មីស៊ីល បាញ់ចេញពីយេម៉ែន វាយប្រហារកប៉ាល់ដឹកប្រេងន័រវែស

មន្ត្រីការពារជាតិអាមេរិកប្រាប់ទៅ Reuters នៅថ្ងៃអង្គារទី១២ខែធ្នូថា មីស៊ីលដែលបាញ់ចេញពីប្រទេសយេម៉ែនគ្រប់គ្រងដោយក្រុមហ៊ូធី បានវាយប្រហារកប៉ាល់ដឹកប្រេងពាណិជ្ជកម្មមួយគ្រឿង បណ្តាលឲ្យមានអគ្គិភ័យ និងការខូចខាត ប៉ុន្តែគ្មានអ្នករបួសទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីម្នាក់និយាយថា ការវាយប្រហារលើកប៉ាល់ដឹកប្រេង STRINDA បានកើតឡើង ប្រហែល១១១គីឡូម៉ែត្រ ភាគខាងជើងច្រកសមុទ្រ Bab al-Mandab។ នាវាពិឃាត USS Mason របស់កងទ័ពជើងទឹកអាមេរិកក៏នៅទីនោះដែរ ហើយបានផ្តល់ជំនួយភ្លាមៗ។

មន្ត្រីទីពីរនិយាយថា កប៉ាល់ STRINDA នៅតែធ្វើប្រតិបត្តិការ ក្រោយការវាយប្រហារប៉ុន្មានម៉ោង។ កប៉ាល់នេះ មានដោតទង់ជាតិន័រវែស ហើយក្រុមហ៊ុនន័រវែសជាម្ចាស់ឈ្មោះ Mowinckel Chemical Tankers និងអ្នកគ្រប់គ្រង Hansa Tankers មិនអាចទាក់ទងបានភ្លាមៗដើម្បីសុំការអត្ថាធិប្បាយទេ។

សូមបញ្ជាក់ ក្រុម ហ៊ូធី ដែលជាសម្ព័ន្ធមិត្តអ៊ីរ៉ង់ បានលូកដៃចូលក្នុងជម្លោះមជ្ឈិមបូព៌ា ចាប់តាំងពីសង្គ្រាមអ៊ីស្រាអែល-ហាម៉ាស ផ្ទុះឡើងកាលពីថ្ងៃទី៧ខែតុលា ដោយបានវាយប្រហារលើកប៉ាល់ក្នុងផ្លូវដឹកជញ្ជូនសំខាន់ៗ ហើយថែមទាំងបញ្ជូនយន្តហោះគ្មានមនុស្សបើក និងបាញ់មីស៊ីលវាយប្រហារអ៊ីស្រាអែលទៀតផង។

កាលពីថ្ងៃសៅរ៍ ក្រុម ហ៊ូធី និយាយថា ពួកគេនឹងកំណត់គោលដៅលើកប៉ាល់ទាំងអស់ ដែលធ្វើដំណើរទៅកាន់ប្រទេសអ៊ីស្រាអែល ដោយមិនខ្វល់ជារបស់ប្រទេសណានោះទេ ហើយព្រមានក្រុមហ៊ុនដឹកជញ្ជូនអន្តរជាតិទាំងអស់ ប្រឆាំងនឹងការពាក់ព័ន្ធជាមួយកំពង់ផែអ៊ីស្រាអែល។

ទោះបីជាយ៉ាងណាក៏ដោយ គេ​មិន​ទាន់​ច្បាស់​ទេ​ថា តើកប៉ាល់ STRINDA មាន​ទំនាក់ទំនង​ជាមួយ​អ៊ីស្រាអែលដែរ​ឬក៏​អត់៕

ប្រែសម្រួល៖ Vann Vann

ប្រភព៖ CNA

ចុចអាន៖ ឆេះកប៉ាល់ដឹករថយន្តជិត ៣០០០គ្រឿង នៅសមុទ្រហូឡង់