អតីត​ទាហាន​ជប៉ុន​ ៣នាក់​​​ ជាប់​ទោស​ពី​បទ​រំលោភ​ផ្លូវ​ភេទមិត្ត​រួម​ការងារ

នៅថ្ងៃអង្គារទី១២ខែធ្នូ តុលាការ​ជប៉ុន​​រក​ឃើញថា ​អតីត​ទាហាន​៣នាក់ ​មាន​ពិរុទ្ធ​ពី​បទ​បៀតបៀន​ផ្លូវភេទ​មិត្ត​រួម​ការងារ​ជា​ស្ត្រី។

សាលក្រមជាប្រវត្តិសាស្រ្តនេះ កើតឡើងបន្ទាប់ពីនាង Rina Gonoi អាយុ២៤ឆ្នាំ ទម្លាយរឿងជាសាធារណៈនិងទាក់ទាញចំណាប់អារម្មណ៍ពីអន្តរជាតិ នៅពេលនាងបង្ហោះ YouTube ក្នុងឆ្នាំ២០២២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយមក រាជអាជ្ញា Fukushima ក៏បានធ្វើការចោទប្រកាន់លើបុរស៣នាក់ នៅខែមីនា ដោយប្រែក្រឡាស់ការសម្រេចចិត្តលើកមុនរបស់ពួកគេ។

ទោះបីជាយ៉ាងណាក៏ដោយ លោក Shutaro Shibuya, Akito Sekine និង Yusuke Kimezawa បានទទួលការព្យួរទោសរយៈពេលពីរឆ្នាំនៅតុលាការ Fukushima។

នេះគឺជាសាលក្រមធំលើកដំបូង ស្តីពីការរំលោភផ្លូវភេទនៅជប៉ុន ចាប់តាំងពីខែមិថុនាមក នៅពេលប្រទេសនេះបានកែប្រែច្បាប់ឧក្រិដ្ឋកម្មផ្លូវភេទរបស់ខ្លួន ដែលរួមមានទាំងការកំណត់ឡើងវិញនូវនិយមន័យនៃពាក្យរំលោភ និងការបង្កើនអាយុនៃការយល់ព្រមរួមដំណេកផងដែរ។

តាមការបញ្ជាក់ នៅខែសីហាឆ្នាំ២០២១ សហសេវិកប្រុស៣នាក់ បានចាប់នាង Gonoi ឲ្យដេកលើគ្រែ ហើយធ្វើសកម្មភាពម្តងម្នាក់ៗ។ មុននេះ នាងបានប្រាប់ BBC ថា ថ្វីបើសហសេវិក ច្រើននាក់ផ្សេងទៀត មានវត្តមាននៅពេលនោះក៏ដោយ ប៉ុន្តែគ្មាននរណាម្នាក់ រារាំងអ្នកទាំងបីនោះទេ បែរជានាំគ្នាសើចទៅវិញ។

នាង Gonoi បានរាយការណ៍ពីហេតុការណ៍នេះទៅថ្នាក់លើ ប៉ុន្តែពាក្យបណ្តឹងត្រូវច្រានចោល ដោយសារតែនាងគ្មានសាក្សី។ ក្រោយមក អង្គភាពនគរបាលការពារដីគោក (GSDF) បានបញ្ជូនបុរសទាំង៣ ទៅកាន់អយ្យការ ក្រោមការសង្ស័យពីបទរំលោភបំពាន ប៉ុន្តែសំណុំរឿងនេះ ត្រូវទម្លាក់ចោលវិញ ដោយសារខ្វះព័ស្តុតាង ហើយទីបំផុត Gonoi បានចាកចេញពីជួរកងទ័ព។

វីដេអូ YouTube របស់នាង បានបង្កភាពល្បីល្បាញកាលពីឆ្នាំមុន ហើយនាងប្រមូលហត្ថលេខាពីមនុស្សជាង១០០០០០នាក់សម្រាប់ញត្តិ អំពាវនាវឲ្យក្រសួងការពារជាតិ ស៊ើបអង្កេតករណីរបស់នាង។

បន្ទាប់​មក ក្រសួង​បាន​សុំ​ទោស​នាង ហើយ​បើក​ការ​ស៊ើប​អង្កេត​ដ៏​កម្រ​មួយ ឈានទៅដល់ការ​រក​ឃើញ​ពាក្យ​បណ្តឹង​ជាង១០០ផ្សេង​ទៀត​ពាក់ព័ន្ធការ​យាយី ​នៅ​ទូទាំង​ក្រសួង។

Gonoi ក៏បានដាក់ពាក្យបណ្តឹងរដ្ឋប្បវេណី ប្រឆាំងជនល្មើសទាំងប្រាំនាក់ និងរាជរដ្ឋាភិបាលជប៉ុនផងដែរ ដោយទាមទារសំណងចំនួន៥.៥លានយ៉េន (៤០០០០ដុល្លារ) ពីបទបង្កបញ្ហាផ្លូវចិត្តរបស់នាង និង២លានយ៉េនបន្ថែមពីរដ្ឋ សម្រាប់ការបរាជ័យចំពោះការពារករណីរំលោភបំពាន។

សូមបញ្ជាក់ ករណីរំលោភផ្លូវភេទនៅតែជាប្រធានរសើបនៅជប៉ុន ហើយទទួលបានការចាប់អារម្មណ៍ទូទាំងប្រទេសក្នុងរយៈពេលប៉ុន្មានឆ្នាំចុងក្រោយនេះ បន្ទាប់ពីមានសំណុំរឿងល្បីៗដូចជារឿងរបស់ Gonoi, ការតស៊ូនៅតុលាការរបស់ Shiori Ito និងការលាតត្រដាង Johnny Kitagawa៕

ប្រែសម្រួល៖ Vann Vann

ប្រភព៖ BBC

ចុចអាន៖ ឃាត់ខ្លួនបុរសវ័យ៤៧ឆ្នាំម្នាក់ ក្រោយរំលោភក្មួយស្រីខ្លួនឯង