីភ្នាក់ងារសុខភាព ដែលគ្រប់គ្រងដោយក្រុមហាម៉ាសនៅហ្គាហ្សាបាននិយាយថា ប្រជាជនប៉ាឡេស្ទីនជិត ១៨០០០ នាក់ត្រូវបានសម្លាប់ គិតត្រឹមពេលនេះ។

ងាកទៅសន្និសីទនៅទីក្រុង ដូហា លោក Philippe Lazzarini ប្រធានទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីន (UNRWA) គូសបញ្ជាក់ថា តំបន់នេះបានក្លាយទៅជា នរកនៅលើផែនដីបាត់ទៅហើយ ជាមួយស្ថានភាពដ៏អាក្រក់បំផុត ដែលលោកមិនធ្លាប់ឃើញសោះ។

ខណៈកិច្ចប្រជុំកំពុងធ្វើឡើងក្នុងទីក្រុងដូហា, ការប្រយុទ្ធគ្នានៅភាគខាងត្បូងតំបន់ហ្គាហ្សា នៅតែបន្តផ្ទុះឡើង។ ទីក្រុង Khan Younis ជាកន្លែងដែលមនុស្សត្រូវបានគេប្រាប់ឲ្យជម្លៀសទៅ ដើម្បីគេចពីការប្រយុទ្ធគ្នានៅភាគខាងជើង ឥឡូវនេះក៏កំពុងស្ថិតក្រោមការទម្លាក់គ្រាប់បែកយ៉ាងខ្លាំងក្លាផងដែរ៕

ប្រែសម្រួល៖ Vann Vann

ប្រភព៖ BBC

ចុចអាន៖ អាមេរិក យល់ព្រម លក់ អាវុធ ជាបន្ទាន់ ទៅ ឲ្យ អ៊ីស្រាអែល