ព័ត៌មានអន្ដរជាតិ

ប៉ាតាយ៉ា បើកលក់សារធាតុញៀនបញ្ចូលក្នុងប៉េងប៉ោង យ៉ាងរំភើយ

បានផុស

១០ ខែ មុន

នៅ

ថ្ងៃអង្គារ ១២ ធ្នូ ២០២៣

ដោយ

សារធាតុញៀនបញ្ចូលក្នុងប៉េងប៉ោងខុសច្បាប់ត្រូវបានគេប្រទះឃើញដាក់លក់យ៉ាងបើកចំហនៅហាងលក់កញ្ឆាមួយកន្លែងនៅផ្លូវ Walking Street ក្នុងទីក្រុងទេសចរណ៍ប៉ាតាយ៉ា បើទោះបីជាមានប៉ូលិសដើរល្បាតជាប្រចាំក្នុងតំបន់នោះក៏ដោយ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហាងលក់ផលិតផលកញ្ឆាស្របច្បាប់នោះ មានលក់ប៉េងប៉ោងដែលបញ្ចូលដោយឧស្ម័នណាយទ្រីសអុកសៃ ដែលជាប្រភេទឧស្ម័នធ្វើឲ្យមានអារម្មណ៍រីករាយនៅលើវិថីទេសចរណ៍ដ៏ពេញនិយមក្នុងទីក្រុងជាប់មាត់សមុទ្រមួយនេះ ។

ការរកឃើញនោះកើតមានឡើង បន្ទាប់ពីប៉ូលិសបានដាក់ការសង្ស័យនៅក្នុងហាងលក់កញ្ឆាមានដាក់សញ្ញាថា “Happy Balloon” ដែលទិញ ១០ ប៉េងប៉ោងថែមជូន ២ ប៉េងប៉ោង រួមជាមួយស្រាបៀមួយកែវដោយឥតគិតថ្លៃ ហើយនៅពេលដែលចុះឆែកឆេរទៅ ក៏ឃើញភ្ញៀវកំពុងផ្លុំប៉េងប៉ោងមានបញ្ចូលសារធាតុញៀនលេងយ៉ាងសប្បាយ ។

ចំពោះការលក់ឧស្ម័នប្រភេទនេះនៅក្នុងប្រទេសថៃ ត្រូវបានហាមឃាត់ក្រោមច្បាប់ឱសថឆ្នាំ ១៩៦៧ ដែលជាប់ពន្ធនាគាររហូតដល់ ៥ ឆ្នាំ និងពិន័យជាប្រាក់ចំនួន ១០,០០០ បាត ។

គួរបញ្ជាក់ថា ការប្រើប្រាស់ប៉េងប៉ោងដែលផ្ទុកសារធាតុញៀន ឬឧស្ម័នណាយទ្រីសអុកសៃ បង្កឲ្យមានគ្រោះថ្នាក់ធ្ងន់ធ្ងរ ដល់សរសៃប្រសាទ សរសៃឈាម ធ្វើឲ្យបាត់ស្មារតីចងចាំ និងគាំងបេះដូង រហូតដល់បាត់បង់ជីវិតផងដែរ ៕

ប្រែសម្រួល៖ នាង រតនៈ

ប្រភព៖ The Nation