មន្ត្រីក្រសួងអប់រំ ជំរុញយុវជនខំសិក្សាភាសាបរទេស ដើម្បីដើរទាន់និន្នាការពិភពលោក

អ្នកនាំពាក្យ ក្រសួងអប់រំ យុវជន និងកីឡា បានជំរុញឱ្យយុវជនខិតខំសិក្សាភាសាបរទេសបន្ថែម ដើម្បីឆ្លើយតបទៅនឹងការរីកចំរើនសេដ្ឋកិច្ចជាតិ ក៏ដូចជាដើរឱ្យទាន់និន្នាការរបស់ពិភពលោកនាពេលបច្ចុប្បន្ន និងទៅថ្ងៃអនាគត។

លោកស្រី ឃួន វិច្ឆិកា អ្នកនាំពាក្យ ក្រសួងអបរំ យុវជន និងកីឡា មានប្រសាសន៍នៅថ្ងៃទី១១ ខែធ្នូនេះថា ក្រសួងអប់រំបានជំរុញឱ្យសិស្សរៀនភាសាបរទេសដើម្បីងាយស្រួលក្នុងទំនាក់ទំនងជាមួយវិនិយោគិនបរទេស ដែលមកវិនិយោគនៅកម្ពុជា ខណៈបច្ចុប្បន្ននៅក្នុងវិទ្យាល័យ និងសាកលវិទ្យាល័យ ពិសេសនៅវិទ្យាស្ថានភាសាបរទេស មានការសិក្សាភាសាចម្រុះរួមមានភាសា អង់គ្លេស បារាំង ជប៉ុន កូរ៉េ ចិន ដែលសិស្សអាចដាក់ពាក្យរៀនទៅតាមចំណង់ចំណូលចិត្ត។ ក្រៅពីនេះនៅតាមគ្រឹះស្ថានសិក្សាឯកជន និងមជ្ឈមណ្ឌលរបស់ស្ថានទួតមួយចំនួន ក៏មានបង្រៀនភាសាបរទេសផងដែរ។

យ៉ាងណាក៏ដោយ លោកស្រី ទទួលស្គាល់ថា បច្ចុប្បន្នមានយុវជនជាច្រើនបានងាកមកចាប់អារម្មណ៍សិក្សាភាសាបរទេសដោយសារមានកក្តាជាច្រើន ក្នុងនោះរួមមាន សាកលភាវូបនីយកម្មអាចផ្សារភ្ជាប់ និងទទួលបាននូវទំនាក់ទំនង ឬព័ត៌មាន ការទស្សនាភាពយន្ត ចំរៀង និងសិល្បៈនានាតាមប្រព័ន្ធអនឡាញ មានភាពងាយស្រួល និងច្រើនជាងមុន និងអានឯកសារផ្សេងៗនៅលើពិភពលោក អាចធ្វើឱ្យសិស្សទទួលបាននូវចំណេះដឹងថ្មីៗបន្ថែម។

លោកស្រី ឃួន វិច្ឆិកា បានបន្តថា លើសពីនេះទៀតឱកាសការងារក៏ដូចជាការរីកចម្រើនរបស់អាជីវកម្មរបស់ខ្លួននៅពេលអនាគត ដោយសារបច្ចុប្បន្ន កម្ពុជាមានសុខសន្តិភាពពេញលេញទើបបណ្តាឱ្យវិនិយោគិនបរទេសមកពីប្រទេសជិតខាង បណ្តាប្រទេសអឺរ៉ុប និងអាមេរិក ព្រមទាំងប្រទេសនានាជាច្រើនទៀតនៅលើពិភពលោកមកវិនិយោគ ដែលមានតម្រូវការរៀនភាសាបរទេស។

លោកស្រី បានបន្ថែមថា ក្រៅពីនេះយុវជនដែលមានបំណងចង់ចេញទៅសិក្សានៅក្រៅប្រទេស បានរៀនភាសាបរទេស។ ជាងនេះទៀត ការចេះភាសាកាន់តែច្រើន អាចធ្វើឱ្យយុវជនទទួលបានូវចំណេះជំនាញច្រើន និងជំរុញឱ្យសិស្សមានបំណិនក្នុងការដោះស្រាយបញ្ហា និងការចងចាំមានភាពប្រសើរជាងមុន និងកើនឡើងផងដែរ អាចឈ្វេងយល់ពីប្រទេសជិតខាង និងនៅលើពិភពលោក ស្របតាមនិន្នាការការអប់រំពិភពលោក ភាពជាពលរដ្ឋសាកលដែលប្រជាពលរដ្ឋពលរដ្ឋប្រទេសនីមួយៗអាចឈ្វេងយល់ពីគ្នាទៅវិញទៅមក ពីភាពខុសគ្នាភាពចម្រុះនៅក្នុងសង្គមដែលអាចធ្វើឱ្យគាត់អាចចេះបត់បែន និងរស់នៅនៅក្នុងសង្គមបានល្អប្រសើរ៕

អត្ថបទ៖ សំអឿន